ပရေၚ်ပၞာန် ၁၀၂၇ မက္တဵုဗဒှ်ကဵု ဒပ်ကံၚ်ဇြဳပၞာန် လီုလာ်ယောၚ်ယာကၠုၚ်

ကဝ်က၊ နဝ်ဝေမ်ဗာ ၂၈

အခိၚ်ဒပ်ပၞာန်သီအဝဵု ကြပ်ပေၚ်ပိသၞာံဂှ် ပရေၚ်ပၞာန် ၁၀၂၇ ဂကောံမဟာမိကောဒေံပိဂကောံ နူကဵုသ္ကုတ်သၠုၚ်ကျာဍုၚ် မစလဝ်ဂှ်ဝွံ ညံၚ်ဒပ်ကံၚ်ဇြဳပၞာန် ယာက္ဍိုပ်ဟွံမာန်ဂှ် သ္ကဵုလီုလာ်ယောၚ်ယာကၠုၚ်တုဲ လၟုဟ်မ္ဂး ပရေၚ်ပၞာန် ပေၚ်ကၠုၚ်မွဲဂိတုဣရ။

ပ္ဍဲကဵုကၞောတ်ဂိတုအံက်တဝ်ဗာဂှ် ဂကောံမဟာမိတ်ကောဒေံပိဂကောံ ဂကောံကဝ်က MNDAA ၊ ဂကောံတအာၚ် TNLA ကေုာံ ဂကောံရခေၚ် AA တံဝွံ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မၞုံရးသေံသ္ကုတ်သၟဝ်ကျာ ပၟိက်ဇၞော် ပ္ဍဲပရေၚ်ပၞာန်တံ ကရောံတၚ်လလောၚ်တြးပၞာန် မွဲအခိၚ်ဓဝ်ရ။

ပ္ဍဲကဵုချဳဒရာၚ်ပၞာန်ဏံဂှ် ဂကောံမဟာမိတ်ကောဒေံမဟာမိတ်သၟးဟွံက ဂကောံရပ်လွဟ်ကောန်ဍုၚ်အရၚ်ဇြဟတ်ဇၞော် ဒပ်ပၞာန်ဗၠးၜးကချေၚ် KIA တံပါလုပ်တုဲ ဂကောံဒပ်ပၠန်ဂတးတၞဟ်ဟ်တံကဵု ဂကောံဒပ် PDF NUG တံလေဝ် ပံၚ်တောဲပါလုပ်ဒၟံၚ်အိုတ်ရ။

ဟိုတ်နူပရေၚ်ပံၚ်တောဲဗ္တိုက်မွဲအခိၚ်ဓဝ် ချဳဒရာၚ်ပၞာန်ဂှ်တုဲ ရးသေံသ္ကုတ်သၟဝ်ကျာသၟးဟွံက ရးသက်ကိုၚ် ကေုာံ တွဵုရးချေၚ်တံပါလုပ်ဂှ် ဗွိုၚ်ပၞာန်သၠဲလးကၠုၚ် စဵုကဵုဒေသကရေၚ်ဍာဲ ကေုာံ ဒေသရခေၚ်တံတုဲ ဂကောံဒပ်ပံၚ်ကောံပၠန်ဂတးတံ သီကၠုၚ်လဝ် ရုၚ်မဆေၚ်စပ်ကဵုပရေၚ်အုပ်ဓုပ်တံ၊ ဗ္ဒိုပ်ဒပ်ကံၚ်ဇြဳပၞာန် ပၟိက်ဇၞော်တံရ။

