ကျာ်မြဟ်၊ နဝ်ဝေမ်ဗာ ၂၈
ဒပ်ကံၚ်ဇြဳပၞာန်ဝွံ သွက်ဂွံကလေၚ်အုပ်ဓလီုသီကေတ် ဒေသၜါသွာၚ် မၞုံပွိုၚ်ဍုၚ်ကျာ်မြဟ် တွဵုရးဍုၚ်မန် မဒးဗလးလဝ်တဲဂှ်ကဵု ညံၚ်ပၞာန်ဟွံၜက်ၜေတ်ကၠုၚ် လ္ပာ်မတ်မလီုဂှ်တုဲ ဖျေံဂလိုၚ်ပ္တိုန်လဝ် ဇြဟတ်ဒပ်ဗွဲမဂၠိုၚ်ဂၠေၚ်ဂှ် ဂွံတီကေတ် နူကဵုပရိုၚ်တမ်ရိုဟ်ဒေသတံရ။
ဗ္ဒိုပ်သၞေဟ်ကၚ်ဒဒန်ၜါသွာၚ် မဒှ်ဂၠံၚ်ဆက်စၠောံလဝ် တွဵုရးကရေၚ်ကဵု တွဵုရးဍုၚ်မန်ဂှ်သၟးဟွံက သီုကဵုဒှ်ဒၞါဲပၟိက်ဇၞော် လ္ဂောံကဵုဗျူဟာပရေၚ်ပၞာန် ကံၚ်ဇြဳပၞာန် မဖျေံလဝ်ဒပ်ဂှ် ပ္ဍဲဂိတုနဝ်ဝေမ်ဗာ ၁၃ တေံ ဂကောံပံၚ်ကောံပၠန်ဂတးတံ ဗ္တိုက်သီဂွံလဝ်ရ။
ကြဴနူဒးဗလးလဝ်တဲ ဗ္ဒိုပ်ၜါသွာၚ်တုဲဂှ် ဒပ်ကံၚ်ဇြဳပၞာန်ဝွံ သွက်ဂွံကလေၚ်သီဂွံ ဗ္ဒိုပ်ဏံဂှ် လၟေၚ်ဒဒှ်တ္ၚဲ ပန်ပှော်လဝ် ပ္ဍဲကဵုကွာန် မၞုံပ္ဍဲဒေသၜါသွာၚ်တံ နကဵုလွဟ်ဇၞော် ကေုာံ သီုကဵုက္ၜၚ်ကျာတံဂှ်တုဲ ညးဍုၚ်ကွာန်ကောန်အရာပ်တံ ဇီုကပိုက်ချိုတ် ကေုာံ စမြိုၚ်သ္ၚိဒၟံၚ်တံ ဇီုကပိုက်လီုလာ်တံ နွံလဝ်ရ။
သ္အာၚ်နူဂှ်ပၠန် နူကဵုဗလးတိဏံမွဲကဆံၚ် ကရောၚ်ပၞာန်ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန်ဂှ် ဂကောံပံၚ်ကောံ ဂကောံဇြဟတ်ပၠန်ဂတးတံ ဘိုၚ်ကၟာတ်လဒဵု ဗ္တိုက်ဖလှေက်လဝ်ဂှ် လ္ပာ်ဒပ်ကံၚ်ဇြဳပၞာန် ဒးဂိလဝ်တုဲ ပရေၚ်ချိုတ်ဂျိုၚ်တံလေဝ် ဂၠိုၚ်လဝ်တုဲ ဖျေံလွဟ်ဒုၚ်ကျတံလေဝ် နွံလဝ်ရ။
ပ္ဍဲဂိတုနဝ်ဝေမ်ဗာ ၂၆ ဂှ် လ္ပာ်ကွာန်တၟံဗြဴ၊ ကဒါ ကေုာံ (ဖနုံ) ဒၞါဲဗ္ဒိုပ်ဒပ်မၚ်ပယျဵု ကေုာံ ဗ္ဒိုပ်ဗၠာဲသၟိၚ်တိဍာ် သၟဝ်တဲကံၚ်ဇြဳပၞာန် ဗ္ဒါဲဒေသၜါသွာၚ်တံမၞုံဂှ် ဒပ်ကံၚ်ဇြဳပၞာန် စိုပ်ကၠုၚ် ဇြဟတ်ဗွဲမဂၠိုၚ်ဂၠေၚ်ရ။
ပ္ဍဲကဵုဒပ်ကံၚ်ဇြဳပၞာန် မစိုပ်ကၠုၚ် အပ္ဍဲဒေသ ၜါသွာၚ်ဂှ် မ္ၚးနူကဵုဒပ် နူကဵုရးသက်ကိုၚ်တံဂှ် ဂကောံဒပ်ဂဥုဲ၊ ဒပ်ပလံၚ်ဇွောံမ ကေုာံ ဒပ်အမၠံက်တံလေဝ် ပါလုပ်တုဲ ဇြဟတ် ၄၀၀ ပြၚ် နွံဂှ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ဗလးတိတံရ။
ဒပ်ကံၚ်ဇြဳပၞာန် မပပဵုပ္တိုန်လဝ် ဇြဟတ်ဂှ်ဝွံ ပ္ဍဲကဵုကွာန်ကဒါ၊ တၟံဗြဴ၊ ဥူလေဝ်၊ ယျေဝ်မန်၊ ဂူၜဴ ကေုာံ ကွာန်ဖနုၚ်တံဂှ် ကေတ်လဝ်ဒၞါဲဖျေံလဝ်ဒပ်တုဲ ပ္ဍဲကဵုကွာန်ကဒါဂှ်မ္ဂး အမၠံက်လွဟ်ဇၞော် ဟွံအောန်နူကဵု ၃ ဇကိုအ် ဗ္ဂပ်စုတ်လဝ်ဂှ် ညးဒေသတံ သ္ဂးလဝ်ရ။
ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုကွာန်တံဂှ်ဝွံ ညးဒေသတံ ညံၚ်ဂွိုအ်ကၠုၚ် ဗ္ဒါဲဗ္ဒိုပ်ဍေံတံဂှ်ကီု၊ ယဝ်ရတိတ်မ္ၚးကွာန်မ္ဂး ပပ္တံနူကဵု ဒၞါဲမအာတံကဵု အခိၚ်ကလေၚ်စိုပ်တံဂှ် ထ္ပက်စၟတ်တဲတုဲ မ္ဒးအာကၠုၚ်ရောၚ်ဂှ် ဟီုလဝ်ကဵု ညးဒေသတံရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ပ္ဍဲကဵုကွာန် ပွန်ပၞာန်ဟွံသေၚ်တံဂှ် ဟိုတ်နူကၠောန်သ္ပဒၟံၚ် ပရေၚ်ပန်ပှော် နူကဵုဒပ်အမၠံက်မုဟ်ဍုၚ်၊ ဗ္ဒိုပ်ကဒါ၊ ဗ္ဒိုပ်တၟံဗြဴတံ လၟေၚ်တ္ၚဲဂှ်ရ ညးဍုၚ်ကွာန်ဒေသ ဂၠိုၚ်ကဵုဠက် ဟွံအောန်နူကဵု ၆ ကွာန်ဂှ်ဝွံ ဒးပါဲဒလေတ်လဝ် အလုံကွာန်မွဲတုဲ နွံပၟိက်ဒၟံၚ်ကဵု အရီုဗၚ်တံရောၚ်ဂှ်လေဝ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai