ၜၚ်ကံက်၊ မာတ် ၁၉
သွက်ဂွံဘိုၚ်သောၚ်ကလး ပြသၞာက္တဵုဒှ်ဒၟံၚ် ပ္ဍဲဍုၚ်ဗၟာဂှ် ကမ္မတဳစပ်ကဵုကာဍုၚ်သ္အာၚ် ကၠတ်ထဝ်သေံ ပ္တိုန်လဝ်ဂလာန် အစဳဇန်ပန်တၚ်ရ။
ဥက္ကဌကမ္မတဳ အမာတ်ကၠတ်ထဝ်ဗော်ဖဳထာဲ နဝ်ပါဒေါန် ပါတ်တာမာဂှ် နကဵုကမ္မတဳဇကုတံ မၚ်ရံၚ်အကာဲအရာဍုၚ်ဗၟာတုဲ ထံက်အာဂလာန် အိုဿီုကဵုပြဝပ္တိတ်ဇြဟတ် ဂွံဖအိုတ်ကၠေံပြသၞာတံဏောၚ်ဂှ် သ္ဂးလဝ်ရ။
သွက်အလဵုအသဳသေံ ဂွံခၠေဝ်ပလန်မွဲမွဲသာ် ကမ္မတဳဂှ် ပၠောပ်လဝ်ဂလာန် တၚ်နၚ်ဒှ်အထံက်အပၚ် ၄ တၚ်ဂှ်ရောၚ် ညးဟီုရ။
နကဵုအလဵုအသဳ သွက်ဂွံမၚ်ရံၚ်အကာဲအရာဍုၚ်ဗၟာဂှ် ထေက်ကဵုဒးဒက်ဂကောံမွဲ ပါလုပ်သီုကဵုသၞာဲဒဴပရေၚ်ဂီုကၠီု၊ သၞာဲဒဴကာဍုၚ်သ္အာၚ်တံဂှ်တုဲ ပွမခၠေဝ်ပလန် ဍိုက်က်ပေၚ်ၚ်မွဲ ထေက်ကဵုဒးကၠောန်ဏောၚ်ဂှ် ညးသ္ဂးလဝ်ဏီရ။
သ္အာၚ်နူဂှ်ပၠန် သွက်ဂွံသောၚ်ကလး အသိၚ်ပေါဲဗ္တိုက်မသၠုၚ်တိုန်ကၠုၚ်မာန် မဓရိုဟ်ပလံၚ်ဒၟံၚ် လၟိဟ်ညးစ္ၜုဲစ္ၜော် ပ္ဍဲဒေသပယျဵုတံ ဂွံဂၠိုၚ်တိုန်ကၠုၚ်ဂှ် ထေက်ကဵုဒးချူဓဇက်အစဳဇန်သ္ဂောံသောၚ်ကလး ဗွဲမပြဟ်ဂှ်လေဝ် အမာတ်ကၠတ်ထဝ် ဗော်ဖဳထာဲဂှ် ကဵုလဝ်သတိရ။
ပ္ဍဲဍုၚ်ဗၟာ အပ္ဍဲဂိတုဨပရဴ ဟိုတ်နူထ္မံက်အာရုပ်ရဴ သၠုၚ်ပ္တိုန်အသိၚ် သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ပေါဲဗ္တိုက်တံ အသိၚ်သၠုၚ်တိုန်ကၠုၚ်မာန်ဂှ်လေဝ် သ္ဂးလဝ်ရ။