လၟုဟ်မ္ဂး ဂကောံရပ်လွဟ်ကောန်ဍုၚ်အရၚ်အပ္ဍဲဒေသတံကဵု ဂကောံဒပ်ပံၚ်ကောံပၠန်ဂတးတံ ထိၚ်ဒက်လဝ် ဍုၚ် ၆ ဍုၚ် နူကဵုရးသေံသ္ကုတ်သၟဝ်ကျာဂှ်ကီု နူကဵုရးသက်ကိုၚ်ဂှ် ဍုၚ်ကဝ်လေန်ကဵု ခါန်ပါတ်၊ နူကဵုချေၚ်ဂှ် ရိခဝ်ဒါ ကေုာံ လိုၚ်လေန်ပဳ၊ ပ္ဍဲကဵုတွဵုရးကရေၚ်ဍာဲတံဂှ် ဍုၚ်မေဝ်သေအ်တံ မဒှ်ရ။

အကြာပ်ဒပ်ဇၞော် ဒပ်ကျာ CDM ဇြေယျဂှ် နကဵုဒပ်ပၞာန် ကၠောန်သ္ပလဝ် ပရေၚ်ဖောအ်ဗြေဝ်လ္ပာ်ရုပ်သၟးတုဲ ဟိုတ်နူဟွံကၠောန်လဝ် ပရေၚ်ဖောအ်ဗြေဝ် စပ်ကဵုစိုတ်ဓာတ်တံဂှ်ရ အခိၚ်လၟုဟ် ကလေၚ်ယာက္ဍိုပ်ဟွံမာန်ရတုဲ စိုပ်ဒၟံၚ်ကဆံၚ်ရုပ်ရဴလီုဒၟံၚ်ယျဂှ် သ္ၚဳဂၠိပ်လဝ်ရ။

“ဍေံတံ ( ဒပ်ပၞာန်) ဂှ် Standard Army ဂးတုဲ ကၠောန်ဒၟံၚ်ညံၚ်လ္ပာ်ရုပ် ဂွံဖောအ်ဗြေဝ်သၟးရဏောၚ်။ ဟိုတ်နူဟွံကၠောန်လဝ် ညံၚ်လ္ပာ်စိုတ် ဂွံဖောအ်ဗြေဝ်ဂှ်ရ အခိၚ်ဗီုဏံတှ်ေ ကလေၚ်ယာက္ဍိုပ်ဟွံမာန်ဟဂှ်ရ။ မွဲပၠန်ဂှ် ဟိုတ်နူပရေၚ်ထံက်ဂလာန်ညးဍုၚ်ကွာန်တံ ဟွံမွဲဟဂှ်တုဲ ဍုၚ်ဒးဒုၚ်သီလဝ်တံဂှ် သာ်လဵုမှ ဂွံကလေၚ်ဗ္တိုက်သီကေတ်ဂှ် ဒှ်ဟွံမာန်ပုဟ်။ ဟိုတ်ဂှ်ရ လၟုဟ် ဍေံတံကၠောန်ဒၟံၚ်အဓိကဂှ်တှ်ေ ပလေဝ်ပၞာန်ဒုၚ်ရဏောၚ်။ ပ္ဍဲကဵုဒေသ၊ ဒပ်လ္ၚဵုတံဂှ်တှ်ေ ဟွံဂွံဗ္တိုက်ဏီပုဟ်။ ၜိုတ်ရမျာၚ်ဗြုညိကီု။ ပြံၚ်ထောံလဝ် ကောန်ဇာတ်ဒပ်ပၞာန်ဍေံတံ ဒၞါဲဂီုကၠီုတံ ဗီုတံဏံဂှ် ဂွံမိၚ်ဒၟံၚ်ပရိုၚ်ရ။ အကာဲအရာဍေံတံဂှ်တှ်ေ စိုပ်ဒၟံၚ်ဍာ်စဟွံသာယျဏောၚ်။ ပ္ဍဲကဵုဍေံတံဂှ်လေဝ် ဒှ်ဒၟံၚ်ဗီုပြၚ် ရုပ်ရဴလီုဒၟံၚ်တံယျ“ သာ်ဝွံ သ္ဂးရ။

