ကရောၚ်ပၞာန် Lion Battalion ကၠုၚ်စိုပ်ပံၚ်တောဲတံဂှ် ကဵုအာတာလျိုၚ်ပေါဲဗ္တိုက်ဏောၚ် KNLA ဟီု

ကအ်ကြိက်၊ ဒဳဇြေမ်ဗာ ၃၀

ကရောၚ်ပၞာန် Lion Battalion Commando ဗိုလ်အေဝ်သေဝါ ကၠုၚ်စိုပ်ပံၚ်တောဲလဝ် ဇရေၚ်ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ်ဂှ် ကောပ်ကာဲစၞောန်ထ္ၜးကဵု ဗွဲမဗဗွဲကဵုစေဝ်ပၞောန်တံတုဲ သွက်ဂွံလုပ်ပေါဲဗ္တိုက် သၞောတ်တၠအဝဵုပၞာန်ဂွံသရိုဟ်စှ်ေအာမာန်ဂှ် ကဵုအာတလျိုၚ်ဏောၚ် ဌာန်ဂအုပ် ဒပ်မဟာ ၆ လလောၚ်ပ္တိတ်လဝ် နကဵုစၟတ်တ္ၚဲဂိတုဒဳဇြေမ်ဗာ ၂၈ ရ။

ကရောၚ်ပၞာန် Lion Battalion Commando ဗိုလ်အေဝ်သေဝါသ္ကိုပ်သ္ကဂှ်ဝွံ စနူဂိတုနဝ်ဝေမ်ဗာ ၆ တုဲကၠုၚ်တေံတုဲ ပြံၚ်လုပ်ကၠုၚ်လဝ် သၟဝ်ကောပ်ကာဲ ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ် KNLA ဗွဲမလုပ်သၞောဝ်တုဲ တာလျိုၚ်ပရေၚ်ပၞာန် မ္ဒးရေၚ်တၠုၚ်အာဂတနူဏံတံဂှ် ဗွဲမဗွဲကဵုသၞောဝ်သၞောတ်စေဝ်ပၞောန် ဒပ်ပၞာန် KNLA သွက်သၞောတ်တၠအဝဵုပၞာန်ဂွံသရိုဟ်စှ်ေအာဂှ် ဆက်လုပ်အာပေါဲဗ္တိုက် ကရောံဒပ်ပံၚ်ကောံဂမၠိုၚ်ဏောၚ်ဂှ် လလောၚ်ပ္တိတ်လဝ်ရ။

ဒဒှ်မကၠုၚ်စိုပ်ပံၚ်တောဲသာ်ဏံဂှ် နကဵုဒပ်မဟာ ၆ KNLA ဒုၚ်လဝ်တဲ ပ္ဍဲဂိတုနဝ်ဝေမ်ဗာ ၆ တုဲကၠုၚ်တေံဂှ်တုဲ ဆက်စၞောန်ထ္ၜးကောပ်ကာဲအာ ဗွဲမဗွဲကဵုသၞောဝ်စေဝ်ပၞောန် ကောန်ဒပ် KNLA တံ မ္ဒးဒ္ဂေတ်ဗက်တံဏောၚ်ဂှ် ပါလုပ် ပ္ဍဲတၚ်လလောၚ်တြး သ္ကိုပ်ဗျူဟာ ဒပ်မဟာ ၆ သဝ်နေဝ်ဒါထူဂှ်ရ။

သ္အာၚ်နူဂှ်ပၠန် ညံၚ်သၞောတ်တၠအဝဵုပၞာန် ကေုာံ မဟာဝါဒဂကူ ဂွံကၠေံဗ္ဒန်အာကီု၊ သွက်ကၟိန်ဍုၚ်ပံၚ်ကောံဖေဝ်ဒရာ ဒုၚ်သ္ဇိုၚ်ကဵုဒဳမဝ်ကရေဇြဳတုဲ မဒက်ပ္တန်အာတံ ဂွံမံက်ဂတဝ်ကၠုၚ်ဂှ် ကောန်ဂကောံဒပ်တၞဟ်သ္အာၚ်တံလေဝ် ကၠုၚ်စိုပ်ပံၚ်တောဲကဵု ကရောံဒပ်ပၞာန်ဗၠးၜးကောန်ဂကူကရေၚ် KNLA တုဲ သွက်ဂွံလုပ်ပေါဲဗ္တိုက်အိုတ်ဂှ် သ္ကိုပ်ဗျူဟာ ဒပ်မဟာ ၆ သဝ်နေဝ်ဒါထူ ဖ္တိုက်ဖ္အောဝ်လလောၚ်ပ္တိတ်လဝ်ရ။

