ပျုၚ်ယာန်၊ မာတ် ၈
က္ဍိုပ်သ္ကိုပ်ကိုဝ်ရဳယျာသၟဝ်ကျာ အာစိုပ်ဆဵုဂဗ ကုကောန်ပၞာန် ပ္ကတ်ပ္ကေၚ်ဒၟံၚ် ပ္ဍဲဗ္ဒိုပ်ဖျေံသ္ဇိုၚ်ပရေၚ်ပၞာန် သ္ကုတ်ပလိုတ်ကၟိန်ဍုၚ်ဂှ်တုဲ သွက်ဂွံသၠုၚ်ပ္တိုန်အသိၚ် ဒစးဒုၚ်ပလေဝ်ပလေတ် သွက်ပေါဲပၞာန်ဂှ် ကဵုလဝ်အမိၚ်ရောၚ် ဌာန်ပရိုၚ်ကၟိန်ဍုၚ်ပိုၚ် KCNA ထ္မံက်ထ္ၜးလဝ်ရ။
ကိုဝ်ရဳယျာသၠုၚ်ကျာ ကြဴနူပံၚ်တောဲပ္ကတ်ပ္ကေၚ်ပရေၚ်ပၞာန် ကုအမေရိကာန် နကဵုဇြဟတ်ပၞာန် ဂၠိုၚ်နူကဵုသၞာံတုဲကၠုၚ်တေံ ၜါဆတုဲဂှ် ကေန်ဂျုၚ်အာန် အာစိုပ်လဝ် ဗ္ဒိုပ်ဖျေံသ္ဇိုၚ်ပၞာန်ညးရ။
ဗွဲမဗဗွဲကဵုတၚ်နွံပၟိက် သွက်အကာဲအရာက္တဵုဒှ်ဒၟံၚ်လၟုဟ်တံဂှ် သွက်ဂွံပ္တိတ်ဇြဟတ် သၠုၚ်ပ္တိုန်အသိၚ် ဂွံဒှ်ဒၟံၚ်ဒတုဲ သွက်ပေါဲပၞာန်ဂှ် ကေန်ဂျုၚ်အာန် ဖ္တိုက်ဖ္အောဝ်လဝ် ကောန်ပၞာန်ကိုဝ်ရဳယျာသၟဝ်ကျာတံဂှ် ထ္မံက်ထ္ၜးလဝ် ပ္ဍဲ KCNA ရ။
သွက်ပေါဲပၞာန် ဂွံကၠောန်သ္ပဒစးဒုၚ်ပလေဝ်ပလေတ် ဗွဲမသၟဟ်အစောန်ဂှ်ကီု ညံၚ်အစောံစရာဲပရေၚ်ဗ္တိုက် ဂွံတောတက် သွက်ဂွံကၠောန်ၜိုတ်အိုတ်ဂှ်လေဝ် က္ဍိုပ်သ္ကိုပ်ကေန် ဟီုလဝ်ရ။
သ္အာၚ်နူဂှ်ပၠန် ကေန်ဂျုၚ်အာန်ဂှ် ပရေၚ်ပံၚ်တောဲပ္ကတ်ပ္ကေၚ်ပရေၚ်ပၞာန် အမေရိကာန် ကေုာံ ကိုဝ်ရဳယျာသၠုၚ်ကျာဂှ်ဝွံ သွက်ဂွံဗ္တိုက်ၜက်ၜေတ် ဍုၚ်ဇကုတံတုဲ ဒစးဒုၚ်ပ္ကတ်ပ္ကေၚ်ဒၟံၚ်ဏောၚ် ဟီုလဝ်တုဲ ပွမဗျိပၠုတ်တံလေဝ် ကၠောန်သ္ပလဝ်ဏီရ။
ပ္ဍဲဗ္ဒိုပ်ဖျေံသ္ဇိုၚ်ပၞာန်ဂှ် ကောန်ပၞာန်ကိုဝ်ရဳယျာသၟဝ်ကျာတံ ပါလုပ်ဗ္တိုက်ဒၟံၚ် ညံၚ်ရဴပ္ဍဲဗလးပေါဲပၞာန်တုဲ ပ္ကတ်ပ္ကေၚ်ဒၟံၚ်ဂှ် KCNA ကဵုလဝ်သမ္တီရ။
နကဵုအမေရိကာန် ကေုာံ ကိုဝ်ရဳယျာသၠုၚ်ကျာတံ သွက်ပြဝဗၠေတ်မှာ ညးတံကလိလောန်လဝ်တံဂှ် ဒးကလေၚ်ကဵု ဗွဲမဇၞော်ကဵုဇြဟတ်ဏောၚ်ဂှ်လေဝ် ညးမၞုံအခေါၚ်ဟီုဂး ဝန်ဇၞော်ကာစဵုဒၞါသၟဝ်ကျာ သ္ဂးလဝ်ရ။
ကိုဝ်ရဳယျာသၟဝ်ကျာဝွံ ညံၚ်ဒပ်ပၞာန်ညးတံ ဂွံဂတာပ်ခေတ် ကၠောန်ၜိုတ်ဒၟံၚ်တုဲ အပ္ဍဲသၞာံဏံလေဝ် ပရေၚ်စမ်ၜတ်ပန်ပှော်ကမ်လှောဝ်တံဂှ် ဆက်ကၠောန်ၜိုတ်အာဏောၚ်ဂှ် ဂွံတီကေတ်ရ။
Ref: Reuters