မွဲလ္ပာ်ပၠန်ဂှ် အပ္ဍဲချဳဒရာၚ်ပၞာန် ၁၀၂၇ ဏံ လၟေၚ်ဒဒှ်ကောန်ပၞာန် အလုံတမ်ဒပ်မွဲ ကေုာံ ဂြောဝ်ဂတာညးတံ လုပ်စိုပ်ဖျေံအာလွဟ် ဇရေၚ်ဂကောံမဟာမိတ်ကောဒေံပိဂကောံဂှ်ဝွံ ပ္ဍဲကဵုဝၚ်ဒပ်ပၞာန်ဗၟာမ္ဂး ဒှ်လၟေၚ်ဒဒှ်ကိုပ်ကၠာအိုတ်ရ။

သ္အာၚ်နူဂှ်ပၠန် အပ္ဍဲချဳဒရာၚ်ပၞာန်ဂှ် ဗ္ဒိုပ်ပၞာန်ကံၚ်ဇြဳပၞာန် မၞုံဒၟံၚ်မုက်ပၞာန်တေံဂှ်ဝွံ ဗ္တိုက်ဂွံၜိုတ်မွဲလစုတ်ဓဝ်တုဲ ကောန်ဒပ်ကံၚ်ဇြဳပၞာန်တံ ဒုၚ်ကျဖျေံလွဟ်ဂှ်ကီု၊ ဂြိပ်တိတ်အာတံကီု နွံလဝ်တုဲ သီဂွံလဝ် ကပေါတ်လွဟ်လက်နက်ပၞာန် ဗွဲမဂၠိုၚ်ဂၠေၚ်ရ။

နကဵုကံၚ်ဇြဳပၞာန် အပ္ဍဲဂိတုနဝ်ဝေမ်ဗာ သတ္တာဟဒုတိယဂှ် သွက်ဂွံစဵုဒၞါ ဌာန်ဂအုပ် နေဗျဳဒဝ် နူကဵုပၞာန်ထ္ပက် အလုံဍုၚ်မွဲဂှ်တုဲ ပလံၚ်ဗစိုပ်လဝ် ဇြဟတ်ဒပ်ပရေၚ်ဗ္တိုက် မၞုံလ္ဂုၚ်၊ ဗဂေါ ကေုာံ မာန္တလေဝ်တံ ပွဳပွူ ၁၀၀၀၀ ဂှ် ဌာန်ပရိုၚ်ဨရာဝတဳ ထ္မံက်ထ္ၜးလဝ် ပ္ဍဲဂိတုနဝ်ဝေမ်ဗာ ၂၅ တေံရ။

သ္အာၚ်နူဂှ်ပၠန် ကလေၚ်ကော်ဒၟံၚ် ကောန်ဒပ် နူကဵုဒေသတၞဟ်ဟ်တံ ဂၠိုၚ်ကဵုလ္ၚီ သ္ၚိတ်တ်တံတုဲ ညးဒုၚ်ကာကောန်အရာပ် နေဗျဳဒဝ်တံဂှ်လေဝ် ဒက်ပ္တန်ဒၟံၚ် နဒဒှ်ဒပ်မၚ်ကၚ်ရောၚ်ဂှ် နိဿဲကေတ် ဂလာန်ညးဒုၚ်ကာ ညးဒေသတံကဵု ပရိုၚ်တမ်ရိုဟ် လ္ပာ်ပၞာန်တံတုဲ ထ္မံက်ထ္ၜးလဝ်ရ။

ပ္ဍဲဂိတုနဝ်ဝေမ်ဗာ ၂၁ ဂှ်လေဝ် သီုကဵုတမ်ဒပ် ခလရ ကံၚ်ဇြဳပၞာန် မၞုံဍုၚ်အေန်ဂျာန်ယာန် တွဵုရးကချေၚ်ပါလုပ်ဂှ် ကလေၚ်ရုပ်သီလဝ် ဗ္ဒိုပ်မဖျေံလဝ်သ္ဇိုၚ်သီုဖအိုတ်တံဂှ်ရောၚ် ညးဒုၚ်တာလျိုၚ်လလောၚ်ပရိုၚ် KIA ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

