ဝါယှေန်တာန်၊ ဖေဖဝ်ဝါရဳ ၂
ဍုၚ်အမေရိကာန် ပ္တဝ်က္ဍိုပ်ကဵု ကမၠောန်ဆက်စပ်ဒၟံၚ်ကဵု ကံၚ်ဇြဳပၞာန်သီအဝဵု ၂ ကဵု မၞိဟ်ပူဂဵုတံဂှ်တုဲ ပ္ဍဲတ္ၚဲသီအဝဵု ပေၚ်ပိသၞာံဂှ် ထပ်ဖျေံစၟတ်လဝ် ပရေၚ်ကေတ်အရေဝ်ကၟာတ်လဒဵုတံဂှ်ရ။
ပရေၚ်ကေတ်အရေဝ်ဖျေံစၟတ်လဝ် ပ္ဍဲဂိတုဂျာန္နဝါရဳ ၃၁ တုဲကၠုၚ်တေံဂှ်ဝွံ ရန်တၟံလဝ် ညံၚ်ဂွံဖအောန်ဖျေံ စၞပၟတ် ဒပ်ပၞာန်မရပ်စပ်ဒၟံၚ် ပ္ဍဲအရာကၠောန်သ္ပပရေၚ်ဗ္တိုက်တရဴကျာတံ ကေုာံ ဇြဟတ်ဒပ်ပၞာန်ကၠောန်ပ္တိတ်လွဟ်တံရောၚ် သ္ဂးလဝ်ရ။
ပ္ဍဲကဵုတၚ်လလောၚ်တြး ဌာနဝန်ဇၞော်ပရေၚ်ဘဏ္ဍာအမေရိကာန်ဂှ် ကေတ်အရေဝ်ကၟာတ်လဒဵုလဝ် ကမ္ပဏဳယှိုဲဗျိုၚ်ဖျူ ကေုာံ တၠကမ္ပဏဳ ဥူတုၚ်ဝေန်ဇြဝ် ကေုာံ ကောန်ဝုတ်ညး သီုကဵုကောန်ဇာတ်ၜါတၠဂှ် ထ္မံက်ထ္ၜးလဝ်ရ။
ကမ္ပဏဳဂှ်ဝွံ ပၠောပ်ပ္တိုန်သွံတြးကဵုဒၟံၚ်ဒပ်ပၞာန် ကၠေၚ်ဓာတ်တုဲ သၞာံ ၂၀၂၁ တေံ ဒှ်ကမ္ပဏဳ ပါ်ပရအ်ဒၟံၚ်ပရဲ ကုကမ္ပဏဳမျာန်မဥူပိုၚ် မဒးဒုၚ်ကၟာတ်လဒဵုကေတ်လဝ်အရေဝ်တံရောၚ်ဂှ် ဌာနဝန်ဇၞော်ပရေၚ်ဘဏ္ဍာ အမေရိကာန် ဟီုရ။
ဍုၚ်အမေရိကာန်ဝွံ လာၚ်က္ၜၚ် သၞံၚ်မသုန်ဍောၚ် ကမ္ပဏဳမျာန်မဥူပိုၚ်ဗၟာတံ ပိုၚ်ပြဳလဝ်ဂှ်လေဝ် ဟိုတ်နူပလံၚ်ပစိုပ်ကဵုဒၟံၚ် ကပေါတ်နွံပၟိက် သွက်ပရေၚ်ကၠောန်ပ္တိတ်လွဟ်လက်နက်ဒပ်ပၞာန် အပ္ဍဲဍုၚ်တံ ကဵုက္ၜၚ်ဂှ်ရ ကၟာတ်လဒဵုကေတ်လဝ်အရေဝ်ရောၚ် ကဵုလဝ်သမ္တီရ။
ရိုဟ်ကၞက်သြန်လုပ် ကံၚ်ဇြဳပၞာန် မဂၠါဲကဵုဒၟံၚ်သြန်ဗွဝ် ဒပ်ပၞာန် သွက်ဂွံကၠောန်သ္ပဗ္တိုက် ကုကောန်အရာပ်တံဂှ် ဇကုတံ စွံပွန်ကေတ်လဝ်ကဵုအရေဝ်ရောၚ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ် မက်သရူမာတ်လာ သ္ဂးလဝ် ပ္ဍဲတၚ်လလောၚ်တြးဂှ်ရ။
နကဵုဒပ်ပၞာန်ဗၟာ သွက်ဂွံပြံၚ်လှာဲဂၠံၚ်တရဴ မကၠောန်ဒၟံၚ်လၟုဟ်တံဂှ်လေဝ် ဝါယှေန်တာန် ထပ်ဖ္တိုက်ဖ္အောဝ်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညံၚ်ညးမထံက်ပၚ်ကဵုဒၟံၚ် ညးမဂၠါဲကဵုဒၟံၚ်သြန်ဗွဝ် သွက်ပရေၚ်ဍဵုဍိုက်ပကီုပရာပ် လ္တူညးဍုၚ်ကွာန်တံဂှ် အမေရိကာန် ပံၚ်တောဲကဵု ဂကောံမဟာမိတ်ဂမၠိုၚ်တုဲ ဆက်ပ္တိတ်အာဇြဟတ်ဏောၚ်ဂှ် ကဵုလဝ်သမ္တီရ။
Ref: Reuters