သ္ဂံၚ်က္လေၚ်စဴကၠုၚ် နူပေါဲဗတိုက်ယျေဥူတအ်ဂှ် ညးဍုၚ်ကွာန်တအ် ဒုၚ်တၠုၚ်

ယျေဥူ – နဝ်ဝေမ်ဗာ(၂၈)

ကြဴနူကောန်ဒပ် ဒပ်ပၠန်ဂတးတအ် ဗတိုက်လဝ် ဒပ်ကံၚ်ဇြဳပၞာန်ကဵု ပျူသဝ်ထဳ ဖျေံလဝ်ဗဒိုပ် ပ္ဍဲကွာန်အောၚ်တာယာ ပွိုၚ်ဍုၚ်ယျေဥူ၊ ရးဒေသသက်ဂါၚ်တအ်တုဲ သ္ဂံၚ်က္လိဂွံလဝ် ပေါဲအံၚ်ဇၞးတအ်ဂှ် ညးဍုၚ်ကွာန်တအ် ဒုၚ်လဝ်တၠုၚ်ညးသ္ကအ်ရ။

အာစိုပ်ဗတိုက်လဝ် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၄) တုဲကၠုၚ်တေံတုဲ ပ္ဍဲပေါဲဗတိုက်ဂှ် ကောန်ဒပ်ကံၚ်ဇြဳပၞာန် ဒးချိုတ်လဝ် (၁၀) တၠ ဒးလဝ်ဘဲဝပ် (၁၅) တၠ ရပ်ဂွံလဝ် (၇) တၠရဂှ် ဒပ်ပၞာန်ဗၠးၜးညးဍုၚ်ကွာန် PLA ကဵုလဝ်သမ္တီရ။

ပ္ဍဲကဵုပေါဲဗတိုက်ဂှ် မကမ်၊ မသြန် ကေုာံကွဳလိုန်ဓာတ် နူဒပ်ကံၚ်ဇြဳပၞာန် (၂) ဖ္ဍိုက်ဂှ်လေဝ် သီကေတ်မာန်လဝ်ရဂှ် ဂွံတီကေတ်ရ။

ပေါဲဗတိုက်ဏံ ဒပ်ပၞာန်ဗၠးၜးညးဍုၚ်ကွာန် PLA ကဵု ဒပ်ပၠန်ဂတးကောန်ဂကူဗၟာ (BRNA) မဒှ်ဒပ်မဟာမိတ်ပံၚ်ကောံ၊ 96 Soldiers PDF (ဒပ်လ္ပာ်အညာ)၊ သုၚ်ဗေဒါ KBU(ပကဖ)၊ မိုဝ်ကျိုဝ်မုမ်တိုၚ် LPDF ၊ ဝံသပါလ LPDF၊ TCRF(PLA)၊ ယှိုဲဓူဝါန် (PLA) ကေုာံ GZ LPDF တအ် ပံၚ်တောဲဗတိုက်လဝ်ရဂှ် ဂွံတီကေတ်ရ။

ဗဒိုပ်ကံၚ်ဇြဳပၞာန် ပ္ဍဲတွဵုရးကရေၚ်ဍာဲတအ် ပၠန်ဂတးရပ်လွဟ်ဇြဟတ်ခိုဟ်ဒၟံၚ်ဂှ် ဂကောံဇြဟတ်ပၠန်ဂတးတအ် ကၠောန်ရေၚ်တၠုၚ်ဒၟံၚ် ပရေၚ်သီကေတ်ဗဒိုပ် ကြပ်ဒဒှ်အရိုဟ်တ္ၚဲရ။

ပရိုၚ် – သြၚ်လောန်တိုၚ်မ်

ဗီု – PLA