ပ္ဍဲကျာ်မြဟ် တွဵုရးဍုၚ်မန် ပေါဲဗတိုက်သ္ကာတ်မြဟ်၊ ပရေၚ်ဇီုကပိုက်ချိုတ်ဂျိုၚ် နွံဒၟံၚ်သီုၜါလ္ပာ်

ကျာ်မြဟ်၊ ဒဳဇြေမ်ဗာ (၃၀)

ပ္ဍဲဒေသၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ်လဝ်တုဲ ပရေၚ်ဇီုကပိုက်ချိုတ်ဂျိုၚ် နွံဒၟံၚ်သီုၜါလ္ပာ်နွံရဂှ် ဂွံတီကေတ် အတိုၚ်တံရိုဟ်ပရိုၚ် ဗလးမုက်တိ ဌာန်ပရိုၚ်သြၚ်လောန်တိုၚ်မ်တအ်ရ။

ပေါဲဗတိုက်ဏံဂှ် ဂကောံဇြဟတ်ပၠန်ဂတးတအ် ဗိုၚ်ကၟာတ်ဒၞာလဝ် ဒပ်ကံၚ်ဇြဳပၞာန် သွက်ဂွံကဵုပၞာန်ရီု ဇရေၚ်ဗဒိုပ်ဗၠာဲသၟိၚ်ၜါသွာၚ် ဟိုတ်နူထ္ပက်ကရောၚ်ပၞာန် နဇြဟတ်ပေၚ်ၚ်တုဲ စဵုကဵုစိုပ်ဂိတုဒဳဇြေမ်ဗာ စၟတ်တ္ၚဲ (၂၈) အခိၚ်နူဂယးဂှ် ပေါဲဗတိုက်ၜါလ္ပာ် သ္ကာတ်မြဟ်လဝ်ရ။

ရမျာၚ်ပန်ပှော်လွဟ်ဇၞော် ပ္ဍဲကဵုပေါဲဗတိုက်ၜါလ္ပာ် ၜါသွာၚ်တအ်ဂှ် စဵုကဵုက္လၚ်ဟွံမာန် ဂွံမိၚ်လဝ် ကြပ်ဒှ်သီုအလုံမွဲတ္ၚဲတုဲ တိလေဝ် သီုချဳပ္ညဝ်လဝ်တုဲ ပ္ဍဲအခိၚ်ဒေါဝ်တ္ၚဲ တ္ၚဲဏံ ပေါဲဗတိုက် က္လေၚ်ညိၚ်ဝတ်အာရဂှ် ဂွံတီကေတ် အတိုၚ်ညးဒေသတအ် ဟီုထ္ၜးလဝ်ရ။

ပ္ဍဲပေါဲဗတိုက်ၜါသွာၚ်ဂှ် ကောန်ဒပ်ကံၚ်ဇြဳပၞာန် ဟွံအောန်နူ (၂၀) တၠ ဇီုကပိုက် ဒးချိုတ်လဝ် နွံမာန်တုဲ ကၠုၚ်ပ္ဍိုက်ကေတ်ဏာလဝ် ကောန်ဒပ်ကံၚ်ဇြဳပၞာန် ဒးလဝ်ဘဲဝပ်တအ် နကဵုကွဳစက်ပ္ဍိုက်ညးယဲ (၂) ဖ္ဍိုက်၊ ကွဳစက်သၠာ (၆) ၁ ဖ္ဍိုက် ကေတ်ဏာလဝ် လ္ပာ်မုဟ်ဍုၚ်ရဂှ် တံရိုဟ်ပရိုၚ်ဗလးမုက်တိတအ် ဟီုကဵုဌာန်ပရိုၚ်သြၚ်လောန်တိုမ်ရ။

