ပရာပ်၊ မာတ် ၇
ပ္ဍဲအရာရီုဗၚ်ယူကရုၚ် သွက်ဂွံဗ္တိုက်ပ္တိတ် ပရေၚ်ၜက်ၜေတ်ရုယှာတံဂှ် ညံၚ်ဂွိုအ်ဒှ် ညးဟၟဲကဵုသတ္တိတံဂှ် သမ္မတပြၚ်သေတ် အဳမာန်နျူရဴ မက်ကရောန် ဖ္တိုက်ဖ္အောဝ်လဝ် မဟာမိတ်တံရ။
သ္ဂောံဗလးဒပ်ဍုၚ်ပလိုတ်တံ ပ္ဍဲယူကရုၚ်ဂှ် ဟွံတးပါဲလဝ်ပုဟ် စပ်ကဵုဂလာန် သ္ဇက်ဒးဒှ်ကယျာန်ဓဝါန် မဟီုဂးလဝ် ပ္ဍဲသတ္တာဟတုဲကၠုၚ်တေံဂှ်တုဲ နကဵုညး ဒတူလိုၚ် ဗိုန်န်ဗတ်တ်ဂှ်လေဝ် မက်ကရောန် သ္ဂးလဝ်ရ။
အခိၚ်အာစိုပ် ဍုၚ်သမ္မတညးဍုၚ်ကွာန်ချက် မကဵုဒၟံၚ်ဇြဟတ်ဂရိုဟ် သ္ဂောံရာန်လွဟ်လက်နက် သွက်ယူကရုၚ် မ္ၚးဥရဝ်ပဂှ် မက်ကရောန် ဟီုကၠုၚ်သာ်ဏံရ။
ကြဴနူဆဵုဂဗကဵု သမ္မတချက် ပဳတာဗဴတုဲ မက်ကရောန်ဂှ် ပေါဲပၞာန်ယူကရုၚ်ဝွံ ပေါဲပၞာန်ပိုယ်သေၚ်၊ ဟွံသေၚ်ဂှ်လေဝ် မိက်ဂွံသၟာန်တဴဂှ် ဟီုဂးလဝ်ရ။
ပ္ဍဲဂိတုဖေဖဝ်ဝါရဳ ၂၆ တေံ သွက်ဂွံဗလးဏာ ကောန်ဒပ်ဍုၚ်ပလိုတ်တံ ပ္ဍဲယူကရုၚ် နွံဒၟံၚ်ရောၚ် ကြဴနူဟီုလဝ်တုဲဂှ် မဟာမိတ်ဥရဝ်ပ မက်ကရောန်ဗွဲမဂၠိုၚ် နကဵုညးတံ ဗလးအာကောန်ဒပ်တံ ပ္ဍဲယူကရုၚ် ဟွံသေၚ်ပုဟ်ဂှ်လေဝ် ဟီုလဝ်ရ။
နကဵုယူကရုၚ် မွဲလှ်ေမှ ဟွံကေၚ်အာတ်မိက်လဝ် ဒပ်ဍုၚ်ပလိုတ်တံပုဟ်ဂှ်လေဝ် ပ္ဍဲဂိတုမာတ် ၅ တေံ သ္ၚိကၠတ်ဗု ဟီုဂးလဝ်ရ။
နကဵုသမ္မတဇြဳလာန်သကဳ အာတ်မိက်လဝ်သာ်ဏံဟွံမွဲတုဲ အာတ်မိက်ဒၟံၚ်လွဟ်လက်နက်တံရနွံဂှ် ညးမၞုံအခေါၚ်ဟီုဂး ကံၚ်ဇြဳဂီုကၠီုကောန်ဂကူ ဂျောန်ကာဗဳ ဟီုလဝ်ကဵု အ္စာပရိုၚ်ဂမၠိုၚ်ရ။
သၞာဲဒဴပြၚ်သေတ်တံဂှ် သွက်ဂွံဗ္တိုက် ဒပ်ရုယှာတံဟွံသေၚ် နဒဒှ်ကောန်ဒပ်ပသောၚ်မာၚ်တံဂှ် ဗလးဏာဒပ်ဍုၚ်ပလိုတ်တံ ပ္ဍဲယူကရုၚ်မာန်ဂွံဒၟံၚ်ဂှ် ဟီုဂးလဝ်ရ။
နကဵုဍုၚ်လုပ်ဂကောံ နေတိုဝ်တံဂှ်လေဝ် ကၠောန်သ္ပပ္ကတ်ပ္ကေၚ်ကောန်ပၞာန်ဂမၠိုၚ် ပ္ဍဲယူကရုၚ်မာန်ဂှ် မက်ကရောန် ကဵုလဝ်သမ္တီရ။
Ref: AFP