ဗေကျေန်၊ ဖေဖဝ်ဝါရဳ ၂၄
ဥက္ကဌ ကၠတ်ထဝ်သၟဝ်အမေရိကာန် က္ဍိုက်က္ဍိုပ်တုဲ အာစိုပ်လဝ်ထိုၚ်ဝါန် ကဵုအမာတ်ကၠတ်ထဝ် ၄ တၠဂှ် ကြုက် ပ္တိုန်ဒုဟ်ဗျိပၠုတ်လဝ်တုဲ ဣဏံဝွံ လုပ်ပလာပ်ပထုဲ ကာအပ္ဍဲဍုၚ်ညးတံဏောၚ်ဂှ် ဟီုလဝ်ရ။
ပရေၚ်ဆက်ဆောံ အကြာညးစၞးထိုၚ်ဝါန်တံကဵု အမေရိကာန် ဗီုပြၚ်လဵုဒှ်ဒှ် နကဵုကြုက် ဒဒှ်ရဒစဵုဒစးပေၚ်ၚ်ဂှ်ကီု၊ အမေရိကာန် လုပ်ပလာပ်ပထုဲ ပ္ဍဲပရေၚ်ထိုၚ်ဝါန်ဂှ်လေဝ် ဒဒှ်ရဒစဵုဒစးဂှ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ကြုက် မာအိုဝ်နေန် ကဵုလဝ်သမ္တီ ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် လၟေၚ်ၚ်ဂှ်ရ။
မိုက်ဂဝ်လာ သ္ကိုပ်သ္ကတုဲ ဂကောံညးစၞး ကောန်ဂကောံ ၅ တၠပါဂှ်ဝွံ ပ္ဍဲဂိတုဖေဖဝ်ဝါရဳ ၂၂ တေံ အာစိုပ်လဝ်ထိုၚ်ဝါန်တုဲ ဆဵုဂဗလဝ်ကဵု ဒုသမ္မတ လိုၚ်ချေန်တဳ ကလိဂွံလဝ်ဇၞး ပ္ဍဲပေါဲရုဲမာဲဂှ်ကဵု သမ္မတသာၚ်အေန်ဝါန်တံရ။
ညံၚ်ဂွံဒေါအ်ဒေၚ်ကဵု ပရေၚ်ဆက်ဆောံ ကုထိုၚ်ဝါန် ဗွဲမလုပ်သၞောဝ်တံဂှ်ကီု၊ သွက်ဂွံရှ်ေသှ်ေဒ္ဂေတ်ဗက် ဒဒှ်မဍုၚ်ကြုက်မွဲရနွံဂှ် ဌာနဝန်ဇၞော်ကာဍုၚ်သ္အာၚ်ကြုက် ဖ္တိုက်ဖ္အောဝ်တုဲ သွက်ဂွံပစၟတ်သမ္တီ ကုကိစ္စထိုၚ်ဝါန် ထုဲထံၚ်တုဲ ဟွံဒုၚ်လုက်ဒွံတံဂှ် ဖ္တိုက်ဖ္အောဝ်လဝ် အမေရိကာန်ရောၚ် မာအိုဝ်နေန် ဟီုရ။
ပရေၚ်ဆက်ဆောံ အကြာအမေရိကာန် ကေုာံ ထိုၚ်ဝါန်ဂှ် ကြုက် ဒစဵုဒစးဒၟံၚ် လအ်ကီုလေဝ် ဒက်လဝ်ကမ္မတဳကၠတ်ထဝ်အမေရိကာန် စပ်ကဵုဍုၚ်ကြုက်ဂှ် ဗွဲတၟေၚ် ဟွံပြေစိုတ်ဒှ်ဒၟံၚ်ရ။
လောန်ကၠုၚ် သၞာံ ၂၀၂၂ ဂှ်လေဝ် အခိၚ်ဥက္ကဌကၠတ်ထဝ် အမေရိကာန် နာန်သဳပလိုဝ်သဳ ကၠုၚ်စိုပ်ဂှ် ကြုက်ဝွံ ကၠောန်သ္ပပရေၚ်ပ္ကတ်ပ္ကေၚ်ပၞာန် ပန်ပှော်နတဲတံတုဲ ကလေၚ်ခၠေဝ်ပလန်လဝ် မွဲဒမြိပ်တ္ကအ်ထိုၚ်ဝါန် ဟွံအောန်နူကဵု ၅ ဒၞါဲကီုလေဝ် အလန်ဏံဂှ်တှ်ေ ပရေၚ်ခၠေဝ်ပလန်ပရေၚ်ပၞာန် ဇၞော်ဇၞော်တံ နွံကၠုၚ်ဂှ် ဟွံထေၚ်လဝ်ညးသ္ကအ်ရ။
ပရေၚ်ဆက်ဆောံ အကြာကြုက်ကဵု အမေရိကာန် မကြံၚ်မ္ၚိုဟ်ဒၟံၚ်ဂှ် ရန်ကဵုသ္ဂောံပြေပြံၚ်တုဲ သမ္မတၜါတၠ ဆဵုဂဗသဳကၠဳလဝ်ရ။
အမေရိကာန် ကြဴနူလလောၚ်တြးလဝ် သွံတြးအာ လွဟ်လက်နက် ကုထိုၚ်ဝါန် ၚုဟ်မးမၞုံ ၜိုတ် ၇၅ ပြကောဋိကိုဋ်ဒဝ်ဠာဂှ်ဏောၚ်တုဲဂှ် လၟေၚ်တရဴကမ္မတဳကၠတ်ထဝ် မံက်တိတ်ကၠုၚ်လဝ်ရ။
Ref: AP