နျူဒေလဳ၊ မာတ် ၅
ကောန်ဍုၚ်အိန္ဒိယ ဟွံအောန်နူကဵု ၂၀ ဒးဒုၚ်လီဠာန်လဝ် ဂွံကလောန်ဏောၚ်တုဲ ဒးဒုၚ်ပၠောပ်စုတ်လဝ် ပ္ဍဲဒပ်ပၞာန်ရုယှာတံဂှ်ဝွံ ဒးဒၟံၚ်ဒၞက် ပ္ဍဲကဵုမုက်ပၞာန်ပေါဲပၞာန်ယူကရုၚ်ဂှ် ဂွံတီကေတ်ရ။
လီဠာန်ညးတံ ဂွံကလောန်ခိုဟ်ဟ် ပ္ဍဲဒူဗိုၚ်ဏောၚ်တုဲ သွက်ဂွံကၠုၚ်စိုပ် ယူအေအဳ တံၚ်ဂြဲအာရီုတုဲဂှ် ဒးဒုၚ်ပလံၚ်ဗစိုပ်လဝ်ရုယှာရောၚ် ဂြောဝ်ဂတာ ညးမဒးလုပ်ဒၟံၚ်ပေါဲဗ္တိုက်သွက်ရုယှာတံ သ္ဂးရ။
ကောန်ဍုၚ်အိန္ဒိယ သ္ပအေဂျေန် ဖျေံဒၟံၚ်သ္ဇိုၚ် ပ္ဍဲဍုၚ်ယူအေအဳဂှ်ဝွံ လလောၚ်ဂွံကလောန်ခိုဟ်ဟ် သာ်ဏံတံဂှ် ပ္တိုန်ဒၟံၚ် ပ္ဍဲကဵု Youtube ချာန်နေဝ် Baba Vlogs ရ။
သွက်ဂွံဂွံကလောန် ပ္ဍဲဒေသသ္ကုတ်လဒေါဝ်ဗၟံက်တေံဂှ် ဒးကဵုလဝ်ၚုဟ်အေဂျေန် ၃၀၀၀ ပံၚ်တုဲ မၞိဟ်ဒးဒုၚ်ပလံၚ်လဝ် ရုယှာတံဂှ်ဝွံ ညးဟွံဂွံအဆက် ကုဂြောဝ်ဂတာတံလေဝ် နွံဒၟံၚ်တၟာဂလိုၚ်ဂှ် ဂွံတီကေတ်ရ။
အတိုၚ်ဂလာန် ညးဂွံလဝ်အဆက်တံဟီုဂှ်မ္ဂး စိုပ်ဒၟံၚ်ပ္ဍဲဒပ်ပၞာန်ရုယှာရောၚ် ဂွံတီကေတ်ဂှ်ရ ဂြောဝ်ဂတာညးတံ ဒးလကိုတ်အံသဝ်လဝ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် မၞိဟ်ကလိလောန်အမှုရာဇဝတ် ဇၞော်ကဵုဇြဟတ်တုဲ ဒးဒၟံၚ်ထံၚ်တံဂှ်လေဝ် ယဝ်ရလုပ်ပ္ဍဲဒပ်ပၞာန်မ္ဂး ကဵုအခေါၚ်ဗၠးနူဒုဟ်ဒဏ်ဏောၚ်ဂးတုဲ သမ္မတရုယှာ ဗလာဒဳမာပူတေန် ပကောံပ္ကေဝ်ဒၟံၚ်ကောန်ပၞာန်တံ ကၠောန်ၜိုတ်ဒၟံၚ်ရောၚ် ဂွံတီကေတ်ရ။
ခြာဟွံလအ်တေံဂှ်လေဝ် ဒပ်ပၞာန်ရုယှာ ကော်ကေတ်ဒၟံၚ် ကောန်ဍုၚ်နဳပဝ်တံ နဒဒှ်ကောန်ပၞာန်စလိၚ်တံ နွံဒၟံၚ်ဂှ် ပရိုၚ်မံက်တိတ်လဝ်ဏီရ။
အလဵုအသဳနဳပဝ်ဂှ် ညံၚ်ဂွိုအ်ကော် ကောန်ဍုၚ်ညးတံ နဒဒှ်ကောန်ပၞာန်လိၚ်ဂှ် ကဵုလဝ်သတိရုယှာတုဲ ကောန်ဍုၚ်ညးတံဂှ် အိန္ဒိယ ကေုာံ ဗျိတိၚ်တံဟေၚ် သွက်ဂွံကော်နဒဒှ်ကောန်ပၞာန်လိၚ် တုပ်လဝ်စိုတ်နွံဂှ် ခၠေဝ်ပလန်လဝ်ရ။
Ref: Telegraph