ၜၚ်ကံက်၊ မေ ၁၀
သ္ကိုပ်ဝန်ဇၞော်သေံ သရဳထာ သာဗဳဇြေန်ဂှ် သၞာံဏံအိုတ်မ္ဂး ကလေၚ်စၟတ်အာ တၞးဘၚ်နဒဒှ်ဂဥုဲၜူမာဲပၠန်ဏောၚ်ဂှ် ပ္ဍဲဂိတုမေ ၈ တေံ ဟီုလဝ်ရ။
ရပ်စပ်သုၚ်စောဲ တၞးဘၚ် သွက်သ္ဂောံပြေလၟောၚ်ဂှ် ဟွံဒှ်ဒုဟ်ရောၚ် ဍုၚ်သေံ မဒှ်ကၠုၚ်ဍုၚ်တိုက်အာယှကိုပ်ကၠာအိုတ် စၟတ်ထောံတုဲ ဂွံပွိုၚ်ၜါသၞာံဂှ် ကလေၚ်ဂတးလဝ်က္ဍိုပ် သီုသ္ဇက်ဒးအံသဝ်ရ။
သၞာံ ၂၀၂၅ တေံ ညံၚ်ဂွံဂွံကၠုၚ် ၚုဟ်မး ၁ ဒဿမ ၂ ပြကောဋိကိုဋ် ဒဝ်ဠာအမေရိကာန်ဂှ် ရန်တၟံလဝ်တုဲ အပ္ဍဲပွိုၚ်ၜါသၞာံတုဲကၠုၚ်တေံ အလုံဍုၚ်သေံမွဲ ဆေၚ်တၞးဘၚ်၊ ကမၠောန်ပရေၚ်ပိုန်ဒြပ်တံ ဒှ်ကၠုၚ်လဝ် ကဵုလ္ၚီတုဲ ဗွဝ်ဖျာအပ္ဍဲဍုၚ် ဇြဟတ်ခိုဟ်ဒၟံၚ်ကီုလေဝ် သ္ကိုပ်ဝန်ဇၞော် ဟီုလဝ် အတိုၚ်ဏံရ။
သ္ကိုပ်ဝန်ဇၞော် သရဳထာ တာဗဳဇြေန်ဂှ် နကဵုညး သွက်သ္ဂောံကလေၚ်ပလေဝ်သၞောဝ်၊ သွက်ဂွံကလေၚ်စၟတ် တၞးဘၚ် နဒဒှ်ဂဥုဲၜူမာဲ ဒဒှ်ရမိက်ဂွံကဵုစၞောန် ကုဝန်ဇၞော်ပရေၚ်ထတ်ယုက်ဂှ် ချူလဝ် ပ္ဍဲမဳဒဳယျာပရေၚ်မၞိဟ်ရ။
နကဵုဌာနဝန်ဇၞော်ပရေၚ်ထတ်ယုက် ထေက်ကဵုဒးပ္တိတ် သၞောဝ်ကဵုအခေါၚ်ရပ်စပ်တၞးဘၚ် ၜိုတ်သွက်ပရေၚ်ထတ်ယုက် ကေုာံ ၜိုတ်အရာလုပ်ဂဥုဲတံမွဲ ဗွဲမပြဟ်ဂှ် သ္ကိုပ်ဝန်ဇၞော် ဟီုရ။
ပ္ဍဲဍုၚ်သေံဂှ် နူသၞာံ ၂၀၁၈ တေံရ ကဵုလဝ်အခေါၚ်ရပ်စပ် တၞးဘၚ် သွက်အရာမလုပ်ဂဥုဲတံဂှ်တုဲ စနူသၞာံ ၂၀၂၂ အလဵုအသဳတုဲကၠုၚ်တေံဂှ်တုဲ ကဵုလဝ်အခေါၚ်ရပ်စပ် သွက်သ္ဂောံပြေလၟောၚ်ရ။
ညးပါ်ပါဲတံဂှ်တှ်ေ ကဵုလဝ်အခေါၚ်သာ်ဏံဂှ်ဝွံ မြက်ဇက်လောန်အာရောၚ် ဟီုလဝ်တုဲ စပ်ကဵုပရေၚ်သၞောဝ်ဏံတုဲ ဒးဒှ်အရာမယှုက်ထုဲတံ တၟာဂလိုၚ်ရောၚ် ဟီုတဴရ။
ဂဥူဲၜူမာဲဝွံ ဒှ်ပြသၞာ ပလီုဒၟံၚ်အနာဂတ်ဍုၚ်ညးတံမွဲတုဲ ပိုန်ဒြပ်အရပ်ရာ ညးသွံတြးဂဥုဲၜူမာဲတံဂှ် သီအာဏောၚ်တုဲ သၠဲပ္တိုန်အာ လ္ပာ်လွဳယဲတံဏောၚ်ဂှ် ညးသ္ဂးရ။
ယဝ်ရကလေၚ်စၟတ်ထောံ တၞးဘၚ် နဒဒှ်ဂဥုဲၜူမာဲမ္ဂး သွက်ပရေၚ်ပိုန်ဒြပ်ဂှ် ဒှ်ကၠုၚ်ပြဝပရေံပရေံမွဲဏောၚ်တုဲ သွက်ကမၠောန်အဇာဍောတ်တံကဵု ညးရပ်စပ်စသုၚ်တံဂှ်တှ်ေ ဒှ်အရာဇီုကပိုက်ကၠုၚ် ဇၞော်ကဵုဇြဟတ်ဏောၚ်ဂှ် ပရာသေတ်ဆာဲ ဂအုပ်ညးအုပ်ကာ Cannabis Future Network ဍုၚ်သေံ ဟီုရ။
ညးတဵုလွဳဒၟံၚ်တၞံဘၚ်တံ၊ ညးပံက်လဝ်ဆေၚ်တၞးဘၚ်တံ နွံဒၟံၚ်တၟာဂလိုၚ်တုဲ ကမၠောန်ညးတံ ဒးကၟာတ်ရဏောၚ်ဂှ် ညးဟီုရ။
Ref: Reuters