ဒပ်ကံၚ်ဇြဳပၞာန် စံၚ်ကွာန်သာတ်ပျေဝ် ကေုာံ ကွာန်လေတောန်ခါန် ပွိုၚ်ဍုၚ်လံၚ်လုၚ်

လံၚ်လုၚ်၊ ဒဳဇြေမ်ဗာ ၃၀

ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်လံၚ်လုၚ် ရးတၞၚ်သဳဂှ်ဝွံ ဟိုတ်နူစံၚ်ပလီုပလာ်လဝ် ကွာန်သာတ်ပျေဝ် ကေုာံ ကွာန်လေတောန်ခါန်ဂှ်တုဲ ပြဟ်ဟ်ဏံ သ္ၚိဒၟံၚ် ဟွံအောန်နူကဵု ၅ မ ပၟတ်တူလီုလာ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၆၀ပြၚ်ပါဂှ်ဝွံ ပ္ဍဲဂိတုဒဳဇြေမ်ဗာ ၂၈ အခိၚ်ဇိုၚ်သဝ်တ္ၚဲ ၜိုတ် ၄ နာဍဳ နူကဵုကွာန်(ကညုံကျွန်း) ကြဴနူလုပ်စိုပ်ကၠုၚ် အပ္ဍဲကွာန်သာတ်ပျေဝ် ကေုာံ ကွာန်လေတောန်ခါန်တုဲဂှ် စံၚ်ပလီုပလာ်လဝ် သ္ၚိဒၟံၚ်ညးဒေသတံရ။

ကၠာဂွိုအ်စံၚ်ပတူဂှ် ဒပ်ကံၚ်ဇြဳပၞာန်ဝွံ လုပ်စိုပ်ဂၠိုက်ဂၠါဲလဝ် သ္ၚိဒၟံၚ်ညးဍုၚ်ကွာန်ဒေသတံဂှ်တုဲ ကေတ်ဏာလဝ် ကပေါတ်မၞုံကဵုၚုဟ်မးတံကဵု ထဝ်၊ သြန်၊ ကွဳလိုန်ဓာတ်တံ အတေၚ်အဓမ္မဂှ် ဂွံတီကေတ် အတိုၚ်ဂလာန် ညးဒေသတံရ။

ဟိုတ်နူဒပ်ကံၚ်ဇြဳပၞာန် စံၚ်ပတူလဝ်ဂှ်တုဲ ပြဟ်ဟ်ဏံ သ္ၚိဒၟံၚ် နူကဵုကွာန်သာတ်ပျေဝ်ဂှ် ၂ မ၊ သ္ၚိနူကဵုကွာန်လေတောန်ခါန်ဂှ် ဟွံအောန်နူကဵု ၃ မ ပၟတ်တူလီုလာ်အာလဝ်တုဲ ညးဒေသတံဂှ် ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် သ္ဂးရ။

ကရောၚ်ပၞာန်ကံၚ်ဇြဳပၞာန်ဏံဂှ်ဝွံ စနူဂိတုဒဳဇြေမ်ဗာ ၂၇ တုဲကၠုၚ်တေံတုဲ သီုဂၠံၚ်ကုန်၊ ဂၠံၚ်ဍာ် ၜါဂၠံၚ်ပံၚ်တုဲ နူကဵုဗၟံက်ဍုၚ်လံၚ်လုၚ်ဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ဝေဒဳ၊ (ကညုံကျွန်း) ၊ သာတ်ပျေဝ် ကေုာံ ကွာန်လေတောန်ခါန်တံရ။

ဟိုတ်နူကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်ဂှ်တုဲ ကွာန် ဟွံအောန်နူကဵု ၅ ကွာန် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံဂှ် ဂွံတီကေတ်ရ။

ဂကောံဒပ်စဵုဒၞါညးဍုၚ်ကွာန်လံၚ်လုၚ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်တုဲ နကဵုညးဒေသဂမၠိုၚ် သွက်ဂွံစွံသတိဗွဲတၟေၚ်အိုတ်ဂှ်ကဵု သွက်ဂွံသီဂိုၚ်လဝ် ကပေါတ်မၞုံကဵုၚုဟ်မးတံ ဂီုဂီုကၠီုကၠီုဂှ် ဒုၚ်လဝ်ဂုဏ် နမေတ္တာရ။

အတိုၚ်တၚ်နၚ် ဂကောံသုတေသန ISP-Myanmar ဂှ်မ္ဂး အပ္ဍဲကာလသီအဝဵုဏံ အလုံဍုၚ်မွဲ သ္ၚိဒၟံၚ် ၈၆၀၀၀၀ ပြၚ် ဒးဒုၚ်စံၚ်ပလီုလဝ်ရောၚ် ပ္ဍဲဂိတုသေပ်တေမ်ဗာကြပ်အိုတ်တုဲကၠုၚ်တေံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media