ဂျေရုသလေန်၊ မေ ၁၀
အတိုၚ်စဳဇန်လဝ် ယဝ်ရဗ္တိုက် ဍုၚ်ရာဖာ မၞုံဒေသဂါဇြာဂှ်မ္ဂး ပလံၚ်ဗစိုပ်အာလွဟ်လက်နက် ဟွံသေၚ်ပုဟ်ဂှ် ကြဴနူသမ္မတအမေရိကာန် ဂျဵုဗိုၚ်ဒေန် ဟီုလဝ်တုဲ နကဵုအေဿရေ နဇြဟတ်ဇကုဇကု သွက်ဂွံဗ္တိုက်အာဂှ် ဒှ်ဒၟံၚ်ဒတုဲရောၚ် သ္ကိုပ်ဝန်ဇၞော် နေတာန်ယာဟု ဟီုလဝ် ပ္ဍဲဂိတုမေ ၉ တေံရ။
သွက်ဂွံဗ္တိုက် ဍုၚ်ရာဖာ ဒၞါဲသၟာဗ္တိုက် ဟာမာသ် ဗွဲမဂၠိုၚ်ဂၠေၚ်ကဵု ရဲဒးဒုၚ်ရပ်သ္ပဒၞန်တံ နွံဒၟံၚ်ဂှ် အေဿရေ စဳဇန်လဝ် တၟာလအ်ရ။
ဟွံဖန်ကဵု ဂၠံၚ်သွက်ရဲဗ္တိုက်ဟွံသေၚ်တံ ဂွံဗၠးဘဲမွဲသာ် ယဝ်ရဗ္တိုက် ဍုၚ်ရာဖာမ္ဂး ဆက်ရီုဗၚ်အာ အေဿရေဟွံသေၚ်ပုဟ်ဂှ် အမေရိကာန် ဟီုလဝ်ရ။
ယဝ်ရပိုယ်တံ မွဲဍုၚ်ဓဝ် ဆက်ဒးဒတူလိုၚ်အာမ္ဂး ဒတူလိုၚ်အာ မွဲဍုၚ်ဓဝ်ဏောၚ် သ္ကိုပ်ဝန်ဇၞော် နေတာန်ယာဟုဂှ် ဟွံဟီုပ္တိတ် စပ်ကဵု တၚ်လလောၚ်တြး အမေရိကာန်မွဲသာ်တုဲ ဟီုလဝ်ရ။
ယဝ်ရ လွဟ်လက်နက်ဟွံမွဲတှ်ေ ဒးဗ္တိုက်အာ နကဵုသၞေံတဲမ္ဂးလေဝ် ပိုယ်တံ ဗ္တိုက်သရိုဟ်အာဏောၚ်ဂှ် ညးဟီုဗပေၚ်လဝ်ရ။
ပ္ဍဲဍုၚ်ကိုၚ်ရိုဝ် အကြာအေဿရေကဵု ဟာမာသ် ဒေါအ်လဝ်ပန်ပှော်ဂှ် ပရေၚ်သဳကၠဳကၞောတ်တဲဂှ်ဝွံ ပ္ဍဲဂိတုမေ ၉ တေံ ဟွံဂွံတၚ်တုပ်စိုတ်မွဲသာ် တုဲဒှ်အာလဝ်ရ။
ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါ အေဿရေ ဂှ် သွက်ပရေၚ်စၟဳတ် စဳဇန်လဝ် တၞဟ်ဟ်တံကဵု ပရေၚ်ဗ္တိုက် ဍုၚ်ရာဖာဂှ် ပ္ဍဲဒပ်ပၞာန်ဇကုတံ လွဟ်လက်နက်ရုမ်မ်ဂပ်ပ်နွံဒၟံၚ်ရောၚ် ဟီုလဝ်ရ။
သွက်ပရေၚ်ဒေါအ်ပန်ပှော် အကြာၜါလ္ပာ်ဂှ် အမေရိကာန်၊ အဳဂျေတ် ကေုာံ ကာတာတံ လုပ်အကြာပ္ညဳပ္ညပ်ကဵုဒၟံၚ်ကီုလေဝ် ဂွံဂွံတၚ်တုပ်စိုတ်ဂှ် ခက်ခုဲဒၟံၚ်ရ။
Ref: Reuters