နကဵုဂကောံမဟာမိတ်ကောဒေံပိဂကောံဂှ် အခိၚ်ချဳဒရာၚ်ပၞာန် ၁၀၂၇ ပေၚ်မွဲဂိတုဂှ် သွက်ဂွံတိုန်မွဲကဆံၚ်ပၠန် Nationwide Operation နဒဒှ်ပရေၚ်ပၞာန် ကဆံၚ်အလုံဍုၚ်မွဲဂှ် ဒှ်ဒၟံၚ်ဒတုဲယျရောၚ် ပ္ဍဲဂိတုနဝ်ဝေမ်ဗာ ၂၄ တေံ ကဵုသမ္တီကြဵုဇာလဝ်ရ။

ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် ချဳဒရာၚ်ပၞာန် ၁၀၂၇ ဂှ်ဝွံ ဒဵုကဵုအုပ်ဓလီုသီဂွံ လ္ပာ်ဗၟံက်သၟဝ်ကျာကၟိန်ဍုၚ်မွဲဂှ် ဟွံမွဲဏီဂှ်ရ သွက်ဂွံသီ နေဗျဳဒဝ်မာန်ဂှ် ပ္ဍဲကဵုပရေၚ်ပၞာန် ကဆံၚ်ဒုတိယဂှ် ဒးသီအာ ဒေသမသှ်ေဒၟံၚ်တံဂှ်ဏီဏောၚ်ဂှ် သ္ၚဳဂၠိပ်လဝ်ရ။

“ယဝ်ရအုပ်ဓလီုသီဂွံ လ္ပာ်ဗၟံက်သၟဝ်ကျာမွဲမာန်ဟီုမ္ဂး တ္ၚဲဏံဂှ် သီလံက်ကိုၚ်ဟွံမာန်ဏီပုဟ်။ မွဲပၠန်ဂှ် သီလာယှိုဝ်ဟွံမာန်ဏီပုဟ်။ မူဇြေဝ်ဂှ်ပၠန်လေဝ် အလုံပွိုၚ်ဍုၚ်မွဲဂှ် သီဂွံလဝ် ဟွံမွဲဏီပုဟ်။ ပ္ဍဲကဵုကဆံၚ်ဒုတိယ အစဳဇန် ၁၀၂၇ ဂှ် ဒးကၠောန်ဒၟံၚ် အရာတံဏံဏီဏောၚ်ဂှ် စၟဳစလဝ်ရ။ ဟိုတ်ဂှ်ရ ရမျာကြဵုဇာဂှ်ဝွံ ဒှ်ရမျာၚ်ကြဵုဇာ ကဵုဇြဟတ်ဂရိုဟ် လ္ပာ်စိုတ်ဓာတ်တံမွဲမာန်တုဲ နူကဵုအလုံဍုၚ်မွဲ ချဳဒရာၚ်ကၠုၚ်မာန်ကီုလေဝ် ရံၚ်ကဵုအဓိပ္ပာယ်နတဲဏံမ္ဂး လ္ဂောံကဵုပရေၚ်ပၞာန်ဂှ် သွက်ဂွံအာ စဵုကဵုပၞာန်ထ္ပက် အလုံဍုၚ် ဒဵုကဵုသီဍုၚ်နေဗျဳဒဝ်မာန်ဂှ် ဒးပလေဝ်ဒၟံၚ် လဂါံဇိုၚ်ညိညဏီဏောၚ်” ဂှ် ညးသ္ဂးရ။

