ရေဝ်၊ ဒဳဇြေမ်ဗာ (၃၁)
ပ္ဍဲပရေၚ်ပန်ပှော်ၜါလ္ပာ် ဒှ်လဝ်လဒေါဝ်ဍုၚ်လၟိုၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ကောန်ၚာ်ဗြဴ အယုက် (၃) သၞာံဘာ် မွဲတၠကဵု ကောန်ဒပ်ဗၠာဲသၟိၚ်မွဲတၠ ဇီုကပိုက်ဒးလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကွဳစက်ဗၠာဲသၟိၚ် ကောန်ဒပ်ဗၠာဲသၟိၚ် ပါကၠုၚ် (၅) တၠ တိတ်ကၠုၚ် နူတံဒပ်ပၞာန်တိုက်ကံၚ်ဇြဳပၞာန် စၟတ် (၁၀၆) သွက်ဂွံဂေတ်ကၚ်ဂှ် ဂကောံပၠန်ဂတးပံၚ်ကောံတအ် မၚ်ဒၟံၚ် ဗ္ဒာဲဍာ်ကၟာ လ္ဒေါဝ်ဍုၚ်လၟိုၚ်တုဲ ဗတိုက်လဝ်ရ။
ဟိုတ်နူဗတိုက်လဝ်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ဂှ်ရ ကောန်ၚာ်အယုက် (၃) သၞာံဘာ် ဒၟံၚ်ကွာန်တၟံကၞေၚ်မွဲတၠကဵု ကောန်ဒပ်ဗၠာဲသၟိၚ်မွဲတၠ ဒးလဝ်ဘဲဝပ်မကမ်ကၠိုဟ်ဂွံအာ ပ္ဍဲဒဳညးသ္ကအ် သီုညးၜါတၠရ။
ကောန်ၚာ်သၟတ် ဒးလဝ်ဘဲဝပ်မကမ်ဂှ် လွဳလွတ်ပါ်ကရေက်ဒၟံၚ် ပ္ဍဲရုၚ်ဂဥုဲပွိုၚ်တိုက်လၟိုၚ်တုဲ ကောန်ဒပ်ဗၠာဲသၟိၚ် ကံၚ်ဇြဳပၞာန်ဂှ်မ္ဂး နူလ္ပာ်ဒပ်ပၞာန် ကၠုၚ်ကော်ကေတ်ဏာလဝ်ရဂှ် ဂွံတီကေတ် အတိုၚ်ညးဒေသတအ် ဟီုလဴထ္ၜးလဝ်ရ။
ကြဴနူပရေၚ်ပရောဏံ ဒှ်လဝ်တုဲဂှ် ကောန်ဒပ်ကံၚ်ဇြဳပၞာန်တအ် ကၟာတ်ဒၞာကေတ်လဝ်ဒၞာဲ ပ္ဍဲရုၚ်ဂဥုဲပွိုၚ်တိုက်လၟိုၚ်၊ ဒၞာဲလုပ်တိတ်ဍုၚ်ကဵု ပ္ဍဲဂၠံၚ်သွာၚ်တအ်တုဲ ကၟာတ်ဒၞာ စၟဳစၟတ်ဒၟံၚ်ညးဍုၚ်ကွာန်အာတရဴ လ္ၚဵုတအ်ရ။
ကောန်ဒပ်ဗၠာဲသၟိၚ် နွံဍုၚ်လၟိုၚ်တအ်ဂှ် သ္ပတံနူတံသၞာံဏံမံက်တေံ ဆုဲပြံၚ်မံၚ်ဒၟံၚ် ပ္ဍဲတံဒပ်ပၞာန်တိုက် စၟတ်(၁၀၆)တုဲ ကာလလ္ဆောဝ်မ္ဂး ဂေတ်ဒၟံၚ်ကၚ် ပ္ဍဲဍုၚ်နွံရဂှ် ဂွံတီကေတ် နူညးဒေသတအ်ရ။
စပ်ကဵုပရေၚ်ပန်ပှော် ဒှ်လဝ် လ္ဒေါဝ်ဍုၚ်လၟိုၚ်ဏံတုဲ စဵုကဵုအခိၚ်လၟုဟ် လ္ပာ်ဂကောံပၠန်ဂတး ဂကောံဇြဟတ်ပံၚ်ကောံတအ် လလောၚ်တြးပ္တိတ်လဝ် တၚ်လလောၚ်တြး မမိက်ကဵုမွဲမွဲဂှ် ဟွံဆဵုလဝ်ဏီရ။
ပ္ဍဲဍုၚ်လၟိုၚ် လလောၚ်တြးလဝ် ပရေၚ်အုပ်ဓုပ်ပၞာန်ဂှ်မ္ဂး ဂကောံအုပ်ဓုပ်ကံၚ်ဇြဳပၞာန်တအ် ဟိုတ်နူအကာဲအရာ ဒှ်ဓဝိၚ်ကဵုပရေၚ်ဂီုကၠီုတုဲ ပြံၚ်ဆုဲမံၚ်တန်တဴဒၟံၚ် ပ္ဍဲဒပ်ပၞာန်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai