ဒး၊ ဗၠေတ်
မ္ၚဵုရအဴ။
ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရအဴ။
တ္ၚဲဏံ ပရူပရာ ရဲထံက်ဂလာန်ဒပ်ပၞာန်တံ မတြးဒၟံၚ် “ကောန်ပၞာန် နူကဵုဒပ်ပၞာန် ပစူအလာံဗုတုဲ ဖျေံလဝ်လွဟ် အပ္ဍဲပေါဲဗ္တိုက်တံဂှ် ကြဴမတ်ဏံ ကၠောန်သ္ပပန်ဂစိုတ်ဒၟံၚ်” ဂှ် စၟဳတ်ကဵုအာရောၚ် မဒှ်ရ။
ပရူပရာဏံဂှ် ပ္ဍဲဂိတုဒဳဇြေမ်ဗာ ၄ တေံ နူကဵုအကံက်ထလဳဂရာမ် မှိုၚ်ဝေ၊ Kyaw Swar လေပ်တြးကၠေံဝါဒ ဗွဲမဂၠိုၚ်ဂှ် စတြးကၠုၚ်လဝ်ရ။ စပ်ကဵုပရူပရာ မပါလုပ်ပ္ဍဲပသ်ထ်ဂှ်တုဲ နူကဵုသြၚ်လောန်တိုၚ်(မ်) စၟဳစၟတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ်တြးဝါဒမွဲဂှ် စၟဳတ်ဂွံဆဵုကေတ်ရ။
လၟေၚ်ဒဒှ်ဍာံဂှ် ဒပ်မဟာမိတ်သ္ကုတ်သၟတ်ကျာဂမၠိုၚ် မဒက်ပ္တန်လဝ် နကဵုဒပ်ကဝ်က MNDAA, ဒပ်ရခေၚ် AA ကေုာံ ဒပ်တအာၚ် TNLA တံ ပါလုပ်သီုကဵု ဂကောံဒပ်ရပ်လွဟ်ကောန်ဍုၚ်အရၚ်တံသီုဖအိုတ် ကဵုလဝ်ကတိ ထိၚ်ဒက်မၚ်မွဲအာ ကောန်ဒပ်ကံၚ်ဇြဳပၞာန် ပစူအလာံဗု ဒုၚ်ကျဖျေံလဝ်လွဟ်တံ ဗွဲမကိတ်ညဳကဵုသၞောဝ်ဂၠုဲပၞာန် မပ္တံကဵု ဒုၚ်လျိုၚ် ကုပရေၚ်ဂီုကၠီု အန္တရာယ်လမျီုတံဂှ်ကီု၊ ထိၚ်ဒက်မၚ်မွဲကဵု ဂုဏ်သိက္ခာမၞိဟ်၊ ဂုဏ်သိက္ခာကောန်ပၞာန်တံဂှ်ကီု၊ သွက်ဂွံဂွံအခေါၚ်ဆဵုဂဗ ကုဂြောဝ်ဂတာမသကလောကောဒေံဂမၠိုၚ် ကေုာံ လွဳလွတ်ကဵု မသက္ကုၚုဟ်တံ ဒှ်တမ် မဒှ်ရ။
ပ္ဍဲဂိတုနဝ်ဝေမ်ဗာ ၁၂ တေံ ကောန်ပၞာန်ဂမၠိုၚ် ကေုာံ ကောန်ဇာတ်ဂြောဝ်ဂတာဒပ်ပၞာန် နူကဵုတမ်ဒပ် သၟဝ်သ္ကိုပ်သ္က သ္ကိုပ်တမ်ဒပ် သ္ကိုပ်ဗိုလ်ကျဝ်ယျေဝ်အံၚ် နူကဵုခမရ (၁၂၉) ကံၚ်ဇြဳပၞာန် ဖျေံသ္ဇိုၚ်လံက်ကိုၚ် ဇြဟတ် ၁၂၇ ပါဂှ် လုပ်စိုပ်ဖျေံကၠုၚ်လွဟ်တုဲ မွဲတၠမ္ဂး ၁၀ ကိုဋ်ဒ္ကေဝ်၊ ကောန်ဇာတ်ဒပ်ပၞာန်တံ မွဲတၠမ္ဂး နကဵု ၁ ကိုဋ်ဒ္ကေဝ်စၟအ်အ်၊ ဒၞါဲမိက်ဂွံအာတံဂှ်လေဝ် ညံၚ်ဂွံအာ ဗွဲမဗၠးဘဲမာန် ရီုဗၚ်ကဵုလဝ်ရောၚ် ပ္ဍဲဂိတုနဝ်ဝေမ်ဗာ ၁၄ တေံ ဒပ်မဟာမိတ် သ္ကုတ်သၟဝ်ကျာတံ လလောၚ်ပ္တိတ်လဝ်ပရိုၚ် ပ္ဍဲဂိတုနဝ်ဝေမ်ဗာ ၁၄ ဂှ် စၟဳတ်ဂွံဆဵုကေတ်ရ။
နနဲသာ်ဂှ်ကီု အခိၚ်ဂကောံဒပ်ပၠန်ဂတးတံ ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်သီ ဗ္ဒိုပ်ဒပ်ကံၚ်ဇြဳပၞာန် လ္တူဍုၚ်မုၚ်၊ ခရိုၚ်ညံၚ်လေဝ်ပေန်၊ တိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် ကောန်ဒပ်ကံၚ်ဇြဳပၞာန် ဗၞတ် (၁၉) တၠ ဖျေံလဝ်လွဟ်တုဲ ကောန်ဇာတ်ဂြောဝ်ဂတာ (၄၂) တၠ မၞုံအပ္ဍဲဒပ်တံဂှ်လေဝ် မၚ်မွဲထိၚ်ဒက်ကဵုလဝ် ဗွဲမကိတ်ညဳကဵုသၞောဝ်ဂၠုဲပၞာန်တံ ခိုဟ်ဟ်ဂေါဝ်ဝ်ဂှ် စၟဳတ်ဂွံဆဵုကေတ် အတိုၚ်တၚ်လလောၚ်တြး KNU ပ္ဍဲဂိတုဒဳဇြေမ်ဗာ ၆ တေံရ။
KNU လလောၚ်ပ္တိတ်လဝ်ပရိုၚ်ဂှ်
The Kokang ပ္တိတ်လဝ်ပရိုၚ်ဂှ်
ဌာန်ပရိုၚ် DVB ထ္မံက်ပ္တိတ်လဝ်ဂှ်
ဟိုတ်နူတၚ်နၚ်တံဏံတုဲ ပရိုၚ်ဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ်ညံၚ်ကဵု” ကောန်ပၞာန် နူကဵုဒပ်ပၞာန် ပစူအလာံဗုတုဲ ဖျေံလဝ်လွဟ် အပ္ဍဲပေါဲဗ္တိုက်တံဂှ် ကြဴမတ်ဏံ ကၠောန်သ္ပပန်ဂစိုတ်ဒၟံၚ်” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။
သြၚ်လောန်တိုၚ်(မ်)