ဂကောံမဟာမိတ်ကောဒေံပိဂကောံဂှ် အပ္ဍဲချဳဒရာၚ်ပၞာန် ပွိုၚ်မွဲဂိတုဏံ ဒေသကဝ်ကတၟေၚ် (၁) ဂှ်ဝွံ ညံၚ်သ္ဂောံစိုပ် ပ္ဍဲတဲဂကူကဝ်ကတံဂှ် ဟွံသ္ၚောဲရတုဲ ပေါဲဗ္တိုက်သီဍုၚ်လံက်ကိုၚ် မဒှ်ကၠုၚ်ပေါဲဗ္တိုက်စဴဌာန်ဒၟံၚ် ဂကူကဝ်ကတံဂှ်လေဝ် ခြာဟွံလအ် ကၠုၚ်ဏောၚ်ဂှ် ပ္ဍဲဂိတုနဝ်ဝေမ်ဗာ ၂၅ အခိၚ်ဗ္တံ ၜိုတ် ၁၁ နာဍဳဂှ် ကဵုလဝ်သမ္တီရ။

ပ္ဍဲကဵုတ္ၚဲချဳဒရာၚ်ပၞာန် ၁၀၂၇ ပေၚ်မွဲဂိတုဂှ် အခိၚ်နူဂယး ၃ နာဍဳကဝိုက်ဂှ် ဒပ်ပၞာန်တအာၚ် TNLA ဗ္တိုက်လဝ် ဗ္ဒိုပ်ဒပ်ဒဒန်နပဝ်ကံၚ်ဇြဳပၞာန် ပွိုၚ်ဍုၚ်မူဇြေဝ်ဂှ်တုဲ ပွိုၚ်ဍုၚ်ကျံက်မေဝ် ပွဳပွူကွာန် (နားခေါ်/ကောၚ်းမူလိန်) တံဂှ်လေဝ် ပ္ဍဲကဵုအခိၚ်နူဂယး ၇ နာဍဳပြၚ်ဂှ် က္တဵုဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန်ရောၚ် TNLA လလောၚ်ပ္တိတ်လဝ်ရ။

သ္အာၚ်နူဂှ်ပၠန် ပ္ဍဲဂိတုနဝ်ဝေမ်ဗာ ၂၇ အခိၚ်နူဂယး ၜိုတ်ပွဳပွူ ၈ နာဍဳဂှ် ဒပ်ပၞာန်တအာၚ် TNLA လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် မကၠုၚ်စိုပ်ဖျေံလဝ်ဒပ် ပ္ဍဲကွာန်မိုၚ်လဳ ပွိုၚ်ဍုၚ်လာယှိုဝ်ဂှ်တုဲ အကာဲအရာပေါဲပၞာန်ဗွဲလစှ်ဂှ်ေ ဟွံဂွံတီကေတ်ဏီဖိုဟ်ရ။

MNDAA ဂှ်လေဝ် ပ္ဍဲဂိတုနဝ်ဝေမ်ဗာ ၂၅ အခိၚ်နူဂယး ၁၀ နာဍဳဂှ် ဗ္တိုက်သီဂွံလဝ် သၞေဟ်ကၚ်ကျေန်သာန်ကျအ် မဒှ်အဓိက သွက်ပရေၚ်သွံရာန်ဗၞိက် ကြုက်−ဗၟာဂှ် ပ္ဍဲဂိတုနဝ်ဝေမ်ဗာ ၂၇ တေံ The Kokang မဳဒဳယျာ ထ္မံက်ထ္ၜးလဝ်ရ။

နကဵုဂကောံမဟာမိတ်ကောဒေံပိဂကောံ အပ္ဍဲချဳဒရာၚ်ပၞာန် ၁၀၂၇ မွဲဂိတုဏံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဍောတ်တ်ဇၞော်ဇၞော် ၂၆၀ ပြၚ် ပ္ဍဲကဵုတွဵုရးရခေၚ် ပါလုပ် သီုကဵုဒေသရးသေံသ္ကုတ်သၟဝ်ကျာ ဒေသကဝ်က ကေုာံ ဒေသတအာၚ်တံဂှ် ရ။

ပရိုၚ်−သြၚ်လောန်တိုၚ်(မ်)

ဗီု−The Kokang