ကိဗ်၊ ဖေဖဝ်ဝါရဳ ၂၇
အပ္ဍဲပၞာန်ၜက်ၜေတ်ရုယှာဂှ် ကောန်ဒပ်ယူကရုၚ် ၃၁၀၀၀ ဒးပြဟ်လလုဲအာလဝ်တုဲ လၟိဟ်ကောန်ဒပ် ကလိဂွံလဝ်ဝပ်တံဂှ် ဟိုတ်နူဒှ်အာအထံက်အရီု သွက်သ္ဂောံဓဇက်အစဳဇန် ဒပ်ပၞာန်ရုယှာမာန်ဂှ်ရ ထ္မံက်ပ္တိတ်ဟီုအာဟွံသေၚ်ပုဟ်ဂှ် သမ္မတ ဇြဳလာန်သကဳ ဟီုရ။
လၟိဟ်ဇီုကပိုက်ချိုတ်အာတံဂှ် သၞာဲဒဴယူကရုၚ်တံ ထ္မံက်ထ္ၜးလဝ် ဗွဲမလုပ်သၞောဝ်ဟွံမွဲတုဲ တၚ်ခယျတၞဟ်ဟ်တံဂှ်တှ်ေ ဂၠိုၚ်နူကဵု လၟိဟ်ဇြဳလာန်သကဳဟီုဂှ်ဏီဂှ် သ္ဂးလဝ်ရ။
ဒၟါနူအရီုအဗၚ်ဍုၚ်ပလိုတ် မပလံၚ်ဗစိုပ် ယူကရုၚ်တံသီုဖအိုတ် ဟိုတ်နူလဇုဲလဇဒၟံၚ် ၜိုတ်ကဝက်ဂှ်ရ ဒးဆောံလေၚ်ဒၟံၚ် လမျီု ကေုာံ တွဵုဒၞက်တိဍာ်တံရောၚ်ဂှ် ဌာနဝန်ဇၞော်ကာစဵုဒၞါ ယူကရုၚ် သ္ဂးလဝ်တုဲဂှ် စရၚ်ဒးပြဟ်လလုဲအာလဝ်တံ မံက်တိတ်ကၠုၚ်လဝ်ရ။
သမ္မတဇြဳလာန်သကဳဂှ် ဟိုတ်နူလ္ပာ်ရုယှာတံ ဟီုဇၞော်ဒၟံၚ်ဍာ် လၟိဟ်ကောန်ပၞာန်ယူကရုၚ်တံ ဒးပြဟ်လလုဲအာဂှ်တုဲ ဒးဟီုပ္တိတ်ကၠုၚ် လၟိဟ်မ္ဒးပြဟ်လလုဲအာ ဗီုလၟုဟ် ဍာံဍာံပြပြရောၚ်ဂှ် သ္ဂးရ။
ပ္ဍဲကဵုတိဍာ်ယူကရုၚ် ရုယှာသီဂွံလဝ်တံဂှ် ကောန်အရာပ်ချိုတ်အာတံ နွံဒၟံၚ်ဂၠိုၚ်ကဵုလ္ၚီတုဲ လၟိဟ်ချိုတ်တ်ပၠိုတ်တ်ဂှ်တှ်ေ ဟွံဂွံတီကေတ်ဏီပုဟ်ဂှ် သမ္မတ ဇြဳလာန်သကဳ ဟီုလဝ်ဏီရ။
ကောန်ပၞာန်ယူကရုၚ် ဒးပြဟ်လလုဲအာ အပ္ဍဲပေါဲပၞာန်ဂှ် နွံဒၟံၚ် ၇ ဠက်တုဲ မၞိဟ်ဇီုကပိုက်ကလိဂွံဝပ်တံဂှ် ၁၂၀၀၀၀ နွံရောၚ် သၞာဲဒဴအမေရိကာန်တံ ချိၚ်ခယျထ္မံက်ထ္ၜးလဝ် အပ္ဍဲဂိတုအဝ်ဂါတ်တုဲကၠုၚ်တေံရ။
ပ္ဍဲကဵုတၚ်ချိၚ်ခယျ ဌာနဝန်ဇၞော်ကာစဵုဒၞါဗျိတိၚ် အပ္ဍဲဂိတုဖေဖဝ်ဝါရဳဂှ် ကောန်ပၞာန်ရုယှာ ၃၅၀၀၀၀ ဇီုကပိုက်ချိုတ်အာလဝ်ရောၚ် ထ္မံက်ထ္ၜးလဝ်တုဲ သမ္မတယူကရုၚ် ဇြဳလာန်သကဳဂှ် ကောန်ပၞာန်ရုယှာ ၁၈၀၀၀၀ ချိုတ်တုဲ ဂၠိုၚ်ကဵုလ္ၚီ ကလိဂွံလဝ်ဝပ်ရောၚ် ဟီုလဝ်ရ။
အရီုဗၚ်ဍုၚ်ပလိုတ်တံ ဟိုတ်နူဟွံစိုပ်ကၠုၚ် ဗွဲမဂတာပ်အခိၚ်ဂှ်တုဲ လ္ပာ်ဇကုတံ ပရေၚ်ဇီုကပိုက် သာဂၠိုၚ်ဒၟံၚ်ရောၚ် ဝန်ဇၞော်ကာစဵုဒၞါယူကရုၚ် သ္ဂးရ။
သွက်ဂွံပလံၚ်အရီုဗၚ်ကုယူကရုၚ် အခိၚ်ကၠတ်ထဝ်အမေရိကာန် ကေတ်တၚ်တုပ်စိုတ် ခက်ခုဲဒၟံၚ်ဂှ် ဥရဝ်ပတံဂှ် အတိုၚ်ကတိ ညးတံကဵုလဝ် သွက်ဂွံပလံၚ်ဗစိုပ်ကဵုအရီုဗၚ် ကုယူကရုၚ်ဂှ် ဟွံရေၚ်တၠုၚ်လဝ်ရ။
Ref: BBC