ပ္ဍဲလံၚ်လုၚ် ကွဳစက်ပၞာန်က္လေၚ်စဴဴကၠုၚ် နူဂေတ်ကၚ် ဒးဒုၚ်ဖံက်ခတိုဟ်လဝ်မာၚ်၊ ၆ တၠ ဒးချိုတ်လဝ်

လံၚ်လုၚ်၊ နဝ်ဝေမ်ဗာ (၂၈)

ကွဳစက်ပၞာန်ကံၚ်ဇြဳပၞာန် ဂေတ်ကၚ် ပ္ဍဲပွိုၚ်ဍုၚ်လံၚ်လုၚ်၊ ရးဒေသတၞၚ်သြဳတုဲ ကလေၚ်စဴကၠုၚ်မွဲဖ္ဍိုက်ဂှ် ဟိုတ်နူ ဒးဒုၚ်ဖံက်ခတိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၆) တၠရဂှ် ဂကောံစဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် လလောၚ်တြးလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၇) ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၆) တုဲကၠုၚ်တေံ အခိၚ်ဇိုၚ်သဝ်တ္ၚဲ ၜိုတ် (၅) နာဍဳဂှ် ကွဳစက်ကံၚ်ဇြဳပၞာန် ဂေတ်ကၚ် ပ္ဍဲဍုၚ်လံၚ်လုၚ်တုဲ အခိၚ်က္လေၚ်စဴကၠုၚ်ဂှ် (ပကဖ) ပွိုၚ်ဍုၚ်လံၚ်လုၚ် ဖံက်ခတိုဟ်လဝ်မာၚ်ပဒေသာ ပ္ဍဲဗ္ဒာဲဗဒိုပ်ဗၠာဲသၟိၚ်ၝောံဍုၚ်ရ။

ဟိုတ်နူပရေၚ်ဖံက်ခတိုဟ်ဏံတုဲ ကွဳစက်ဝဳဂိုဝ် ကောန်ဒပ်ကံၚ်ဇြဳပၞာန် ဍိုက်ပါဗက်ကၠုၚ်ဂှ် ထ္ပက်ဒေါံအာလဝ်တုဲ ကောန်ဒပ်ကံၚ်ဇြဳပၞာန် ပါကၠုၚ် ပ္ဍဲကွဳစက်ဂှ် (၆) တၠ ဒးချိုတ်လဝ်တုဲ ဒးလဝ်ဘဲဝပ် (၄) တၠရဂှ် ညးတာလျိုၚ်လလောၚ်ပရိုၚ် (ပကဖ) ပွိုၚ်ဍုၚ်လံၚ်လုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

ကောန်ဒပ်ကံၚ်ဇြဳပၞာန် ဒးဒုၚ်ဖံက်ခတိုဟ်လဝ်မာၚ်တအ်ဂှ် ကၠောန်သ္ပဒၟံၚ် ပရေၚ်ရပ်စပ်စၟဳစၟတ် ညးဍုၚ်ကွာန် အာကၠုၚ်ဒၟံၚ်အကြာဂၠံၚ်ဍာန် ပ္ဍဲဍုၚ်လံၚ်လုၚ်ကီု၊ အာတ်မိက်ကေတ်ဒၟံၚ်သြန် ဆက်က်ရဂှ်ဂွံတီကေတ်ရ။

နကဵုကောန်ဒပ်သၟဝ်တဲကံၚ်ဇြဳပၞာန် မၞုံပွိုၚ်ဍုၚ်လံၚ်လုၚ်တအ်ဂှ် ညံၚ်ဂွံလုပ်ကၠုၚ် ဇရေၚ်ဂၠံသြိုဟ်ညးဍုၚ်ကွာန် ဗွဲမပြဟ်ကီု ကောန်အရာပ်ညးဍုၚ်ကွာန်တအ်လေဝ် သတိပရေၚ်ပၞာန်ညံၚ်ဂွံနွံဒၟံၚ်လၟိုန်ကီုဂှ် (ပကဖ)ပွိုၚ်ဍုၚ် ကဵုလဝ်သမ္တီရ။

ပ္ဍဲကဵုဂိတုအံက်တဝ်ဗာ တုဲကၠုၚ်တေံ ပ္ဍဲရးတၞၚ်သြဳဂှ် အကြာဒပ်စဵုဒၞာညးဍုၚ်ကွာန်တအ်ကဵု ဒပ်ကံၚ်ဇြဳပၞာန် ပေါဲဗတိုက်က္တဵုဒှ်လဝ် ဗၞတ် (၃၄) ဝါတုဲ ပရေၚ်ဒးဒုၚ်ဖံက်ခတိုဟ်လဝ်မာၚ် နွံလဝ် (၇) ဝါရဂှ် ဂကောံသုတေသန FE5 Tanintharyi လလောၚ်တြးလဝ်ရ။

ပရိုၚ် – သြၚ်လောန်တိုၚ်မ်

ဗီု – LLPDF