လံၚ်လုၚ်၊ ဒဳဇြေမ်ဗာ (၃၁)
ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်၊ ရးဒေသတၞၚ်သြဳဂှ် ကုတ်ကအ်ပြိုက်ဂစိုတ်လဝ် ကောန်အရာပ် ဒၟံၚ်ကွာန်သေတ်ပျေဝ်မွဲတၠတုဲ ရပ်ဒက်ကော်ကေတ်ဏာ ညးဍုၚ်ကွာန်တအ် နဒဒှ်ဒေၚ်ဒုၚ်ဒၞာမၞိဟ်ရဂှ် ဂွံတီကေတ် နူညးဒေသတအ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် နွံ (၆၀) ပြၚ်ပြၚ်ဂှ် သ္ပတံနူဂိတုဒဳဇြေမ်ဗာ စၟတ်တ္ၚဲ (၂၇) တုဲကၠုၚ်တေံတုဲ ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲကွာန်ဝေဒဳ၊ ကညုမ်ကျောန်၊ သေတ်ပျေဝ်၊ လေတွောန်ခါန်၊ ဂအ်အေန်၊ ကထုၚ်ဂျဳကဵု ကွာန်နာခါန်တဝ် ပွိုၚ်ဍုၚ်လံၚ်လုၚ်တအ်ရ။
ကရောၚ်ပၞာန်ဏံ စံၚ်ပလီုလဝ် သ္ၚိဒၟံၚ် ပ္ဍဲကွာန်သေတ်ပျေဝ်ကဵု ကွာန်လေတွောန်ခါန် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈) တေံ (၁၂) မတုဲဂှ် ကုတ်ကအ်ပြိုက်ဂစိုတ်လဝ် ကောန်အရာပ်ညးဍုၚ်ကွာန် မွဲတၠရ။
ကိုဝ်တိုဝ်နိုဝ် တၠဝေဒနာယဲတဳဗဳဍာ်ဇမၠိၚ် အယုက် (၃၀) သၞာံ ဒးဒုၚ်ကုတ်ကအ် ပြိုက်ဂစိုတ်လဝ်ဂှ် ဟိုတ်နူပါဲပၞာန်ဟွံမာန် ဃောမံၚ်ဒၟံၚ် ပ္ဍဲသ္ၚိ တဝ်အာမုက်ကဵု ကရောၚ်ပၞာန်တုဲ ဒးဒုၚ်ရပ်လဝ်ရ။
ကြဴနူကုတ်ကအ်ပြိုက်ဂစိုတ်လဝ် ကိုဝ်တိုဝ်နိုဝ် တၠဝေဒနာယဲတဳဗဳဍာ်ဇမၠိၚ်တုဲဂှ် ကရောၚ်ပၞာန်ကံၚ်ဇြဳပၞာန် ဒက်လဝ်ကဵုဇုက် ပ္ဍဲဒယိုၚ်ကောန်ကရေတ် သၟဝ်ဒဒန်မၞုံဗ္ဒာဲကွာန်ဂှ်တုဲ ကၠဟ်ဖျေံဏာလဝ်ဂှ်ရ ပ္ဍဲဂိတုဒဳဇြေမ်ဗာ စၟတ်တ္ၚဲ (၃၀) အခိၚ်နူဂယးဏံ ညးဒေသတအ် ဂွံက္လေၚ်ဆဵုဂဗလဝ်ရ။
ကရောၚ်ပၞာန်ဏံ ရပ်ကေတ်ဏာဒၟံၚ် ညးဒေသ မၞုံပ္ဍဲမွဲဒမြိပ်ကွာန်ဍေံတအ်ထ္ပက်ကရောၚ်ပၞာန် နဒဒှ်ဒေၚ်ဒုၚ်ဒၞာမၞိဟ်တုဲ ပ္ဍဲကဵုသ္ၚိမၞိဟ်ဟၟဲတအ်လေဝ် ဖံက်ပလီုကေတ်ဏာဒၟံၚ် ကပေါတ်နွံၚုဟ်မးတအ်ရ။
ဟိုတ်နူကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ်လဝ်တုဲ ကွာန်ဟွံအောန်နူ (၈) ကွာန် ဒးဂြိပ်ဒဴဴပါဲဓလေတ်ဒၟံၚ်တုဲ ညးဒေသ ဒပ်ကံၚ်ဇြဳပၞာန် ရပ်ကေတ်ဏာလဝ်လ္ၚဵုဂှ်မ္ဂး အဆက်ပိုတ်ဒၟံၚ်ကဵု ဂကောံသ္ၚိကၟိန်ညးတအ်ရဂှ် ဂွံတီကေတ်ရ။
ပ္ဍဲရးဒေသတၞၚ်သြဳ မွဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ရပ်ဒက်ပန်ပှော်ပြိုက်ဂစိုတ်လဝ်တုဲ ကောန်အရာပ်ညးဍုၚ်ကွာန် ဟွံအောန်နူ (၁၅၀) တၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံရီုဗၚ်မွဲ ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ် – သြၚ်လောန်တိုၚ်မ်
ဗီု -CJ
sanlontai