ဟိုဝ်နဝ်လူလူ၊ မေ ၅
ဝန်ဇၞော်ကာဍုၚ်သ္အာၚ် အမေရိကာန်၊ အဝ်သတြေလျ၊ ဂျပါန် ကေုာံ ဖဳလေတ်ဖေန်တံ သ္ပလဝ်ကတိ သွက်ဂွံသၠုၚ်ပ္တိုန်အသိၚ်ရေၚ်တၠုၚ်အာ ပရေၚ်ပံၚ်တောဲ ညံၚ်ဇြဟတ်သာဂွံခိုဟ်ဂှ် ဂွံတီကေတ်ရ။
အခိၚ်ပရေၚ်ဂွိၚ်ဂွါဲ စပ်ကဵုပရေၚ်ချဳဒရာၚ်ကြုက် ပ္ဍဲၜဳကြုက်သၠုၚ်ကျာ မံက်တိတ်ဒၟံၚ်ဂှ် ပ္ဍဲဂိတုမေ ၂ တေံ ကၠောန်ဗဒှ်လဝ် ပရေၚ်ဆဵုဂဗ အလန်ဒုတိယ ပ္ဍဲဟာဝိုၚ်ယဳရ။
ပ္ဍဲဂိတုတုဲကၠုၚ်တေံ ပန်ဍုၚ်ပံၚ်တောဲတုဲ ကၠောန်သ္ပပ္ကတ်ပ္ကေၚ်လဝ်ဒပ်ဍာ် အလန်ကၠာအိုတ် ပ္ဍဲၜဳကြုက်သၠုၚ်ကျာ ဂၠံၚ်ဍာ်အဓိက ဒှ်ကယျာန်ဓဝါန်ဒၟံၚ် အကြာဗေကျေန်ကဵု ဍုၚ်အာယှဒိုဟ်အဂၞဲလ္ၚဵုတံဂှ်ရ။ ကြဴနူဂှ်တုဲ ကောံဓရီုဏံ မံက်တိတ်ကၠုၚ်လဝ်ရ။
ဝန်ဇၞော်ကာစဵုဒၞါ အဝ်သတြေလျ ရေတ်ချက်မာလက်သ်ဂှ် ပ္ဍဲကောံဓရီုညးတံ သဳကၠဳလဝ် ပရေၚ်သ္ဂောံသၠုၚ်ပ္တိုန် အသိၚ်ပ္ကတ်ပ္ကေၚ် စပ်ကဵုပရေၚ်စဵုဒၞါတံဂှ်ရောၚ် ဟီုလဝ်ရ။
ကြဴနူကောံဓရီုဂှ်တုဲ ဝန်ဇၞော်ကာစဵုဒၞါအမေရိကာန် အေဝ်လွိုၚ် အဝ်သတေန် ဟီုကဵုအ္စာပရိုၚ်ဂမၠိုၚ်ဂှ် ပွမပ္ကတ်ပ္ကေၚ်ပရေၚ်ပၞာန်တံဂှ် အစောံစရာဲ ပံၚ်တောဲရေၚ်တၠုၚ် အကြာဍုၚ်ညးတံ တောတက်ကၠုၚ်တုဲ အကြာဒပ်ပၞာန်တံဂှ်လေဝ် ပရေၚ်ဆက်ဆောံ သ္ကဵုခိုၚ်ကၠိုက်လဝ်တုဲ ထ္မံက်ထ္ၜးလဝ် ကတိညးတံကဵုလဝ် ညံၚ်သၞောဝ်ဍုၚ်သ္အာၚ် ဂွံအုပ်လဒံ ပ္ဍဲဂၠံၚ်တရဴဍာ်တံဂှ်ရောၚ် ဟီုလဝ်ရ။
အဝ်သတေန်ဂှ် ဆဵုဂဗလဝ် ဝန်ဇၞော်ကာစဵုဒၞါဂမၠိုၚ် ပ္ဍဲဌာန်ဂအုပ်ပၞာန် စပ်ကဵုဒေသ ဒပ်ပၞာန်အမေရိကာန်ဂှ်တုဲ ကြဴနူပန်ဍုၚ် သဳကၠဳတုဲဂှ် ထပ်သဳကၠဳလဝ် ကုအဝ်သတြေလျ၊ ဂျပါန်တံ ဗွဲတၞဟ်ခြာရ။
ဝန်ဇၞော်ကာဍုၚ်သ္အာၚ် ပန်ဍုၚ်ဏံဝွံ နဒဒှ်အလန်ပထမကိုပ်ကၠာအိုတ် သၞာံတုဲကၠုၚ်တေံ ဆဵုဂဗလဝ် ပ္ဍဲသေန်ကာပေါဝ်ရ။ အကြာအမေရိကာန်ကဵု ပိဍုၚ်ဏံ စွံလဝ်တၚ်တုပ်စိုတ် စပ်ကဵုပရေၚ်စဵုဒၞါဂှ် လအ်ကၠုၚ်ကဵုစှ်သၞာံယျ မဒှ်ရ။
ၜဳကြုက်သၠုၚ်ကျာဂှ် ညးတံပိုၚ်လဝ်ရောၚ် အမေရိကာန် ၜိုန်ရဟွံဟီုကီုလေဝ် နဒဒှ်ထ္ၜးပျး အခေါၚ်အာကၠုၚ်တရဴဍာ် ဗွဲမဗၠးၜးဂှ်တုဲ မွဲဏှမွဲဏှ လေပ်ဗလးတဴ က္ၜၚ်ဒပ်ဍာ်၊ က္ၜၚ်ကျာဗ္တိုက်တံရ။
ၜဳကြုက်သၠုၚ်ကျာ သယံဇာတသဘာဝ နွံဂၠိုၚ်ဂၠေၚ်ဂှ် ညးတံပိုၚ်ရောၚ် ကြုက်ဟီုလဝ်တုဲ ဖဳလေတ်ဖေန်၊ ဗဳယေတ်နာမ်၊ မလေဝ်ယှာ၊ ထိုၚ်ဝါန် ကေုာံ ဘရူနာၚ်တံဂှ်လေဝ် သ္ကုတ်ညးတံ ဒဒှ်ရညးတံပိုၚ်ဂှ် ဟီုဂးလဝ်ရ။
Ref: AP