ပ္ဍဲကျာ်ထဝ် တြုံကဵုဗြဴညးၜါတၠ လိုန်ဒးမာၚ်တိုပ်တိတုဲ ညးဒှ်တြုံတၠသ္ၚိဂှ် ဒးချိုတ်အာ

ကျာ်ထဝ်၊ ဒဳဇြေမ်ဗာ (၃၁)

ပ္ဍဲကၠအ်သဳဠဴ မၞုံဗ္ဒာဲကွာန်အၚ်္ဂဘိုလ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် တြုံကဵုဗြဴညးၜါ လိုန်ဒးလဝ်မာၚ်တိုပ်တိ ပါ်ခတိုဟ်လဝ်တုဲ ညးဒှ်တြုံတၠသ္ၚိ ဒးချိုတ်လဝ်ရဂှ် ဂွံတီကေတ် နူညးဒေသတအ်ရ။

ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈) တုဲကၠုၚ်ဏံ ဥူနိုၚ်ဝေန် ကေုာံ ဒဝ်မိမိ အယုက် (၄၀) တြုံဗြဴဴညးၜါတၠ ဒၟံၚ်ကွာန်အၚ်္ဂဘိုလ် ဃောအာသွက်ဗာ်တရံက် ပ္ဍဲကၠအ်သဳဠဴဴဂှ် လိုန်ဒးလဝ်မာၚ်တိုပ်တိရ။

ဟိုတ်နူလိုန်ဒးမာၚ်တိုပ်တိတုဲ ညးဒှ်တြုံတၠသ္ၚိဥူနိုၚ်ဝေန်ဂှ် ဒးလဝ်ဘဲဝပ်ထောၚ်ကၠိုဟ်အာ ပ္ဍဲဇိုၚ်ကဵုပ္ဍဲဗုၚ်တုဲ၊ သမ္ဘာညး ဒဝ်မိမိဂှ်မ္ဂး ဒးလဝ်ဘဲဝပ်ကဝေက်မာၚ် ပ္ဍဲထာၚ်ဂၞိၚ်ပါဲ၊ ပ္ဍဲဗုၚ် သီုပ္ဍဲတဲၜါလ္ပာ် ထောၚ်ကၠိုၚ်လဝ်ရ။

ကြဴနူဂှ် ဃောပလံဏာဒၟံၚ်ရုၚ်ဂဥုဲခရိုၚ်သဓီု နအရီုဗၚ် ဂကောံရီုဗၚ်ဟံၚ်ပြာ်ပရေၚ်မၞိဟ်တအ်ဂှ် ညးဒှ်တြုံတၠသ္ၚိ ဥူနိုၚ်ဝေန်ဒးချိုတ်လဝ်တုဲ ညးဒှ်သမ္ဘာဂှ်မ္ဂး ပလံၚ်ဗစိုပ်လဝ် ရုၚ်ဂဥုဲလဂုၚ် နဒဒှ်ကာတၟေၚ်ရဂှ် ညးစုက်လုက်ကဵု ဂကောံသ္ၚိကၟိန်ညးတအ် ဟီုထ္ၜးလဝ်ရ။

ကွာန်အၚ်္ဂဘိုလ် မာၚ်တိုပ်တိပါ်ခတိုဟ်လဝ်ဂှ် ဒှ်တိဍာ် ဗော်သွးကောန်ဂကူကရေၚ် KNU ဒပ်မဟာ (၁) ခရိုၚ်သဓီု ထိၚ်ဒဝ်လဝ်တုဲ ဟိုတ်နူရေၚ်ယာဉ်ကွဳစက်ကံၚ်ဇြဳပၞာန်တအ် ဒးဒုၚ်ဖံက်ခတိုဟ်ဒၟံၚ်မာၚ် ခြာဟွံလအ်ဟွံလအ်ဂှ်ရ ဒပ်ကံၚ်ဇြဳပၞာန် ဖျေံလဝ်ဒပ်ကၚ် နွံရ။

မာၚ်တိုပ်တိဏံဂှ် ဒှ်မာၚ်ဒပ်ကံၚ်ဇြဳပၞာန် ပါမ်စွံလဝ်တုဲ နူလ္ပာ်ဍေံတအ် ပ္တိတ်လဝ်တၚ်လလောၚ်တြး တာဒၞာလဝ် ညံၚ်ညးဒေသတအ် ဟွံဂွံအာကၠုၚ်ရဂှ် ညးတာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၇) တုဲကၠုၚ်တေံလေဝ် ပ္ဍဲကၠအ်ခၜိုတ်ရာပ်ဗာယှိုဲဖျူ ဌာက္ဍိုက်က္ဍိုပ်ထံၚ်ပိုၚ် ကွာန်တေတ်ဇြုက်ပေန်၊ ပွိုၚ်ဍုၚ်ကျာ်ထဝ်ဂှ် မၞိဟ်တြုံအာခွာတ်ခၜိုတ် (၁) တၠ ဟိုတ်နူလိုန်ဒးမာၚ်တိုပ်တိတုဲ ဒးလဝ်ဘဲဝပ်သ္ကာတ်မြဟ်ရဂှ် ဂွံတီကေတ် နူညးဒေသတအ်ရ။

အတိုၚ်လိက်ဒုၚ်စဳရေၚ် ဂကောံမၚ်ရံၚ်ခါတ်အကာဲမာၚ်တိုပ်တိ LCMM တၚ်လလောၚ်တြးလဝ် ပ္ဍဲဂိတုဒဳဇြေမ်ဗာဂှ်မ္ဂး ပ္ဍဲသၞာံဏံ ဟိုတ်နူမာၚ်တိုပ်တိကီု သီုကဵုကပေါတ်လွဟ်လက်နက်ပၞာန်သှ်ေသၟေဟ်တအ်တုဲ အပံၚ်မၞိဟ် ဟွံအောန်နူ ၂၀၀ ဒးချိုတ်လဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

​ဗီု – Social Media