နျူဒေလဳ၊ မာတ် ၆
သၟာဗ္ၚထ္ၜးဆန္ဒ ဍုၚ်အိန္ဒိယတံဝွံ လုပ်စိုပ်ဍုၚ်ဇၞော် နျူဒေလဳ နကဵုကွဳပၟတ်၊ ကွဳစက် (Bus) တံဂှ်တုဲ သွက်ဂွံသၠုၚ်ပ္တိုန်အသိၚ် ပရေၚ်ထ္ၜးဆန္ဒညးတံဂှ် စဳဇန်ဒၟံၚ်ရောၚ် ဂွံတီကေတ်ရ။
ပြဟ်ဟ်ဏံ ပ္ဍဲကဵုဒၞါဲပယျဵု ကၟာတ်လဒဵုလဝ် နကဵုစက်ထဲတိတံဂှ်လေဝ် လၟိဟ်သၟာဗ္ၚတံ ဂၠိုၚ်တိုန်ကၠုၚ်ဒၟံၚ်ဂှ် ဂွံတီကေတ်ရ။
သၟာဗ္ၚဂၠိုၚ်ကဵုလ္ၚီ နကဵုက္ဍိုပ်လိက် ဇက်တိုန်ဒေလဳအိုတ်စိုအ် (ဒေလဳချာလိုဝ်) ဂှ် ပ္ဍဲဂိတုတုဲကၠုၚ်တေံ စဇက်ဂၠေါဲတိုန်လဝ်ကီုလေဝ် နူကဵုဇမ္ၚောဲသၟဝ်ကျာဍုၚ် ၜိုတ် ၂၀၀ ကဳလောမဳတာဂှ် ဒးဒုၚ်ဗဒေါအ်လဝ် ကဵုဒပ်ဂီုကၠီုတံ နကဵုဗုမ်ဍာ်ရမတ်၊ ပိုက်သိုဟ်ပၠိုတ်ပၟတ်တံရ။
သၟာဗ္ၚ အာတ်မိက်ဒၟံၚ် သ္ဂောံသၠုၚ်ပ္တိုန်ကဵုၚုဟ် သွက်သြောံသ္ၚုညးတံဂှ်ဝွံ ကြဴနူပရေၚ်တက်ကျာ ဟွံအံၚ်ဇၞးကၠုၚ် ဂၠိုၚ်ၚ်ကဵုဝါတုဲဂှ် သ္ဂုတ်သွာတ်လဝ် သွက်ဂွံသၠုၚ်ပ္တိုန်ပရေၚ်ထ္ၜးဆန္ဒညးတံရ။
သၟာဗ္ၚဗွဲမဂၠိုၚ် နူကဵုတွဵုရးနာနာ စပ္တံနူကဵုတွဵုရး ကာရာလာ သ္ကုတ်သၠုၚ်ကျာ စဵုကဵု တွဵုရးမာဒယာ ပရာဒါတ် သ္ကုတ်လဒေါဝ်တံဂှ် စိုပ်နျူဒေလဳ ပ္ဍဲတ္ၚဲဗုဒ္ဓဝါဏံ နကဵုကွဳပၟတ်၊ ကွဳစက်တံဏောၚ်ဂှ် က္ဍိုပ်သ္ကိုပ်သၟာဗ္ၚ ရာမာန်ဒိဗ်သာန်မာန် ဟီုရ။
သၟာဗ္ၚ နူကဵုတွဵုရးပေါန်ဂျာပ် ကေုာံ တွဵုရးဟာယာနာတံဂှ်လေဝ် ပ္ဍဲကဵုဒၞါဲထ္ၜးဒၟံၚ်ဆန္ဒလၟုဟ်တံဂှ်ရ ဆက်ထ္ၜးဒၟံၚ်ဆန္ဒ စက်ထဲတိတံဂှ်တုဲ ညးတံလေဝ် သွက်ဂွံလုပ်စိုပ် ဍုၚ်နျူဒေလဳ နကဵုစက်ထဲတိတံဂှ် ပ္တိတ်ဒၟံၚ်ဇြဟတ်ရောၚ် ဂွံတီကေတ်ရ။
သၟာဗ္ၚဂၠိုၚ်ကဵုလ္ၚီ ဗွဲအဓိက နူကဵုသ္ကုတ်သၟဝ်ကျာ တွဵုရးပေါန်ဂျာပ် ကေုာံ တွဵုရးဟာယာနာ နကဵုစက်ထဲတိ ၜိုတ် ၃၀၀၀ ဂှ် ဒးဒုၚ်ဗဒေါအ်လဝ် နူကဵုဒပ်ဗၠာဲသၟိၚ်တံ ပ္ဍဲကဵုပယျဵုတွဵုရးတံဂှ်ရ။
ဒပ်ဂီုကၠီုတံဂှ် ၜုၚ်တက်ကဵုလေံဒုက် ကၠဟ်ဖျေံဒၟံၚ်ဗုမ်ဍာ်ရမတ်တံ နကဵုဒရုၚ်တုဲ ဟိုတ်နူပဋိပက္ခၜါလ္ပာ်တုဲ မၞိဟ်ဇီုကပိုက်ကလိဂွံဝပ်တံလေဝ် နွံဒၟံၚ်တၟာဂလိုၚ်တုဲ ညးထ္ၜးဆန္ဒမွဲတၠလေဝ် ချိုတ်အာလဝ်ဂှ် သၟာဗ္ၚဂမၠိုၚ် ဟီုရ။
ကၠုၚ်စိုပ် ပ္ဍဲဂိတုမာတ် ၁၀ ဏံ သၟာဗ္ၚဂမၠိုၚ်ဝွံ ကၟာတ်အာ ဂၠံၚ်ကွဳပၟတ်တံ ဗွဲတွဵုမအောန် ၄ နာဍဳဏောၚ်ဂှ် က္ဍိုပ်သ္ကိုပ်သၟာဗ္ၚဂမၠိုၚ် ဟီုဂးလဝ်ရ။
Ref; Reuters