မက္ကသဳကိုဝ်သဳတဳ၊ မာတ် ၉
ကြဴနူဒးဒုၚ်ဖျေံဒဏ်ထံၚ် ပ္ဍဲအမေရိကာန်တုဲ ဂိုၚ်ဖဳလေတ်ပဳ သ္ကိုပ်သ္ကပါလုပ်လဝ် ပ္ဍဲပရေၚ်ပၞာန်သီအဝဵု ၂၀၀၄ တေံ ကလေၚ်စိုပ်ကၠုၚ်ဍုၚ်ဟေတဳဂှ် သ္ကိုပ်ဝန်ဇၞော်လၟုဟ် သွက်ဂွံနုက်တိတ်ကဵုဂှ်ကီု ဒဒှ်ရညးမိက်ဂွံဒှ်သမ္မတဂှ် ဟီုဂးလဝ် ပ္ဍဲဂိတုမာတ် ၈ တေံရ။
သ္ကိုပ်ဝန်ဇၞော်လၟုဟ် အာရဳယဴ ဟေန်နရဳ မံၚ်ဒၟံၚ်ပ္ဍဲဍုၚ်သ္အာၚ်တုဲ ဗီုပြၚ်ဂွံစဴကၠုၚ်လေဝ် ဆန္ဒဟွံမွဲဂှ် ဟိုတ်နူပရေၚ်ပကီုပရာပ် နူကဵုဂိုဏ်ရာဇဝတ်တံ အာတ်မိက်ဒၟံၚ် သွက်ဂွံနုက်တိတ်ကဵု ဂိတုဗွဲမလအ်လဂှ်တုဲ ပ္ဍဲဟေတဳ ဂကောံအလဵုအသဳ ကြပ်သရိုဟ် ဒှ်ဒၟံၚ်ရ။
ပ္ဍဲကဵုအေန်တာဗျူ ကဵုဌာန်ပရိုၚ်ရိုက်တာဂှ် ဖဳလေတ်ပဳ အာယုက် ၅၆ သၞာံ သီုကဵုဒှ်သ္ကိုပ်ဗၠာဲသၟိၚ်တြေံဂှ် နကဵုကောန်ဍုၚ်ဟေတဳတံ ထေက်ကဵုဒးသ္ဂုတ်သွာတ် အနာဂတ်ကၟိန်ဍုၚ် ဒဒှ်ရပတှ်ေစှ်ေစိုတ်ဂှ် ဟီုလဝ်ရ။
သ္ကိုပ်ဝန်ဇၞော် ဟေန်နရဳဝွံ ဂွံဗ္တိုက်သရိုဟ် ဂိုဏ်ရာဇဝတ် မအုပ်ဓလီုလဝ် အပ္ဍဲဍုၚ်တံဂှ်တုဲ သွက်ဂွံဗလးကဵု ဒပ်ဂီုကၠီုကုလသမဂ္ဂ သၟဝ်ပၠတရဴကေန်ညာ ကြဴနူအာတ်မိက်တုဲဂှ် ပ္ဍဲသတ္တာဟတုဲကၠုၚ်တေံ တိတ်အာနူဍုၚ်ဟေတဳရ။
ပ္ဍဲဍုၚ်ဇၞော် ပသ်အဝ်ပရေန်ဂှ် ဒးကၟာတ်လဝ်သၞေဟ်က္ၜၚ်ကျာအဓိကဂှ်တုဲ ဟိုတ်နူပွပကီုပရာပ်တံတုဲ အခိၚ်မၞိဟ်ဂၠိုၚ်ကဵုလ္ၚီ ထောံလသာသ္ၚိဌာန် အခိၚ်ဒးဂြိပ်ဒဴဒၟံၚ်ဂှ် အလဵုအသဳ ဒဒှ်ရထပ်ပပဵုပ္တိုန်အာယုက် တၚ်လလောၚ်တြးအကာဲအရာကာတၟေၚ်ဂှ် လလောၚ်တြးလဝ် ပ္ဍဲဂိတုမာတ် ၇ တေံရ။
ဝန်ဇၞော်ကာဍုၚ်သ္အာၚ် အမေရိကာန် အာန်တိုဝ်နဳယိုဝ် ဘလေန်ကာန်ဂှ် ဖ္တိုက်ဖ္အောဝ်လဝ် ဟေန်နရဳ သွက်ဂွံကၠောန်သ္ပ ပြံၚ်လှာဲလွေဟ်ကၟိန်ဍုၚ်ရ။
ပ္ဍဲဟေတဳ ဂိုဏ်ရာဇဝတ်တံ ဖံက်ထံၚ်တုဲ ကြဴနူဗလးကဵု ကောန်ထံၚ်ဗွဲမဂၠိုၚ်ဂၠေၚ်တုဲဂှ် လလောၚ်တြးလဝ် အကာဲအရာကာမံက်တိုန်ရ။
Ref: Reuters