ဝါယှေန်တာန်၊ မာတ် ၂၁
ယူကရုၚ် ဂွံဒတူလိုၚ်ဂျိုၚ်အာဂှ် ဒှ်ဒၟံၚ်အန္တရာယ်ယျဂှ် ဝန်ဇၞော်ကာစဵုဒၞါအမေရိကာန် အေဝ်လွိုၚ်အဝ်သတေန် ကဵုလဝ်သတိရ။
ပ္ဍဲအမေရိကာန် ဂွံဆက်ထံက်ပံၚ်လွဟ်လက်နက် ကုယူကရုၚ် သြန်ဟွံမွဲရကီုလေဝ် သွက်ဂွံဆက်ရီုဗၚ် အလဵုအသဳကိဗ်ဂှ် အမေရိကာန် ကဵုလဝ်ကတိဖိုဟ်ရောၚ် ဝန်ဇၞော်ကာဍုၚ်သ္အာၚ် သ္ဂးလဝ်ရ။
သွက်ဂွံကဵုယူကရုၚ် ဒဝ်ဠာ ၆၀ ဗဳလျာန်ပၠန် သ္ဂောံပါ်မာဲသ္ဂုတ်သွာတ် သၞောဝ်အပြောံမွဲဂှ် ဥက္ကဌကၠတ်ထဝ်သၟဝ် မိုက်ဂဴဂျောန်ဇြေန် တးပါဲထောံလဝ် တၚ်ဖ္တိုက်ဖ္အောဝ်ဂှ်ရ။
ဂွံကဵုအရီုဗၚ် သွက်ယူကရုၚ် မတဝ်စၞေဟ်ကၠုၚ်ဒၟံၚ် ဒပ်ရုယှာ ပွိုၚ် ၂ သၞာံပြၚ်ကၠုၚ်ဂှ် သ္ၚိဗု ဂၠါဲဒၟံၚ်ဂၠံၚ် အိုတ်အစောန်ရ။
အခိၚ်ကၠောန်ဗဒှ်လဝ် ကောံဓရီုဂကောံလိက်ကသုက်စဵုဒၞါယူကရုၚ် ဍုၚ်မဟာမိတ် ထံက်ဂလာန်ယူကရုၚ် ၜိုတ် ၅၀ ဍုၚ်ပါ ပ္ဍဲကဵုဗ္ဒိုပ်ဖျေံသ္ဇိုၚ်ဒပ်ကျာ ရာမ်သတိန် ဍုၚ်ဂျာမနဳဂှ် ညးဟီုလဝ်သာ်ဏံရ။
ယူကရုၚ် ဂွံဆက်ဒတူလိုၚ်ဂျိုၚ်တဴအာ ဒှ်ဒၟံၚ်အန္တရာယ်ယျတုဲ ဂီုကၠီုအမေရိကာန် အန္တရာယ်နွံဒၟံၚ်ယျဂှ် အဝ်သတေန် ကြဴနူကောံဓရီုဏံတုဲ ဟီုလဝ် ပ္ဍဲကဵုပေါဲသောၚ်ကလးလိက်ပရိုၚ်ရ။
အမေရိကာန် ဂွံဆက်ထံက်ပၚ်ရီုဗၚ်ကဵု လွဟ်လက်နက် သွက်ပရေၚ်ဒတူလိုၚ်ယူကရုၚ် ကေုာံ ပရေၚ်အဝဵုဂွံတန်ကြန်ဂှ် နကဵုညး သ္ဂုတ်သွာတ်လဝ်ရောၚ် အဝ်သတေန် သ္ဂးရ။
ကြဴနူလွဳယဲ ကေန်သာ မလေပ်က္တဵုဒှ်ပ္ဍဲမၞိဟ်တြုံဂမၠိုၚ်တုဲဂှ် အဝ်သတေန် တိတ်လဝ်တရဴအလန်ကၠာအိုတ်ဂှ် သြန်ဗွဝ်ဟွံမွဲမွဲသာ် အမေရိကာန် သာ်လဵုဂွံရီုဗၚ် ယူကရုၚ်ရောဟီုဂှ် ဟွံဟီုလဝ်ရ။
ဟိုတ်နူအကာဲအရာ ကဵုသြန်ဗွဝ် ဟွံမာန်ဂှ်တုဲ ပ္ဍဲကဵုဗလးမုက်ပၞာန်ယူကရုၚ်တေံ အရာမဇီုကပိုက်တံ နွံဒၟံၚ်တုဲ အခိၚ်ဒပ်ရုယှာတံ ထ္ပက်ဒၟံၚ်ပၞာန်ဂှ် ဒပ်ပၞာန်ယူကရုၚ်တံဝွံ ဒးပလေဝ်ဒၟံၚ်ပၞာန်ဒုၚ် နကဵုလွဟ်ၜိုတ်မၞုံတံဏောၚ်ဂှ် သၞာဲဒဴဂမၠိုၚ် ဟီုလဝ်ရ။
ရုယှာဝွံ အပ္ဍဲမွဲဂိတု ဟိုတ်နူကၠောန်လဝ် ကမ်လှောဝ် ၁၃၀ မ၊ ပရေၚ်ဗ္တိုက်ဒရုၚ် ၃၂၀ ဝါပြၚ်၊ ပရေၚ်ဗ္တိုက် နကဵုမခတိုဟ်ထိၚ်သၞေဝ် (ပဲ့ထိန်းဗုံး) တံဂှ် ၉၀၀ ဝါပြၚ် ကၠောန်လဝ်ဂှ်ရ သွက်ဂွံထံက်ပၚ်ကဵု သၞောတ်စဵုဒၞါတရဴကျာတံဂးတုဲ သမ္မတဇြဳလာန်သကဳ အာတ်မိက်လဝ် မဟာမိတ်ဂမၠိုၚ်ရ။
Ref: Reuters