PDF ဒေသ လုပ်ဗတိုက်လဝ် သၞေဟ်ကၚ်တိုဝ်ဂုက်ဗိက်၊ ရပ်ဂွံလဝ် (၄) တၠ

ဗိက်၊ ဒဳဇြေမ်ဗာ (၃၀)

သၞေဟ်ကၚ်တိုဝ်ဂုက်ကံၚ်ဇြဳပၞာန် ကံက်ကေတ်ဒၟံၚ်သြန် မၞုံကွာန်တဂါန်၊ ပွိုၚ်ဍုၚ်ဗိက်၊ ရးဒေသတၞၚ်သြဳဂှ် ဂကောံစဵုဒၞာညးဍုၚ်ကွာန် ပံၚ်ကောံတအ် လုပ်ဗတိုက်လဝ်ရဂှ် ဂကောံစဵုဒၞာညးဍုၚ်ကွာန် (ပကဖ) ပွိုၚ်ဍုၚ်ကျောန်သု လလောၚ်တြးလဝ်ရ။

သၞေဟ်တိုဝ်ဂုက်ဂှ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈) အခိၚ်ဗ္တံ ၜိုတ် (၁၂) နာဍဳ ဂကောံစဵုဒၞာညးဍုၚ်ကွာန် ပံၚ်ကောံတအ် လုပ်ဗတိုက်လဝ်တုဲဂှ် စံၚ်ပလီုဏာလဝ်ရ။

ပ္ဍဲပရေၚ်လုပ်ဗတိုက်လဝ်တိုဝ်ဂုက်ဏံ ကောန်ဒပ်ကံၚ်ဇြဳပၞာန် ဂြိပ်ဗၠးတိတ်အာ (၁) တၠတုဲ ရပ်ဂွံလဝ် (၄) တၠရဂှ် ညးတာလျိုၚ်လလောၚ်ပရိုၚ် ဂကောံစဵုဒၞာညးဍုၚ်ကွာန် (ပကဖ) ပွိုၚ်ဍုၚ်ကျောန်သု ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ကောန်ဒပ်ကံၚ်ဇြဳပၞာန် ရပ်ဂွံလဝ် ၄ တၠဂှ် ဒှ်ကောန်ပၞာန်ကံၚ်ဇြဳပၞာန် ဟွံသေၚ်တုဲ ဒှ်ကောန်အရာပ် ညးဍုၚ်ကွာန် ကံၚ်ဇြဳပၞာန် လိၚ်လဝ်တုဲ ကံက်ကေတ်ဒၟံၚ်သြန်ရဂှ် ဂွံတီကေတ်ရ။

ကောန်အရာပ် ကောန်ဒပ်ကံၚ်ဇြဳပၞာန် ရပ်ဂွံလဝ် (၄) တၠတအ်ဂှ် စၟဳစၟတ်သၟာန်သၟုက်လဝ် အရာနွံပၟိက်တအ်တုဲ က္လေၚ်ဗလးကဵု လဝ်သီုကဵုကပေါတ်ကညောတ် ညးတအ်ပိုၚ်ပြဳရဂှ် ဟီုလဝ်ရ။

ပရေၚ်ဗတိုက်ပန်ဏံဂှ် ဂကောံစဵုဒၞာညးဍုၚ်ကွာန် (ပကဖ) ပွိုၚ်ဍုၚ်ကျောန်သု၊ ဂကောံစဵုဒၞာညးဍုၚ်ကွာန် တဝ်ပုမ်ဂျဳ (ပကဖ-တၞၚ်သြဳ)၊ ဒပ်ဒမၠုက်အယျုက်( အရိပ် ) (ပကဖ-ပလဝ်) ကေုာံ ကောန်ဒပ်ဂီုကၠီု ရးဒေသတၞၚ်သြဳတအ် ပံၚ်တောဲဗတိုက်လဝ်ရ။

ပ္ဍဲပွိုၚ်ဍုၚ်ဗိက်ဂှ် သ္ပတံနူဂိတုဏံတုဲ ဒပ်ကံၚ်ဇြဳပၞာန် ဇြဟတ်ဍိုန်လျစှ်ေကၠုၚ်ဒၟံၚ်ဂှ် ကဵုၚုဟ်လိၚ်တ္ၚဲတုဲ လိၚ်ကေတ်ဒၟံၚ် ညးဍုၚ်ကွာန်တအ် သွက်ပရေၚ်ဂီုကၠီုတုဲ ပ္ဍဲကဵုပွိုၚ်ဍုၚ်ကအ်သြံၚ်လေဝ် ကၠောန်သ္ပဒၟံၚ် တုပ်နဲဏံကီုရဂှ် ဂွံတီကေတ် အတိုၚ်ညးဒေသတအ် ဟီုထ္ၜးလဝ်ရ။

ပရိုၚ် – သြၚ်လောန်တိုၚ်မ်

ဗီု – Myeik PDF