ပ္ဍဲလက်ဘနန် ရေၚ်ကွဳစက်ဂကောံဒပ်ပရေၚ်ဂီုကၠီုကုလ ဒးဒုၚ်ကၟာတ်လဒဵု

ဗေရောတ်၊ ဒဳဇြေမ်ဗာ ၃၀

ပ္ဍဲဍုၚ်လက်ဘနန် သ္ကုတ်သၠုၚ်ကျာဂှ် ညးသၟတ်မွဲဂကောံ အခိၚ်ပ္တိတ်ဇြဟတ်တာဒၞါကၠေံ ရေၚ်ကွဳစက်ကုလ အပ္ဍဲကွာန်ညးတံဂှ် ကောန်ဒပ်ထိၚ်ပရေၚ်ဂီုကၠီုကုလမွဲတၠ ဒဒှ်ရကလိဂွံအာဝပ်ဂှ် မေတ်ယှေန်ကုလသမဂ္ဂ ဟီုလဝ် ပ္ဍဲတ္ၚဲဗြဴဗ္တိရ။

ညးဒေသ နူကဵုကွာန် Taybeh ဂှ်ဝွံ အခိၚ်တာဒၞါလဝ် ကၚ်ဂကောံဒပ်ဂီုကၠီုကုလ မတတ်ကၠောံအာကၠုၚ်ဒၟံၚ် ဒၞါဲဂှ်ဂှ် မွဲလစုတ်ဂှ် က္တဵုဒှ်လဝ်ရောၚ် ဂကောံဒပ်ကုလသမဂ္ဂ မၞုံလက်ဘနန် UNIFIL လလောၚ်ပ္တိတ်လဝ်ရ။

ပ္ဍဲကဵုညးကလိဂွံဝပ်တံဂှ် ဒဒှ်ရဒှ်ကောန်ပၞာန်ဍုၚ်အေန်ဒိုဝ်နဳယှာဂှ် ပရိုၚ်တမ်ရိုဟ်ပရေၚ်ဂီုကၠီုမွဲ ဟီုဂးလဝ်ရ။ ပ္ဍဲလၟေၚ်ဒဒှ်ဏံ ကွဳစက်မွဲဖ္ဍိုက် ဒဒှ်ရလီုလာ်အာဂှ်လေဝ် UNIFIL ဟီုဂးလဝ်ရ။

နကဵုသၟိၚ်တၠအဝဵုလက်ဘနန်တံ သွက်ဂွံဂၠိုက်ဂၠါဲစၟဳတ်ကဵု ပရေၚ်ဗ္တိုက်ဏံဂှ်ကဵု မၞိဟ်ဒးဒုၚ်ကလိလောန်လဝ်တံ သွက်ဂွံကလိဂွံဓဝ်ဍာံဂှ် UNIFIL အာတ်မိက်လဝ်ရ။

ပ္ဍဲဂိတုဒဳဇြေမ်ဗာ ၂၉ ပ္ဍဲအခိၚ်ပယျာံဂယးဂှ် ညးဒေသတံ ထပ်ကၟာတ်လဒဵုလဝ် အခေါၚ်အာကၠုၚ် ကုဂကောံဒပ်ပရေၚ်ဂီုကၠီု လ္ပာ်ဌာန်ဂအုပ်သ္ကုတ်ဗၟံက် UNIFIL တံဂှ်တုဲ ကြဴနူပရေၚ်သဳကၠဳပ္ညဳပ္ညပ်ဂှ်တုဲ ကဵုလဝ်အခေါၚ်အာကၠုၚ်ဂှ် Kandice Ardiel ညးမၞုံအခေါၚ်ဟီုဂး UNIFIL ဟီုဂးလဝ်ရ။

ပရိုၚ်တမ်ရိုဟ်ပရေၚ်ဂီုကၠီုလက်ဘနန်မွဲဂှ် မၞိဟ်တြုံမွဲဂကောံ ကၠဟ်လဝ် ယာန်ကွဳစက် UNIFIL တံ နကဵုလေံ၊ မတၟအ်တံဂှ် ဟီုဂးလဝ်ရ။

ဟိုတ်ပရူပရာဂှ် ဟွံဂွံတီကေတ် ကၠးကၠးဖ္ဍးဖ္ဍးကီုလေဝ် ပ္ဍဲကဵုလၟေၚ်ဒဒှ်ပရူပရာတုဲတုဲကၠုၚ်တံဂှ်လေဝ် ညးဍုၚ်ကွာန်ဒေသတံ ကေၚ်ဒစဵုဒစးလဝ် ဒပ်မၚ်ဂီုကၠီု UNIFIL ညံၚ်ဂွိုအ်ဒဳယာန်ကွဳစက် အပ္ဍဲအရာပ်မၞိဟ်ဒၟံၚ်တံဂှ်ရ။

ဂကောံရပ်လွဟ် ဟေဿဗိုဝ်လာ အဳရာန်မၞုံလက္ကရဴ မထိၚ်ဒက်လဝ် ပရေၚ်ဂီုကၠီု ပ္ဍဲကဵုသ္ကုတ်သၠုၚ်ကျာဍုၚ်လက်ဘနန်ဂှ် စပ်ကဵုပရူပရာဏံတုဲ ဟီုဂးလဝ်ဂှ် ဟွံမွဲရ။

ဟိုတ်နူပေါဲပၞာန်ဟာမာသ် ကေုာံ အေဿရေ ပ္ဍဲဒေသဂါဇြာဂှ်တုဲ အပ္ဍဲခတှ်ေလက်ဘနန်နွံတံဂှ် ပရေၚ်ကြံၚ်မ္ၚိုဟ်တံ သၠုၚ်တိုန်ဒၟံၚ်ရ။

မွဲဒမြိပ်ခတှ်ေဏံ စနူအခိၚ်ပေါဲဗ္တိုက် သ္ကာတ်မြဟ်ကၠုၚ်တုဲ ကောန်ဒပ်ပရေၚ်ဂီုကၠီုတံ ဒးချိုတ်အာဂှ် ဟွံမွဲကီုလေဝ် ပ္ဍဲကဵုလၟေၚ်ဒဒှ်ဒၞါဲတၞဟ်ခြာၜါဒၞါဲဂှ် ကောန်ဂကောံဒပ်ထိၚ်ဒက်ဂီုကၠီုၜါတၠ ကလိဂွံလဝ်ဝပ်ရ။

ဟိုတ်နူပရေၚ်ပန်ပှော် ကဵုမကမ်မဝ်တာတံဂှ်တုဲ ဗ္ဒိုပ်ဒပ်၊ ရုၚ် ဒၞါဲ UNIFIL ဖျေံသ္ဇိုၚ်တံ ဒးလီုလာ်ဇီုကပိုက်လဝ် ဂၠိုၚ်ကဵုဝါရောၚ်ဂှ်လေဝ် ဂွံတီကေတ်ရ။

တုဲကၠုၚ် ပ္ဍဲသၞာံ ၂၀၂၂ တေံဂှ်လေဝ် အခိၚ်တတ်အာ သ္ကုတ်ဗၟံက်လက်ဘနန်ဂှ် ယာန်ကွဳစက်ကုလသမဂ္ဂ ကောန်ဒပ်ဂီုကၠီုအိုၚ်ယာလာန်မွဲတၠ မဒဳနၚ်ဂှ် ပန်ပှော်လဝ် နကဵုသေနာတ်တံ က္တဵုဒှ်လဝ်ဏီရ။

Ref: Reuters