ဝါကပိုဟ်၊ ဒဳဇြေမ်ဗာ ၂၉
ဌာန်ကောံသၟတ်မန်ကီု ဂကောံပၠန်ဂတးမန်တံကီု ဖ္တိုက်ဖ္အောဝ်လဝ် သၟတ်မန် က္ဍိုပ်သ္ကိုပ်အနာဂတ်တံ သွက်ဂွံယိုက်ဂၠေၚ်တာလျိုၚ်ပရေၚ်ဂကူဂှ် ပ္ဍဲဂိတုဒဳဇြေမ်ဗာ ၂၈ တ္ၚဲသၟတ်မန် အလန်ဒွါဒသမဂှ် လလောၚ်ပ္တိတ်လဝ် တၚ်လလောၚ်တြးရ။
ဒုၚ်သ္ဇိုၚ်ကဵု သၟတ်မန် ညးလေပ်ပညာဂတာပ်ခေတ်ဂမၠိုၚ် ကောံတုဲကၠောန်ဗဒှ်လဝ် ကောံဓရီုသၟတ်မန် ပ္ဍဲသၞာံ ၁၉၄၆ ဂိတုဒဳဇြေမ်ဗာ ၂၈ ဂှ်တုဲ နူကဵုပေါဲဆဵုဂဗသၟတ်မန် စကၠုၚ်လဝ် ပ္ဍဲသၞာံ ၂၀၁၂ ဂှ် ကၠောန်ဗဒှ်ကၠုၚ်တ္ၚဲသၟတ်မန်ဂှ် ပေၚ်ကၠုၚ် ၁၂ သၞာံယျ။
အသေအဟာန်တ္ၚဲသၟတ်မန် အလန်ဒွါဒသမဂှ် နူကဵုဌာန်ကောံသၟတ်မန် မချဳဒရာၚ်ဒၟံၚ် သွာၚ်မဆက်စပ်ကဵု ပရေၚ်သၟတ်မန်တံ သ္ကိုပ်သ္ကတုဲ ကၠောန်ဗဒှ်လဝ် ပ္ဍဲကဵုကွာန်ဝါကပိုဟ်၊ ပွိုၚ်ဍုၚ်ပံၚ်၊ တွဵုရးဍုၚ်မန်ရ။
တ္ၚဲသၟတ်မန်ဝွံ ဒှ်တ္ၚဲစၟတ်သမ္တီ သွက်သၟတ်မန်တံတုဲ အလုံသၟတ်မန်တအ် ညံၚ်ဟွံဂွံစောဲလာမ်ကဵု ဂဥုဲၜူမာဲ၊ ပေၚ်အာယုက် ၁၈ မ္ဂး တိုန်ဘာပၞာန်အိုတ်ညိဂှ် ဌာန်ကောံသၟတ်မန် ဖ္တိုက်ဖ္အောဝ်ဆဝ်မ္ၚုဟ်လဝ်ရ။
ဗော်ဍုၚ်မန်တၟိ မဒှ်ဂကောံပၠန်ဂတးဝှ်ကြံၚ်ဂှ် အနာဂတ်ဂတတေံ ဂကူမန်ညံၚ်ဟွံဂွံကၠေံကၠက်အာကီု၊ အခေါၚ်အရာဂကူပိုယ် ပိုယ်ညံၚ်သ္ဂောံဖန်ဇန်အာမာန်ကီုဂှ် တန်တဴဒၟံၚ် လ္တူသၟတ်တအ်ရောၚ်ဂှ် ထ္မံက်ထ္ၜးလဝ် ပ္ဍဲကဵုလိက်သဝဏ် ပလံၚ်ဗစိုပ်လဝ်တ္ၚဲသၟတ်မန် ဥက္ကဌဗော် နာဲဟံသာ ထ္ပက်လဝ်စၟတ်တဲဂှ်ရ။
သၟတ်မန်ဗွဲမဂၠိုၚ်တအ်ဂှ် တိတ်အာဍုၚ်သ္အာၚ် ဂၠါဲပိုန်ဒြပ်ဂၠိုၚ် ဗွဲမလောန်တုဲ သၟတ်သှ်ေဒၟံၚ်ပ္ဍဲကွာန်ဗွဲမဂၠိုၚ်တအ်ဂှ်လေဝ် မိပ်မံၚ်ကဵု ဂဥုဲၜူမာဲ၊ တၞးဘိၚ်တံတုဲ မၞိဟ်ကၠောန်ပရေၚ်ဍုၚ်ကွာန် အောန်မံၚ်ရောၚ်ဂှ် ထံက်ထ္ၜးလဝ်ရ။
