မဝ်သကိုဝ်၊ မာတ် ၁၂
က္ဍိုပ်သ္ကိုပ်ရုယှာ လ္ပာ်ဒစဵုဒစး မၞုံယၟု အလက်သဳနာဗဴနဳ မချိုတ်အာလဝ်ဂှ်ဝွံ ကၠာဂွိုအ်ချိုတ် ၜိုတ်မွဲဂိတု ပ္ဍဲကဵုထံၚ်ဂှ် ဒဒှ်ရညးဒးလဝ်ဂျိယျ ထေၚ်ကေတ်ဂှ် ဟီုလဝ်ရောၚ် ညးရေၚ်တၠုၚ်ဂဗုတ်ညး ဟီုရ။
အိုဝ်ဂါ မဳခေလိုဝ်ဗာ ရေၚ်တၠုၚ်ကဵုဒၟံၚ်ဂဗုတ် သွက်နာဗဴနဳ ပွိုၚ် ၁၆ သၞာံဂှ် အပ္ဍဲဂိတုဨပရဴ သၞာံ ၂၀၂၃ တေံ ဒဒှ်ရအာစိုပ်ဆဵုဂဗလဝ်ကဵု နာဗဴနဳဂှ် ဟီုလဝ်ကဵု ဌာန်ပရိုၚ်ရုယှာ Meduza ရ။
ပ္ဍဲကဵုအခိၚ်ဂှ် နာဗဴနဳဂှ် “ဍေံတံ ဂ္စါန်စုတ်ဒၟံၚ်ဂျိ ကုအဲဏောၚ် ထေၚ်ကေတ်ရ” သာ်ဝွံ ဟီုလဝ်ဂှ် မဳခေလိုဝ်ဗာ လဴထ္ၜးရ။
နာဗဴနဳ ဟီုသာ်ဂှ်တုဲ ညး ကလေၚ်လဴထ္ၜးလဝ် ပရိုၚ်ဏံလွာဲဂှ်တုဲ ပ္ဍဲတွေတ်တာလေဝ် ထ္မံက်ထ္ၜးလဝ်တုဲ အာတေၚ်လဝ် ဗွဲမလုပ်သၞောဝ်လေဝ် ကၠောန်သ္ပလဝ်ဂှ် သ္ဂးရ။
နာဗဴနဳ ညးမပါ်ပါဲ သမ္မတရုယှာ ဗလာဒဳမာပူတေန် ဟွံရံၚ်မုက်မတ်ဂှ်ဝွံ ပ္ဍဲဂိတုဖေဖဝ်ဝါရဳ ၁၆ တေံ ဒးချိုတ်အာလဝ် နကဵုအကာဲအရာသ္ဇက်ဒးဒှ်သံသယ ပ္ဍဲကဵုထံၚ် ဒယှ်ဒၟံၚ်နကဵုယၟုပရေံပရေံ ပ္ဍဲဒေသအာတေတ်ဏံရ။
နကဵုတၚ်စောဲစပ် ညးဂမၠိုၚ်ပတှ်ေလဝ် ပရေၚ်ဆဝ်မ္ၚုဟ်ပရေၚ်ဍုၚ်ကွာန်တံ ပါလုပ်ဂှ် ညး ဒးဒၟံၚ်ထံၚ် ပ္ဍဲကဵုထံၚ်စာတ်ဏံ နူသၞာံ ၂၀၂၁ တေံရ။
အခိၚ်ဂွံဆဵုကေတ် နာဗဴနဳ နကဵုမတ်ဂှ် ဟိုတ်နူဗီုပြၚ်ညးတုဲ ဒးလကိုတ်အံသဝ်အာလဝ်ဂှ် မဳခေလိုဝ်ဗာ ဟီုရ။
ပ္ဍဲကဵုထံၚ်ဂှ် ဟွံဗ္စစၞခိုဟ်ဟ် ကုနာဗဴနဳတုဲ တိက်ပၠန်လေဝ် ဟွံကဵုတိက်ခိုဟ်ဟ်တုဲ ကၟာတ်လဝ်တိုက်ဏောၚ်ဂှ် မဳခေလိုဝ်ဗာ ဟီုရ။
သီုကဵုကၟာတ်လဝ်အခေါၚ်လွဳယဲဂှ်တုဲ ညးအေၚ်စၞထ္ၜးဆန္ဒတုဲ ပ္ဍဲကဵုထံၚ် အကာဲအရာပရေၚ်ထတ်ယုက် ပရေံစှ်ေကၠုၚ်လဝ်ဂှ် ညးဆက်ဟီုလဝ်ရ။
ဌာနက္ဍိုက်ပ်ထံၚ်စာတ်ရုယှာဂှ် နာဗဴနဳ အဃောကွာ်ဒၟံၚ်ဂၠံၚ် ဝိုတ်ဒေါမ်စှ်ေအာလဝ်တုဲ ချိုတ်အာလဝ် အတိုၚ်ဓမ္မတာရဂှ် ဟီုဂးလဝ်ရ။
က္ဍိုပ်သ္ကိုပ်ဍုၚ်ပလိုတ်ဂမၠိုၚ် ပါလုပ်သီုကဵုသမ္မတအမေရိကာန် ဂျဵုဗိုၚ်ဒေန်ဂှ် လက္ကရဴ နာဗဴနဳဒးချိုတ်အာဏံ ပူတေန် ပါလုပ်ဒၟံၚ်ရောၚ် သ္ဂးလဝ်ကီုလေဝ် လ္ပာ်နန်ကရေန်မလေန်ဂှ် တးပါဲလဝ်ရ။
နာဗဴနဳဝွံ သၞာံ ၂၀၂၀ တေံလေဝ် ဒးဒုၚ်ကၠတ်ဂစိုတ် နကဵုဂျိလတေၚ်က္ဍဟ်တုဲ ကုသိုလ်ခိုဟ် ဗၠးအာလဝ်နူဘဲလမျီုရ။
Ref: Business Insider