ဗေကျေန်၊ မာတ် ၂၀
နကဵုကောန်ဍုၚ်ကြုက် စိုပ်ဒၟံၚ်သေန်ကာပေါဝ်တံ သွက်ဂွံဝေၚ်ပါဲ ပွမဝေၚ်ၛၚ်လံၚ်သြန်တံအိုတ်ဂှ် ရုၚ်ကလုတ်ကြုက် ဖျေံသ္ဇိုၚ်သေန်ကာပေါဝ် ကဵုလဝ်သတိတုဲ ဝေၚ်ၛၚ်လံၚ်သြန်ဍုၚ်သ္အာၚ်ဂှ်ဝွံ ဝးပ္ကဝ်ဒၟံၚ် သၞောဝ်ဍုၚ်ကြုက်ဏောၚ်ဂှ် သ္ဂးလဝ်ရ။
အခိၚ်အလဵုအသဳ ပ္တိတ်ဒၟံၚ်ဇြဟတ် သွက်ဂွံဗ္တိုက်သရိုဟ် ကောန်ဍုၚ်ကြုက် ဝေၚ်ၛၚ်လံၚ်သြန် ပ္ဍဲအာယှဒိုဟ်အဂၞဲ ဒယှ်ဒၟံၚ်အကြာညးအာတရဴဂၠးတိတံဂှ် ရုၚ်ကလုတ်ကြုက်ပ္ဍဲသေန်ကာပေါဝ် ကဵုကၠုၚ်သတိ သာ်ဏံရ။
ပ္ဍဲသေန်ကာပေါဝ် ကမၠောန်ကာသဳနဝ်နွံၜါတုဲ Marina Bay Sands Casino နူကမ္ပဏဳ Las Vegas Sands ပံက်လဝ်ဂှ်ကဵု Resorts World Sentosa Casino နူကဵုကမ္ပဏဳ Genting Singapore တံ ပံက်လဝ်ဂှ် ဂွံတီကေတ်ရ။
နကဵုကောန်ဍုၚ်ကြုက် စိုပ်သေန်ကာပေါဝ်တံ ဆေၚ်စပ်ကဵုသၞောဝ်တုဲ ညံၚ်ဂွံနွံကဵုသတိဂှ် ကဵုဏာသတိ ဗွဲမဇြိုဟ်နက်ရောၚ် ရုၚ်ကလုတ်ကြုက် ကဵုလဝ်သမ္တီရ။
ရုၚ်ကာသဳနဝ် ဍုၚ်သ္အာၚ်တံဂှ်ဝွံ ၜိုန်ရပံက်လဝ်ဗွဲမလုပ်သၞောဝ်ကီုလေဝ် နကဵုကောန်ဍုၚ်ကြုက်တံ ပွမကၠောန်သ္ပဝေၚ်ၛၚ်လံၚ်သြန် တတ်ကၠောံဍုၚ်တံဂှ်ဝွံ ဝးပ္ကဝ်ဒၟံၚ် သၞောဝ်ဍုၚ်ဏောၚ်ဂှ် သ္ဂးလဝ်ရ။
သ္အာၚ်နူဂှ်ပၠန် ဟိုတ်နူဝးပ္ကဝ်သၞောဝ်သာ်ဏံတုဲ နကဵုရုၚ်ကလုတ်၊ ရုၚ်ဝန်ကဵုအရီုဗၚ်တံလေဝ် စဵုဒၞါကဵုဟွံမာန်ပုဟ်ဂှ် ကဵုလဝ်သမ္တီရ။
ညံၚ်ရဴရုၚ်ဖျေံသ္ဇိုၚ်ဍုၚ်သေန်ကာပေါဝ်ဂှ်ကီု ရုၚ်ကလုတ်ပ္ဍဲကဵု ကိုဝ်ရဳယျာသၠုၚ်ကျာ ကေုာံ ဍုၚ်သဳရိလၚ်္ကာတံဂှ်လေဝ် ကဵုလဝ်သမ္တီကောန်ဍုၚ်ညးတံ နကဵုတၚ်လလောၚ်တြး သာ်ဏံရ။
အလဵုအသဳကြုက်ဂှ် သၠုၚ်ပ္တိုန်အသိၚ်တုဲ ဗ္တိုက်သရိုဟ်ဒၟံၚ် ပွမဝေၚ်ၛၚ်လံၚ်သြန် လ္တူအောန်လိုၚ်၊ ပ္ဍဲဍုၚ်သ္အာၚ် ကေုာံ တတ်ၜက်ပယျဵုတံဂှ်ရောၚ်ဂှ်လေဝ် သ္ဂးလဝ်ရ။
သွက်ဂွံပလံၚ်ဖျဴ ကောန်ဍုၚ်ကြုက် ပါလုပ်ဒၟံၚ် ပ္ဍဲကဵုဝေၚ်ၛၚ်လံၚ်သြန် ၄၀ တၠပြၚ်ဂှ်လေဝ် ပ္ဍဲဂိတုဖေဖဝ်ဝါရဳ ၂၂ တေံ ညးတာလျိုၚ်ဍုၚ်ကြုက်ကဵု ဍုၚ်ဖဳလေတ်ပေန်တံ ပံၚ်တောဲရေၚ်တၠုၚ်လဝ်ရ။
နကဵုအလဵုအသဳကြုက် ပွမတိတ်စ္ဍးနူကဵုဍုၚ် သွက်ဂွံပါလုပ်ပ္ဍဲကဵုကမၠောန်ဝေၚ်ၛၚ်လံၚ်သြန် ကေုာံ ကမၠောန်ဗီုပြၚ်တုပ်ကဵု ဝေၚ်ၛၚ်တံသီုဖအိုတ်ဂှ် ဒစဵုဒစးတဴလၟိုန်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ရုၚ်ကလုတ်ဂှ်ရ။
Ref: Reuters