ကောန်ဒပ်ကံၚ်ဇြဳပၞာန်မွဲတၠ လုပ်ကၠုၚ်ဖျေံလွဟ် ဇရေၚ် TNLA သီုလွဟ်လက်နက်မကမ်

လာယှိုဝ် – ဒဳဇြေမ်ဗာ (၃၀)

ကောန်ဒပ်ကံၚ်ဇြဳပၞာန်မွဲတၠ နူဍုၚ်လာယှိုဝ် ဒေသပၞာန်ဒပ်မဟာ ၆ ပွိုၚ်ဍုၚ်တအာၚ်၊ တွဵရးသေံသၟဝ်ကျာဂှ် လုပ်ကၠုၚ်ဖျေံလဝ်လွဟ် သီုကဵုလွဟ်လက်နက်မကမ်ရဂှ် TNLA လလောၚ်တြးလဝ် ပရိုၚ်ရ။

ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၈) တုဲကၠုၚ်တေံ ကောန်ဒပ် နူတံဒပ်ပၞာန်တိုက်ကံၚ်ဇြဳပၞာန်-၅၁၂ ရေၚ်တၠုၚ်ဒၟံၚ်ပရေၚ်ဂီုကၠီု ပ္ဍဲဍုၚ်လာယှိုဝ် နွံယၟုကိုဝ်ဟုၚ်မေန်ဥူ လုပ်ကၠုၚ်ဖျေံလဝ်လွဟ် ဇရေၚ် PSLF/TNLA ရဂှ် ဓမံက်ထ္ၜးလဝ်ရ။

ညးဂှ် ဟိုတ်နူဟွံဒးဂၞပ် ပရေၚ်အုပ်ဓုပ်ဒပ်ကံၚ်ဇြဳပၞာန်ကီု၊ ဟိုတ်နူမိက်ဂွံဒတူလာၚ် ကရောံမဟာမိတ်ကောဒေံသၟဝ်ကျာ သီုကဵုညးဍုၚ်ကွာန်တအ်ကီုတုဲ လုပ်ကၠုၚ်ဖျေံလဝ်လွဟ် သီုလွဟ် (၁) ဒကိုအ်၊ မကမ် (၂၀၀) ရဂှ် တိတ်ဟီုလဝ်ရ။

သ္အာၚ်နူဂှ်ပၠန် ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၈) တုဲကၠုၚ်တေံလေဝ် ကောန်ဒပ် နူခမရ ၃၂၆ ကံၚ်ဇြဳပၞာန် ဖျေံသ္ဇိုၚ်ကွာန်ကုမ်သုမ် ပွိုၚ်ဍုၚ်လာယှိုဝ် မွဲတၠ ဟိုတ်နူဟွံမိက်ဗတိုက်ပၞာန်တုဲ လုပ်ကၠုၚ်ဖျေံလဝ်လွဟ် ဇရေၚ် TNLA သီုလွဟ်လက်နက်မကမ်ဏီရ။

ကြဴနူမဟာမိတ်ကောဒေံ (၃) ဂကောံ ချဳဒရာၚ်လဝ် အပြုပြေၚ်ပၞာန်တုဲ လ္ပာ်သ္ကုတ်လကြဴဏံ ကောန်ဒပ်ကံၚ်ဇြဳပၞာန် ၆၀၀ ပြၚ် သီုအလုံတံဒပ်ကီု ပူဂဵုမွဲမွဲတၠကီု လုပ်ကၠုၚ်ဖျေံဒၟံၚ်လွဟ်တုဲ အတိုၚ်တၚ်ဂၞၚ် NUG မ္ဂး ကောန်ပၞာန် သီုကဵုဗၠာဲသၟိၚ် ပံၚ်တောဲလဝ်ကဵုညးဍုၚ်ကွာန် အပံၚ်လၟိဟ် စဵုကဵုဗ္ဒာဲ ၂၀၀၀၀ နွံကၠုၚ်ရဂှ် ဂွံတီကေတ်ရ။

PSLF/TNLA ဂှ်မ္ဂး နကဵုကောန်ပၞာန်၊ ဗၠာဲသၟိၚ် ကေုာံ ညးယိုက်ဒၟံၚ်ဝန် ပ္ဍဲဌာနနနာနာ မၞုံသၟဝ်တဲကံၚ်ဇြဳပၞာန်တအ် ဒတူလာၚ်လ္ပာ်ညးဍုၚ်ကွာန်တုဲ သွက်ဂွံလုပ်ကၠုၚ်ဖျေံလွဟ်ဂှ် ဗတိုက်ဖ္အောဝ်လဝ်ရ။

ပရိုၚ် – သြၚ်လောန်တိုၚ်မ်

ဗီု – PSLF/TNLA