ဝါယှေန်တာန်၊ ဖေဖဝ်ဝါရဳ ၃
အလဵုအသဳအမေရိကာန် ကဵုအခေါၚ် သွက်ဂွံကၠောန်သ္ပဗ္တိုက် ကုဂကောံရပ်လွဟ် အဳရာန်မထံက်ပၚ်ကဵုလဝ်ဂမၠိုၚ် ပ္ဍဲကဵုသဳရဳယျာ ကေုာံ အဳရာတ်တံယျဂှ် သၞာဲဒဴဂမၠိုၚ် ဟီုရ။
ဗ္ဒိုပ်လ္ပာ်ပၞာန်အမေရိကာန် ဖျေံသ္ဇိုၚ်ဍုၚ်ဂျဝ်ဒါန်မွဲ ဟိုတ်နူဒးဒုၚ်ဗ္တိုက်ကဵုဒရုၚ်ဂှ်ရ ကောန်ပၞာန်အမေရိကာန် ၃ တၠ ချိုတ်တုဲ ပရေၚ်ဗ္တိုက်ဏံဂှ် ဂကောံရပ်လွဟ် အဳရာန်ထံက်ပၚ်ကဵုလဝ်တံ ကၠောန်သ္ပလဝ်ရောၚ် ဒုၚ်လဝ်ဝန်ရ။
ဂကောံတဝ်စၞေဟ်အေဿလာမ်မေတ် မၞုံပ္ဍဲအဳရာတ်ဂှ်ဝွံ ဂကောံမၚ်ရံၚ်ပၠန်ဂတး အဳရာန် ကဵုလွဟ်လက်နက် ပ္ကတ်ပ္ကေၚ်ဗ္တောန်ကဵုဒၟံၚ်တုဲ ထိၚ်ဒက်လဝ် ဂကောံထံက်ပၚ်ကဵုလဝ်သြန်ဗွဝ် ဗွဲမဂၠိုၚ်ဂၠေၚ်ဂှ်ရောၚ်ဂှ် သ္ဂးဒၟံၚ်အိုတ်ရ။
ဗ္ဒိုပ်ဖျေံသ္ဇိုၚ် စပ်ကဵုလ္ပာ်ပၞာန် ကော်ဂး Tower-22 ဒးဒုၚ်ဗ္တိုက်ဂှ်တုဲ ကောန်ဒပ်အမေရိကာန် ၄၁ တၠ ကလိဂွံလဝ်ဝပ်ရောၚ် ဂွံတီကေတ်တုဲ အဳရာန်ဂှ်တှ်ေ ဟွံဆက်စပ်ကဵုညးတံပုဟ်ဂှ် ကယျာန်ပါဲလဝ်ရ။
ရဲထံၚ်ပရိုၚ်အမေရိကာန်တံဂှ် ဒရုၚ်သုၚ်စောဲလဝ် အခိၚ်ကၠောန်သ္ပဗ္တိုက်လဝ်ဂှ်ဝွံ ဒှ်ဒၟံၚ်ဒရုၚ် အဳရာန်ပ္တိတ်လဝ်ရောၚ် စၟတ်ကေတ်တုဲ တုပ်ဒၟံၚ်ကဵုဒရုၚ် အခိၚ်ဒပ်ရုယှာတံ ဗ္တိုက်ယူကရုၚ်ဂှ်ဏောၚ်ဂှ်လေဝ် သၞာဲဒဴဂမၠိုၚ် ဟီုရ။
ပ္ဍဲကဵုပေါဲသောၚ်ကလးလိက်ပရိုၚ် မကၠောန်လဝ် ပ္ဍဲဂိတုဖေဖဝ်ဝါရဳ ၁ တုဲကၠုၚ်တေံဂှ် ဝန်ဇၞော်ကာစဵုဒၞါအဝ်သတေန်ဂှ် စပ်ကဵုသွက်ဂွံကလေၚ်ခၠေဝ် နကဵုပရေၚ်ပၞာန် လအ်လဒၟံၚ်ဂှ်တုဲ သ္ဂုတ်သွာတ် ဒၞါဲ၊ အခိၚ်တုဲမှဟေၚ် ကၠောန်အာဏောၚ်ဂှ် သ္ဂးလဝ်ရ။
နကဵုဒပ်ပၞာန်အမေရိကာန် အခိၚ်ရာသဳဥတုပရေံတံဂှ်လေဝ် ဗ္တိုက်မာန်ကီုလေဝ် ညံၚ်ကောန်အရာပ်ချိုတ်ဂျိုၚ်တံဟွံဂွံမွဲ အခိၚ်ညာတ်ကေတ်မာန် သွက်ဂွံဗ္တိုက်အာနွံဒၟံၚ်ဂှ် သၞာဲဒဴဂမၠိုၚ် ဟီုလဝ်ကီုလေဝ် အခိၚ်လဵုကၠောန်အာဏောၚ်ဟီုဂှ် ကဵုလဝ်သမ္တီဟွံမွဲရ။
ဂွံခၠေဝ်ပလန်သာ်ဏံဂှ် စဳဇန်ဒၟံၚ်ကီုလေဝ် အမေရိကာန်ဂှ် ညံၚ်ပေါဲပၞာန် ကုအဳရာန် ဂွံသၠဲလးကၠုၚ်ဂှ် ပ္တိတ်ဒၟံၚ်ဇြဟတ်ဟွံသေၚ်တုဲ ညံၚ်ပေါဲပၞာန်အပ္ဍဲဒေသ ဂွံဇၞော်ကၠုၚ်ဂှ်လေဝ် ဖန်ဗဒှ်ဒၟံၚ်ဟွံသေၚ်ပုဟ်ဂှ် ညးတာလျိုၚ်အလဵုအသဳဂမၠိုၚ် ဟီုလဝ်ရ။
Ref: BBC