ဟိုတ်ဂှ်ရ ညံၚ်ဂကူဇကု ဂွိုအ်ကၠေံကၠအ်အာကီု၊ ညံၚ်သ္ဂောံဇၞော်မောဝ်ပြာကတ်အာကီုဂှ် တာလျိုၚ်သၟတ်မန်တံနွံဂှ်ကီု၊ ဒှ်ဂကူမန်တုဲ သွက်ဂွံယိုက်ဂၠေၚ်အာပရေၚ်ဂကူအိုတ်ဂှ် နာဲဟံသာ ဖ္တိုက်ဖ္အောဝ်ဆဝ်မ္ၚုဟ်လဝ်ရ။
ဗော်ဍုၚ်မန်တၟိဝွံ ဒှ်ဂကောံရပ်လွဟ်ကောန်ဍုၚ်အရၚ် ကၠောန်ကၠုၚ်ပရေၚ်ပၠန်ဂတး ကဵုစှော်သၞာံတုဲ အပ္ဍဲပရေၚ်ပၞာန်သီအဝဵုဏံ ဟိုတ်နူကေမ်ၛှာပ်လဝ်မူ ပြသၞာပရေၚ်ဍုၚ်ကွာန် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ်တုဲ ဟွံပါလုပ်ကၠုၚ်လဝ် ပ္ဍဲကဵုပေါဲဗ္တိုက်ပၠန်ဂတးရပ်လွဟ်တံဂှ်ရ။
နာဲမန်သာၚ် ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန်ဂှ် အခေါၚ်စၞောန်ပျးအပိုၚ် ကေုာံ အခေါၚ်ကလေၚ်ပ္တန်ဍုၚ်မန်ဂှ်ဝွံ ဟိုတ်နူအာတ်ကေတ်ကဵုတဲဟွံဂွံဂှ်ရ အလုံသၟတ်မန်တအ် သွက်ဂွံလုပ်စိုပ် ပ္ဍဲပၠန်ဂတးနတဲအိုတ်ဂှ် နွံပၟိက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခေါၚ်စၞောန်ပျးအပိုၚ် အခေါၚ်ကလေၚ်ပ္တန်ဍုၚ်မန်တံဟီုဂှ် အာတ်ကေတ် နကဵုတဲပိုယ်တံဟွံဂွံပုဟ်။ တုဲပၠန် ပ္ဍဲကဵုပေါဲသဳကၠဳပရေၚ်ၜိုဟ်လလမ်ဂှ်လေဝ် ပိုယ်တံ တတ်ထ္ပာ်ကၠုၚ် ဂၠိုၚ်ၚ်ကဵုဝါရ။ အဏံဂှ်လေဝ် အခေါၚ်စၞောန်ပျးမန်တံ၊ အခေါၚ်ကလေၚ်ဒက်ပ္တန်ဍုၚ်မန်တံ အခေါၚ်ဒက်ပ္တန်ကၟိန်ဍုၚ်ဖေဝ်ဒရာတံဂှ် အလဵုအသဳအဆက်က်လဵုမွဲမှ ကဵုလဝ်ဟွံမွဲပုဟ်။ ဟိုတ်ဂှ်ရ ပိုယ်တံသီုဖအိုတ် နွံပၟိက်ဒးလုပ်စိုပ်ကၠောန်ၜိုတ် ပ္ဍဲပၠန်ဂတးနတဲဏံဂှ် မိက်ဂွံဗ္ကန်စ သၟတ်မန်တအ်ရ“ သာ်ဝွံ သ္ဂးရ။
လ္ဂောံကဵုအကာဲအရာပၠန်ဂတးလၟုဟ်မ္ဂး အလုံသၟတ်မန်မွဲ ညံၚ်ဂွံကောံကလောံဂှ် ပၟိက်ဇၞော်တုဲ ဒပ်ပၞာန်ဗၟာ ဒှ်သၞတမ်ကဝ်မန်ဂှ် နကဵုသၟတ်မန် ဗွဲမဗဗွဲကဵုဒၞါဲညးကုညး ညံၚ်ဂွံလုပ်အာပေါဲဗ္တိုက် မွဲစွံဂှ် ကံၚ်ဇြဳဖေဝ်ဒရာဍုၚ်မန် ဖ္တိုက်ဖ္အောဝ်လဝ်ရ။
ကံၚ်ဇြဳဖေဝ်ဒရာဍုၚ်မန်ဝွံ ဒက်ပ္တန်လဝ် အပ္ဍဲကာလပၞာန်သီအဝဵုဏံတုဲ ပ္ဍဲကဵုကၟိန်ဍုၚ်ဖေဝ်ဒရာဒဳမဝ်ကရေဇြဳအနာဂတ်တေံ ညံၚ်ဖေဝ်ဒရာယူနေတ်ဍုၚ်မန် ဂွံမံက်ဂတဝ်ကၠုၚ် ဒှ်ဂကောံပၠန်ဂတး မပ္တိတ်ဒၟံၚ်ဇြဟတ်မွဲရ။
နာဲပညာမာန် ညးဒုၚ်တာလျိုၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်လေဝ် သွက်ဂွံထ္ၜးပျး နဒဒှ်ဂကူဗၠးၜးမွဲမာန် သၟတ်မန်တံ ဒးၚုဟ်က္တဵုဒၟံၚ်ပရေၚ်ဍုၚ်ကွာန်တုဲ ဒးဂံၚ်ပၠန်ဂတးဂှ်လေဝ် နွံပၟိက်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပၠန်ဂတးက္ညၚ်လၟုဟ်ဂှ် ဒှ်ပၠန်ဂတး စကၠုၚ်လဝ် နကဵုသ္ကိုပ်သ္ကသၟတ်တံရဏောၚ်။ ဟိုတ်ဂှ်တုဲ လညာတ်အဲဂှ်တှ်ေ ပ္ဍဲအခန်ကဏ္ဍပၠတရဴပရေၚ်ဍုၚ်ကွာန် ဍုၚ်မန်အနာဂတ်ဂတဏံဂှ် သၟတ်တံသၟးဟေၚ် ဒးနွံထေက်ဂှ် ညာတ်ကေတ်ရ။ ဒးဒက်ပ္တန် ဍုၚ်မန်အနာဂတ်တေံ နကဵုပွသ္ကိုပ်သ္က သၟတ်တံရဏောၚ်။ ဟီုတှ်ေ မွဲလ္ပာ်ဂှ်လေဝ် သၟတ်မန်တအ် ဒးၚုဟ်က္တဵုဒၟံၚ်ပရေၚ်ဍုၚ်ကွာန်ဏောၚ်။ ပိုယ်တံဂှ် ဒှ်ဂကူဗၠးၜး သွက်ဂွံထ္ၜးပျးမာန် ဒးၚုဟ်က္တဵုဒၟံၚ် ပရေၚ်ဍုၚ်ကွာန်လၟိုန်ဏောၚ်။ သ္အာၚ်နူဂှ်ပၠန် ပိုယ်တံဂှ် ဒးဂံၚ်ပၠန်ဂတးဏောၚ်“ သာ်ဝွံ သ္ဂးရ။
အခိၚ်လၟုဟ် ဒှ်အခိၚ်ဒပ်ပၞာန် အုပ်ဓလီုကၠုၚ်သၞာံဗွဲမလအ်လကာဖာ နကဵုဝါဒမဟာဂကူ အခိၚ်ဇြဟတ်ဍိုန်လျတုဲ သွက်ဂွံဗ္တိုက်ကေတ် အခေါၚ်စၞောန်ပျးအပိုၚ်ဇကုတံဂှ် ဒှ်အခိၚ်ခိုဟ်ရောၚ် ဇြဟတ်ရာမညဖေဝ်ဒရာခေတ်တၟိ ထံက်ထ္ၜးလဝ်ရ။
ဟိုတ်ဂှ်ရ အလုံသၟတ်မန်တအ် ကောံကလောံတဴ သၟဝ်တိုၚ်ပ္ကဴ သ္ဂောံဂွံအခေါၚ်စၞောန်ပျးအပိုၚ်တံဂှ်တုဲ ဒှ်အခိၚ်နွံပၟိက် ဒးလုပ်ပေါဲဗ္တိုက်တံဂှ်ရ သွက်ဂွံဗ္တိုက်တဝ်စၞေဟ် ကံၚ်ဇြဳပၞာန် ဒှ်သၞတမ်ကဝ် သွက်ပရေၚ်ဗၠးၜးဂကူ မွဲစွံအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai