ကိုၚ်ရိုဝ်၊ ဖေဖဝ်ဝါရဳ ၁၈
စပ်ကဵုတၚ်စောဲစပ် ကောန်ဍုၚ်ပါလက်သတိုၚ် ဒေသဂါဇြာတံ ပါလုပ်ဒၟံၚ် ပ္ဍဲကဵုပရေၚ်ဗက်ဗဒဴကၠေံ ဒေသတ္ကအ်သာၚ်နာၚ်ဂှ်တုဲ တးပါဲလဝ်ဂှ် ဌာနတၚ်နၚ်ပရိုၚ် အလဵုအသဳအဳဂျေတ် SIS ဟီုရ။
ယဝ်ရအေဿရေ ထ္ပက်ကၠုၚ်ပၞာန် လ္ပာ်ဍုၚ်ရာဖာဂှ်မ္ဂး ဟိုတ်နူကောန်ဍုၚ်ပါလက်သတိုၚ်တံ လုပ်စိုပ်ကၠုၚ် ဗွဲမဂၠိုၚ်ဂၠေၚ်မာန်ဂှ်ရ နဒဒှ်ဒစးဒုၚ်ကဵုသတိတုဲ ညံၚ်ဂွံဖျေံကဵုဒၞါဲကုညးတံ ပ္ဍဲကဵုဒေသ ပယျဵုဂါဇြာဂှ် အဳဂျေတ် စဳဇန်လဝ်ရောၚ် ပရိုၚ်တမ်ရိုဟ်ဂမၠိုၚ် သ္ဂးလဝ်ရ။
နကဵုအဳဂျေတ် စနူပေါဲပၞာန်စတုဲ ဒတူလိုၚ်လဝ်ပိုတ်တ်သ္ကုတ်တ်တုဲ ကောန်ဍုၚ်ပါလက်သတိုၚ် ကောဒေံမၞုံပ္ဍဲဂါဇြာဂမၠိုၚ် အနိၚ်အထက်ဒှ်ဒှ် နကဵုတၚ်တုပ်စိုတ်ညးတံဒှ်ဒှ် ထဍေၚ်ပ္တိတ်လဝ်ဟွံမွဲတုဲ ကဵုကၠုၚ်လဝ်ဍုၚ်အဳဂျေတ်လေဝ်ဟွံမွဲပုဟ်ဂှ် ဇၞော်သ္ကိုပ် SIS ဒဳယာရက်ချ်ဝန် ဟီုရ။
ယဝ်ရကောန်ဍုၚ်ပါလက်သတိုၚ်တံ ဂြိပ်တိတ်ကၠုၚ် နကဵုဂအုံဗွဝ်မ္ဂး သွက်အဝဵုအပိုၚ်အခြာအဳဂျေတ် ကေုာံ ဂီုကၠီုကၟိန်ဍုၚ်ဂှ် အန္တရာယ်ဇၞော်ဇၞော်နွံဒၟံၚ်ရောၚ် ညးသ္ဂးလဝ်ရ။
ဗီုပြၚ်ဖျေံတာဒၞါလဝ်ကောန်ကရေတ် ပ္ဍဲကဵုပယျဵုတုဲ ကရုၚ်တံ ကွဳစက်သိုၚ်ခၞံတံ ကၠောန်ဒၟံၚ်ကလောန်ဂှ် သာၚ်နာၚ်ဝှံၚ်ဒေယှေန် စပ်ကဵုအခေါၚ်အရာမၞိဟ် မဒှ်ဂကောံချဳဒရာၚ်ကတိုၚ်ကၟဟ်ဂှ် ထ္မံက်ထ္ၜးလဝ်ရ။
ကၠာပေါဲပၞာန်ဂွိုအ်ဒှ်ဂှ် အဳဂျေတ်ဝွံ အကြာပယျဵုဂှ် ဖျေံဒၞါတာလဝ်အရာစဵုဒၞါတံတုဲ အရာတံဏံဝွံ သွက်ဂီုကၠီုပယျဵုဇကု၊ သွက်အဝဵုအပိုၚ်အခြာဂွံတန်ဂှ် ဒှ်ပြဝ ဍုၚ်မၞုံဒၟံၚ်လ္တူဂၠးတိဏံ ဍုၚ်လဵုဟွံဟီု မကၠောန်အာညးသ္ကအ်မွဲဏောၚ်ဂှ် ရက်ချ်ဝန် သ္ဂးရ။
ယဝ်ရပ္တိတ်ကၠုၚ်ဇြဟတ် သွက်ဂွံထဍေၚ်ပ္တိတ်ကောန်ဍုၚ်ပါလက်သတိုၚ်တံ နွံမ္ဂးလေဝ် သွက်ဂွံတာဒၞါ အစဳဇန်မၞုံပၟိက်အိုဿီု ဖျေံစၟတ်ရေၚ်တၠုၚ်အာဏောၚ်ဂှ် ညးဟီုလဝ်ဏီရ။
ပ္ဍဲသတ္တာဟဏံပြဟ်ဟ်တေံ အဳဂျေတ်ဝွံ သွက်တၚ်တုပ်စိုတ်ပရေၚ်ၜိုဟ်လလမ်ဂါဇြာ မဒှ်ကၠုၚ်မာန်ဂှ် သဳကၠဳလဝ် ကဵုအမေရိကာန်၊ အေဿရေ၊ ကာတာတံရ။
ညံၚ်ကောန်ဍုၚ်ပါလက်သတိုၚ်တံ ဂွိုအ်ဂြိပ်တိတ် နဒဒှ်ဒစးဒုၚ်စဵုဒၞါတုဲ ပ္ဍဲကဵုပယျဵုဂါဇြာ တၚ်တုပ်စိုတ်ဒေါအ်ပန်ပှော် ကလိဂွံဟွံမာန် ဒဒှ်ရအဳဂျေတ်ညာတ်လဝ်ဂှ် ပရိုၚ်တမ်ရိုဟ်မွဲ သ္ဂးလဝ်ရ။
Ref: Reuters