သေဒ္ဒနဳ၊ မေ ၇
ပရေၚ်ကၟာတ်လဒဵုကေတ်အရေဝ် ကုလသမဂ္ဂ ဖျေံစၟတ်လဝ် လ္တူကိုဝ်ရဳယျာသၟဝ်ကျာ ညံၚ်လမျီုဂွံလုပ် အခိၚ်ရေၚ်တၠုၚ်ဒၟံၚ်ဂှ် ဟိုတ်နူဒပ်ပၞာန်ကြုက်တုဲ ကောန်ပၞာန်ညးတံ ဒးဒှ်အန္တရာယ် ပ္ဍဲတွဵုဒၞက်ကျာ စပ်ကဵုဍုၚ်နာနာတံဂှ်ဝွံ ဒုၚ်တဲဟွံမာန်ပုဟ်ဂှ် သ္ကိုပ်ဝန်ဇၞော် အဝ်သတြေလျ အာန်တဝ်နဳယိုဝ် အေဝ်ဗာနိတ် ဟီုလဝ် ပ္ဍဲဂိတုမေ ၇ တေံရ။
အပ္ဍဲပရေၚ်ဆဵုဂဗဒိဓဗတ် ပ္ဍဲၜဳဍာ်မိတ် ဟွံဗၠးဘဲ ဒုၚ်တဲဟွံမာန်ဂှ် က္ၜၚ်ကျာသၞေၚ်ဝဲ စပ်ကဵုလ္ပာ်ပၞာန်အဝ်အသတြေလျ မွဲဖ္ဍိုက်ဝွံ ဟိုတ်နူက္ၜၚ်ကျာဗ္တိုက်ကြုက်တုဲ ဒှ်လဝ်အန္တရာယ်ရောၚ် သ္ဂးရ။
လ္တူယာန်သၞေၚ်ဝဲ MH60R Seahawk ဒပ်ဍာ်အဝ်သတြေလျဂှ်ကဵု မွဲဒမြိပ်ဂၠံၚ် ပ္ဍဲအရာရေၚ်တၠုၚ် ဂယိုၚ်ပ္တိုန် ပရေၚ်ကၟာတ်လဒဵုကေတ်အရေဝ် မဖျေံစၟတ်လဝ် လ္တူကိုဝ်ရဳယျာသၟဝ်ကျာဂှ် က္ၜၚ်ကျာဗ္တိုက် J-10 ဒပ်ဍာ်ကြုက် ထောံဖျေံလဝ် ပရက်ပၟတ်ဂဵုဂဵုတံရောၚ် ဝန်ဇၞော်ကာစဵုဒၞါ ရေတ်ချာတ်မာလက်သ် ဟီုလဝ်ရ။
ပ္ဍဲအေန်တာဗျူ ဗလးလဝ် နူတဳဗဳဂှ် စပ်ကဵုဂလာန်ညးတံဟီုလဝ်တုဲ ကြုက် ကလေၚ်ခၠေဝ်ပလန်ကၠုၚ် ဟွံမွဲဏီပုဟ်ဂှ် သ္ကိုပ်ဝန်ဇၞော်အဝ်သတြေလျ ဟီုကၠုၚ်လဝ်ရ။
ပြဝဒပ်ဍာ်ကြုက်ဏံဝွံ သ္ဇက်ဂွံဒုၚ်တဲမာန် ဟွံမွဲပုဟ်ဂှ် အာန်တဝ်နဳယိုဝ် အေဝ်ဗာနိဿ် ဟီုလဝ်ရ။
နကဵုကောန်ဒပ်ညးတံ နွံဒၟံၚ် ပ္ဍဲတွဵုဒၞက်ကျာစပ်ကဵုဍုၚ်နာနာတံ ဒးဒုၚ်ပလာပ်ပထုဲသာ်ဏံ ဟွံထေက်ပုဟ်ဂှ် ဝန်ဇၞော်ကာစဵုဒၞါအဝ်သတြေလျ ဟီုလဝ်ရ။
စပ်ကဵုလၟေၚ်ဒဒှ်ဏံတုဲ ဒဒှ်ရညးတံ နွံပၟိက်ဒၟံၚ် ကုတၚ်သောၚ်ကလးကြုက်တံဂှ်ကီု ဒဒှ်ရဒစဵုဒစး ကုပြဝဏံဂှ် အဝ်သတြေလျ ဟီုလဝ်ရ။
သ္ကိုပ်ဝန်ဇၞော်ကြုက် လဳကဳကျာန်ဂှ် ဂိတုဂတဏံ သ္ဂောံကၠုၚ်စိုပ်ဍုၚ်အဝ်သတြေလျ နွံဒၟံၚ်ဂှ်ရ သဳကၠဳပ္တိုန်ထ္ၜးအာ ကိစ္စဏံဏောၚ်ဂှ်လေဝ် အဝ်သတြေလျ ဟီုရ။
Ref: Reuters