ကရောၚ်ပၞာန် Lion Battalion Commando ဝွံ ကၠာတေံဂှ် ဒှ်ကရောၚ်ပၞာန် သၟဝ်တဲကဝ်တူလေဝ်အာမဳ KTLA သဝ်နေဝ်ဒါမျ သ္ကိုပ်သ္ကဒက်ပ္တန်လဝ်ဂှ်တုဲ ပ္ဍဲကဵုပေါဲဗ္တိုက် တွဵုရးကရေၚ်ကဵု တွဵုရးမန်တံဂှ် ပံၚ်တောဲကဵု ဂကောံဒပ်ပံၚ်ကောံမဟာမိတ်တံတုဲ ဒှ်ကရောၚ်ပၞာန် ပံၚ်တောဲဗ္တိုက်ဒၟံၚ်မွဲလေဝ် မဒှ်ရ။

နကဵုကရောၚ်ပၞာန် Lion Battalion Commando ပြံၚ်လုပ်ယိုက်ဂၠေၚ်တာလျိုၚ် သၟဝ်ကောပ်ကာဲ KNLA နူသၟဝ်တဲ KTLA ဂှ်တုဲ ခြာဟွံလအ်ဏံ ဒဒှ်ရ အလဵုဗိုလ်အေဝ်သေဝါ သောၚ်ကလးသှ်ကဵုအာဏောၚ်ဂှ် ကောန်သ္ဂံၚ်မွဲတၠ ညးဒုၚ်တာလျိုၚ် ကရောၚ်ပၞာန် Lion Battalion Commando ကဵုသမ္တီဟီုဂးလဝ်ရ။

ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်တဝ်နဳဂှ်လေဝ် စပ်ကဵုကရောၚ်ပၞာန် Lion Battalion Commando သၟဝ်သ္ကိုပ်သ္ကဗိုလ်အေဝ်သေဝါ ကၠုၚ်စိုပ်ပံၚ်တောဲ ဇရေၚ် KNLA သာ်ဏံဂှ်တုဲ ဒဒှ်ရဒုၚ်တၠုၚ်ဗွဲမမိပ်မြဟ်ဂှ်ကီု၊ ဂတဏံလေဝ် သွက်ဂွံပံၚ်တောဲရေၚ်တၠုၚ်အာ နကဵုဇြဟတ်ခိုဟ်နူဏံဂှ် နွံပၟိက်တၟာဂလိုၚ်ရောၚ် ဟီုဂးလဝ်ရ။

ဂိတုဨပရဴ သၞာံဏံဂှ်လေဝ် အလုံကရောၚ်ပၞာန်ဝဳနန်−Venom သၟဝ် KTLA မွဲဂှ်ဝွံ အာစိုပ်ပံၚ်တောဲလဝ် ဇရေၚ်ကရောၚ်ပၞာန်ကဝ်ဗရာ သၟဝ်သ္ကိုပ်သ္က ဒပ်မဟာ ၆ KNU ဂှ်တုဲ အပ္ဍဲပရေၚ်ပံၚ်တောဲဂှ် ပြံၚ်လှာဲဒက်ပ္တန်လဝ် ကရောၚ်ပၞာန်ဝဳနန် နဒဒှ်ကရောၚ်ပၞာန်ကဝ်ဗရာ−၂ ရ။

သဝ်နေဝ်ဒါမျဂှ် ကၠာတေံ ဒှ်လဝ်သ္ကိုပ်က္ဍိုက်ပ်ပၞာန်တြေံ ဒပ်စဵုဒၞါကောန်ဂကူကရေၚ်-KNDO သၟဝ်တဲ KNU ဂှ်တုဲ ပ္ဍဲသၞာံ ၂၀၂၂ ကြဴနူဒးဒုၚ်ပ္တိတ်နူ KNU တုဲဂှ် ဒက်ပ္တန်လဝ် ကဝ်တူလေဝ်အာမဳ−KTLA ရ။

ပရိုၚ်−သြၚ်လောန်တိုၚ်(မ်)

ဗီု−Lion Battalion