မဝ်သကိုဝ်၊ ဖေဖဝ်ဝါရဳ ၂၄
ဒပ်နျူကလဳယျာရုယှာ မစှ်ေကဵုမဟာဗျူဟာ ၉၅ တၟံကၠံဂှ် ညံၚ်ဂွံဂတာပ်ခေတ် ပလေဝ်ပလေတ်လဝ်တုဲယျဂှ် သမ္မတ ဗလာဒဳမာပူတေန် ဟီုဂးလဝ် ပ္ဍဲဂိတုဖေဖဝ်ဝါရဳ ၂၃ တေံရ။
သွက်ဒပ်ကျာရုယှာဂှ်လေဝ် ပလံၚ်ဗစိုပ်ကဵုအာ က္ၜၚ်ကျာထောံမခတိုဟ်နျူကလဳယျာ မြက်နူကဵုရမျာၚ် ပန်ဖ္ဍိုက်ဏောၚ်ဂှ် ညးဟီုရ။
ပူတေန်ဝွံ ကြဴနူဍိုက်ဗက်ကၠုၚ် လ္တူက္ၜၚ်ကျာထောံမခတိုဟ် နျူကလဳယျာ Tu-160M မွဲဖ္ဍိုက်တုဲ ဂွံမွဲတ္ၚဲဂှ် ဟီုလဝ် ပ္ဍဲကဵုဂလာန်သြဝါဒ တ္ၚဲစဵုဒၞါဍုၚ်မိတိမရုယှာ ကၠောံသၞာံဂှ်ရ။
ပ္ဍဲကဵုတ္ၚဲဒစးဒုၚ် တ္ၚဲကၠောံသၞာံပေါဲပၞာန်ယူကရုၚ် အလန်ဒုတိယဂှ် ကောန်ပၞာန်ရုယှာ လုပ်ဒၟံၚ်ပေါဲဗ္တိုက် ပ္ဍဲယူကရုၚ်တံဂှ် ပူတေန် ဟီုထိုၚ်သးတုဲ ဒှ်သရာဲသ္ဂံၚ်တံရောၚ်ဂှ် ဟီုဂးလဝ်ရ။
ပူတေန်ဂှ် ဗ္တိုက်ၜက်ၜေတ်လဝ် ယူကရုၚ်ရောၚ် ဟွံရပ်စပ်တုဲ ဟီုဂးဏာလဝ် ဗဒှ်လဝ်ပရေၚ်ပၞာန်ဗွဲတၟေၚ် မဒှ်ရ။
အစောံဇြဟတ်နျူကလဳယျာရုယှာ ဗလးတိ၊ ဗလးဍာ် သီုကဵုဂၠးအကးသတံသီုဖအိုတ် ညံၚ်ဂွံဗဗွဲကဵုခေတ် ကၠောန်လဝ်တုဲယျရောၚ် ပူတေန် ဟီုရ။
နကဵုတၚ်ဆဵုဂဗ ပရေၚ်ဗ္တိုက်နတဲဏံဂှ် ဒပ်ပၞာန် ညံၚ်ဇြဟတ်ဂွံခိုဟ်ကၠုၚ် နူကဵုသွာၚ်နာနာ ကၠောန်အာဏောၚ်ဂှ်လေဝ် ပူတေန် သ္ဂးလဝ်ရ။
ပ္ဍဲအရာကၠောန်သ္ပ ညံၚ်ဒပ်နျူကလဳယျာ ဒပ်ဍာ် ဂွံဂတာပ်ခေတ်ဂှ် တၟံကၠံပေၚ်ၚ်တုဲဒှ်အာယျဂှ်လေဝ် ပူတေန် ဟီုဂးလဝ်ရ။
နကဵုရုယှာ ကၠောန်ပ္တိတ်လဝ် ကမ်လှောဝ် Zircon မြက်နူရမျာၚ်တၟိ တၟာဂလိုၚ်ရောၚ် ညးသ္ဂးလဝ်ကီုလေဝ် စမ်ၜတ်လဝ်ကမ်လှောဝ်တံဏံ တုဲယျဟာဟီုဂှ် ဟွံဂွံတီကေတ်ဏီရ။
လွဟ်ကဆံၚ်သၠုၚ်ရုယှာ တိတ်လက္ကရဴအိုတ်ဏံဂှ် ဍုၚ်ဗက်ဂတာပ် ဟွံမွဲဏီပုဟ်ဂှ်လေဝ် ပူတေန် မွဲဏှမွဲဏှ ကေတ်ဂုန်စရာဲ လေပ်ဟီုပ္တိတ်ရ။
Ref: Reuters