သွက်ညးမစ္ၜုဲစ္ၜော်ဒၟံၚ် ပ္ဍဲကွာန်ပိကွာန် လၟိဟ်မွဲဠက်ဂှ်သၟးဟွံသေၚ် ဟိုတ်နူပဋိပက္ခတုဲ ညးမဒးဇီုကပိုက်လဝ်တံသီုဖအိုတ် ဂွံကဵုအရီုဗၚ်စပ်ကဵုပရေၚ်ဗ္စာရဏာမၞိဟ်တံဂှ် အလဵုအသဳ ဒးသၠဲပ္တိုန်ထေက်တုဲ ပ္ဍဲကဵုပရေၚ်ကဵုအရီုဗၚ်ဂှ် အာဇြဳယာန် ထေက်ကဵုဒးပါလုပ်ဂှ် ညးဟီုလဝ်ရ။
နကဵုဍုၚ်သေံ ပ္ဍဲအရာသောၚ်ကလးပရေၚ်ဍုၚ်ဗၟာဂှ် ထေက်ကဵုဒးပါလုပ် ပ္ဍဲကဏ္ဍပၟိက်ဇၞော်တံဂှ်တုဲ လောန်ၜက်နူကဆံၚ်ကၟိန်ဍုၚ် မရီုဗၚ်ကဵုဒၟံၚ်ဂှ်တုဲ ဒးသၠုၚ်ပ္တိုန်ပွမပ္တိတ်ဇြဟတ်တံ ထေက်ဂှ် ကဵုလဝ်သမ္တီရ။
လက္ကရဴအိုတ် အလဵုအသဳသေံ သ္ကိုပ်သ္ကတုဲ သွက်ဂွံကဵုဇြဟတ်ဂရိုဟ် သွက်ပရေၚ်ၜိုဟ်လလမ်ဍုၚ်ဗၟာဂှ် ထေက်ကဵုဒးဒက်ဂကောံ နကဵုဍုၚ်သေံ၊ ဥက္ကဌအာဇြဳယာန်၊ ကြုက်၊ အိန္ဒိယတံဂှ်တုဲ ဂကောံဏံဝွံ ဒှ်ကၠုၚ်ယန္တယာ ဂွံချပ်ဂၞန်သဳကၠဳ မလုပ်သၞောဝ်မွဲဟွံသေၚ်ဏောၚ်ဂှ် ညးဟီုလဝ်ဏီရ။
ယန္တယာ ပ္တိုန်လဝ်ဂလာန်ဏံဝွံ ကိတ်ညဳဒၟံၚ်ကဵု အစဳဇန်ပရေၚ်ၜိုဟ်လလမ် တၚ်တုပ်စိုတ်အာဇြဳယာန် ၅ တၚ်ဂှ်လေဝ် မေဿတာ နဝ်ပါဒေါန် ဟီုရ။
ပရေၚ်ဍုၚ်ဗၟာဝွံ ၜိုန်ရအရာမထုဲထံၚ်တံ နွံဒၟံၚ်ကီုလေဝ် အာဇြဳယာန် ကေုာံ ဍုၚ်သေံ ဂွံကဵုဇြဟတ်ဂရိုဟ် သွက်ပရေၚ်ၜိုဟ်လလမ်ဂှ် ခက်ခုဲဒၟံၚ်ကွေံကွေံဟွံသေၚ်ပုဟ်ဂးတုဲ ယဝ်ရကၠောန်သ္ပတၚ်နၚ်တံဏံမာန်မ္ဂး အလုံဂၠးတိမွဲ သ္ပကၠုၚ်စၟတ်သမ္တီ ကုဍုၚ်သေံမာန်ဂှ် သ္ဂးလဝ်ရ။
အတိုၚ်အစဳဇန်အလဵုအသဳသေံ သ္ဂောံကဵုအရီုဗၚ် စပ်ကဵုပရေၚ်ဗ္စာရဏာမၞိဟ် ကၠာတေံဂှ်မ္ဂး ရေၚ်ယာန်ကဵုအရီုဗၚ်ကၠာအိုတ်ဂှ်ဝွံ နူကဵုဒဒန်သေံ−ဗမာ မွဲကဆံၚ် ပ္ဍဲဂိတုမာတ် ၂၅ တေံ လုပ်စိုပ်အာ ဍုၚ်ဗမာဏောၚ်ဂှ် ဂွံတီကေတ်ရ။
Ref: Bangkokpost