ကာန်ဗာရာ၊ ဖေဖဝ်ဝါရဳ ၂၁
အခိၚ်ဒးဆေၚ်ဒၟံၚ်မုက် ပရေၚ်ပြိုၚ်ပ္ကာန်လွဟ်လက်နက် အာယှ−ပသိဝှေခ်ဂှ် အဝ်သတြေလျ ဆက်မိတ်လဝ် အစဳဇန် သွက်ဂွံသၠုၚ်ပ္တိုန်ယာန်ဍာ် က္ၜၚ်ပၞာန်အဓိကညးတံပါလုပ် ၂ ဆဂှ်ကဵု သွက်ဂွံသၠုၚ်ပ္တိုန် ခရိတ်အရပ်စပ်ပၞာန်ညးတံ ဒဝ်ဠာအမေရိကာန် ၇ ဗဳလျာန်ပၠန် မဒှ်ရ။
လ္ဂောံကဵုအစဳဇန်ဏံမ္ဂး အဝ်သတြေလျဝွံ လၟိဟ်က္ၜၚ်ပရေၚ်ဗ္တိုက်ဗလးဍာ် လၟုဟ်နွံဒၟံၚ် ၁၁ ဖ္ဍိုက်ဂှ် ညံၚ်ဂွံဒှ် ဒဵုကဵု ၂၆ ဖ္ဍိုက်ဂှ် သၠုၚ်ပ္တိုန်အာဏောၚ်။
အစောံဇြဟတ်ပန်ပှော် လ္ပာ်ဒစဵုဒစးဂမၠိုၚ် ကြုက် ကေုာံ ရုယှာတံ ဇၞော်ပၟဝ်ကၠုၚ်တၟာဂလိုၚ်တုဲ အခိၚ်ပရေၚ်ဒိဓဗတ် ကုမဟာမိတ် သၟဝ်ပၠတရဴအမေရိကာန်တံ ဂၠိုၚ်ကၠုၚ်ဒၟံၚ်ဂှ် အစဳဇန်ဏံ မံက်တိတ်ကၠုၚ်ရ။
အဝ်သတြေလျဂှ် ဒက်ပ္တန်အာ က္ၜၚ်ဖရဳဂိတ် ကဆံၚ် Hunter ၆ ဖ္ဍိုက်၊ က္ၜၚ်ဖရဳဂိတ် အရပ်စပ်နာနာ ၁၁ ဖ္ဍိုက် ကေုာံ က္ၜၚ်ပၞာန် ဗလးဍာ် မသက္ကုမၞိဟ် ၆ ဖ္ဍိုက်ဏောၚ်ဂှ် ဂွံတီကေတ်ရ။
ပ္ဍဲကဵုက္ၜၚ်တံဏံဂမၠိုၚ် လ္ၚဵုတံဂှ်ဝွံ ဗ္ဂပ်စုတ်အာ ကမ်လှောဝ် Tomahawk ပန်ပှော်ခြာဇမ္ၚောဲ စဵုကဵုလ္ပာ်အပ္ဍဲတွဵုဒၞက်သၞတံမာန်ဂှ်ဏောၚ်ဂှ် ကဵုလဝ်သမ္တီရ။
လ္ဂောံကဵုအစဳဇန်ဏံမ္ဂး ခရိတ်အရပ်စပ်ပရေၚ်စဵုဒၞါ အဝ်သတြေလျဂှ်ဝွံ ၚုဟ်မးဗၞိက်ပ္တိတ်အပ္ဍဲဍုၚ် ၂ ဒဿမ ၄ တၟံကၠံ နွံကၠုၚ်ဏောၚ်မဒှ်တုဲ လောန်ၜက်အာ နူကဵုဂကောံနေတိုဝ်တံ မခုတ်ပ္တန်လဝ် ၂ တၟံကၠံဂှ်ဏောၚ်ဂှ် ဂွံတီကေတ်ရ။
က္ၜၚ်လ္ၚဵုတံဂှ် သိုၚ်ခၞံအာ ပ္ဍဲဍုၚ်အဒဳလာဒေဏောၚ်တုဲ ကမၠောန်ကၟိတ် ၃၀၀၀ ပြၚ် ဒှ်ကၠုၚ်နွံဒၟံၚ်ဂှ်လေဝ် ဂွံတီကေတ်ရ။
ဒဳဇြာၚ်က္ၜၚ်တၞဟ်ဟ်တံဂှ် ဒးကေတ်နူ အမေရိကာန်ဏောၚ်တုဲ ဒဳဇြာၚ်က္ၜၚ် သပုၚ်၊ ဂျာမနဳ၊ ကိုဝ်ရဳယျာသၠုၚ်ကျာ ကေုာံ ဂျပါန်တံဂှ်တှ်ေ ဟွံဂွံသ္ဂုတ်သွာတ်ဏီပုဟ်ဂှ် သ္ဂးလဝ်ရ။
Ref: Reuters