ပ္ဍဲကဵုအကံက်တေဝ်လဳဂရာမ် ဠဝ်ဗဳဒပ်ပၞာန်တအ်ဂှ် ဗဒိုပ်ဗၠာဲသၟိၚ်ၜါသွာၚ် ဒးဒုၚ်ကၟာတ်ဒၞာလဝ် ပွိုၚ် (၅၀) တ္ၚဲဂှ် ဒပ်ကံၚ်ဇြဳပၞာန် က္လေၚ်ထိၚ်ဒဝ်မာန်လဝ်ရဂှ် ဓမံက်ထ္ၜးလဝ် နွံတုဲ ပရေၚ်ဇီုကပိုက်ဒးလဝ်ဂှ်မ္ဂး ဓမံက်ထ္ၜး လလောၚ်တြးလဝ် မမိက်ကဵုမွဲမွဲ ဟၟဲဏီရ။

စပ်ကဵုအကာဲအရာပေါဲဗတိုက်ၜါသွာၚ်ဏံတုဲ ၜိုန်ရသြၚ်လောန်တိုၚ်မ် ဆက်စၠောံသၟာန်လဝ် ကရောၚ်ပၞာန်ပံၚ်ကောံ ပါလုပ်သီုဒပ်မဟာ (၆) ဒပ်ပၞာန်ဗၠးၜးကောန်ဂကူကရေၚ် KNLA ကီုလေဝ် စဵုကဵုလၟုဟ်ဏံ ကေတ်အဆက် ဟွံဂွံဏီရ။

ပ္ဍဲကဵုပေါဲဗတိုက်ၜါသွာၚ်ဂှ် ဒပ်ကံၚ်ဇြဳပၞာန် ဇြဟတ်နွံ (၃၀) ပြၚ် လုပ်ကၠုၚ်ပ္ဍဲကွာန်မတေဲ ညးဍုၚ်ကွာန်တအ် ဂြိပ်တိတ်လဝ် သီုအလုံကွာန်မွဲဂှ်တုဲ လုပ်ကေတ်ဏာလဝ် ကပေါတ်နွံၚုဟ်မး ပ္ဍဲသ္ၚိဌာန်ညးဒေသတအ်တုဲ ပ္ဍိုက်ကေတ်ဏာ ကဵုကွဳစက်သၠာ (၆) ရဂှ် ဂွံတီကေတ် နူညးဂွံဆဵုညာတ်ကေတ်လဝ် နမတ်တအ်ရ။

ပ္ဍဲကဵုပေါဲဗတိုက်ၜါသွာၚ် က္တဵုဒှ်လဝ် လအ်ပွိုၚ် မွဲဂိတုပြၚ်ဂှ် ပါလုပ်သီုသ္ကိုပ်တံဒပ် ဒုသ္ကိုပ်ဗိုလ်ဇၞော် မျိုဝ်ကိုဝ်ကိုဝ်ဝေန် ကောန်ဒပ်ကံၚ်ဇြဳပၞာန် ဒးချိုတ်လဝ် ဗ္ဒာဲ (၄၀) တုဲ မၞိဟ်ထံက်က္ၜံၚ်ဖျေံလဝ်လွဟ် နွံ (၃၂) တၠရဂှ် ဂကောံဇြဟတ်ပၠန်ဂတးတအ် လလောၚ်တြးလဝ်ရ။

ဟိုတ်နူပေါဲဗတိုက်ၜါသွာၚ်တုဲ ကောန်ဒေသညးဍုၚ်ကွာန်ကျာ်မြဟ် ၜါဠက်ပြၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဂြိုပ်ဒဵု ဒၞာဲကြပ်ညောန်တအ်ကဵု ဒၞာဲဌာန်ဗၠးဘဲတုဲ နွံဒၟံၚ်ပၟိက်အရီုဗၚ်ဗ္စာရဏာပရေၚ်မၞိဟ်ဖိုဟ်ရဂှ် ဂွံတီကေတ် နူဇရေၚ်ညးရီုဗၚ်မၚ်မွဲဘဲပၞာန်တအ်ရ။

ပရိုၚ် – သြၚ်လောန်တိုၚ်မ်

ဗီု – SAC Telegram