ၜၚ်ကံက်၊ ဂျောန် ၁
ပ္ဍဲဍုၚ်သေံ ကောန်ကလောန်ဍုၚ်သ္အာၚ်ဂမၠိုၚ် ဆက်အာယုက်အခေါၚ်မံၚ်ပ္ဍဲဍုၚ်သေံမ္ဂး ဟိုတ်နူမူဝါတၟိ စဴဍုၚ်မိမဇကုတုဲမှ ဒးအာတ်ပ္တိုန်ဏောၚ်ဂှ်ရ ကောန်ကလောန်ဆုဲပြံၚ်ဍုၚ်ဗၟာ နွံဍုၚ်သေံတံ ဒဒှ်ရဂွိၚ်ဒၟံၚ် ဖေက်ဒးယိုက်လျိုၚ်ပၞာန် သွက်ကံၚ်ဇြဳပၞာန်ဂှ် ဂကောံကဵုအရီုဗၚ်ဂမၠိုၚ် ဟီုဂးဒၟံၚ်အိုတ်ရ။
ကံၚ်ဇြဳပၞာန်ဝွံ ဒးဂဗကဵုအာ ပရေၚ်ကျဗြံ ဗွဲမဂၠိုၚ်ဂၠေၚ်တုဲဂှ် ဂယိုၚ်ပ္တိုန်လဝ် သၞောဝ်ယိုက်ဂၠေၚ်လျိုၚ်ပၞာန် နူအာယုက် ၁၈ စဵုကဵု ၄၅ သၞာံရ။
ဟိုတ်နူတၚ်လလောၚ်တြးဏံတုဲ သ္ကိုပ်အုပ်ဓုပ် ပ္တိတ်ကၠုၚ်ဇြဟတ် သွက်ဂွံဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်တံ ဒးဒုၚ်ဂစိုတ်ထောံ ဗွဲမဂၠိုၚ်ဂၠေၚ်တုဲ ညးဟွံမိက်ယိုက်ဂၠေၚ်လျိုၚ်ပၞာန် ဂၠိုၚ်ကဵုလ္ၚီဗွဲမဂၠိုၚ်ဂၠေၚ်ဝွံ ဂြိပ်တိတ်အာ ဇရေၚ်ဒေသ ဂကောံရပ်လွဟ်ဂမၠိုၚ် မထိၚ်ဒက်လဝ်တံကဵု ဍုၚ်သေံတံအိုတ်ရ။
နကဵုကောန်ဍုၚ်ဗၟာ၊ ကောန်ဍုၚ်လာအိုဝ် ကေုာံ ကောန်ဍုၚ်ကာမ္ဗောဒဳယျာ ကၠောန်ဒၟံၚ်ကလောန်ဍုၚ်သေံ နကဵုအစဳဇန် ဝဳဇြာအလဵုအသဳတံဂှ် လိက်ကသုက်ညးတံ ပွိုၚ်ပန်သၞာံအိုတ်တုဲ မိက်ဂွံဆက်အာယုက်မ္ဂး စဴဍုၚ်မိတိမညးတံတုဲမှ ဒးပပဵုပ္တိုန်အာယုက်ဏောၚ်ဂှ် ဌာနဝန်ဇၞော်သၟာကမၠောန်သေံ လလောၚ်တြးလဝ် အပ္ဍဲဂိတုဨပရဴတေံရ။
ကိုဝ်ယျေဝ်မေန် သၞာဲဒဴ ဂကောံ AAC မရီုဗၚ်ကဵုဒၟံၚ် သၟာကမၠောန်ဆုဲပြံၚ်ဍုၚ်ဗၟာ စိုပ်ဍုၚ်သေံ ဂှ် သ္ပဒတန်လဝ် စပ်ကဵုပရူပရာတၚ်နွံပၟိက်ဝဳဇြာ ပ္ဍဲဍုၚ်သေံဂှ်ရ။
ကံၚ်ဇြဳပၞာန်ဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်ဍေံတံတုဲ အာတ်လဝ်အလဵုအသဳသေံ သွက်ဂွံရပ်စပ်မူဝါဒဏံဏောၚ် စှ်ေစိုတ်ဂှ် ကိုဝ်ယျေဝ်မေန် ဟီုရ။
ဗွဲဓမ္မတာမ္ဂး ကောန်ကလောန်ဂမၠိုၚ်ဂှ် လိက်အုပ်ညးတံဂှ် ဆက်အာယုက် ပ္ဍဲဍုၚ်သေံဂွံတုဲ ဒၞါဲကၠောန်ကလောန်တြေံဂှ်ရ ဆက်ကၠောန်ဂွံဂှ်ကီု၊ ဒဒှ်ရညးတံ သာတုဲဒးဂၞပ် ကုသၞောတ်ဏံဂှ် ကိုဝ်ယျေဝ်မေန် ဟီုရ။
ဆ္ဂး လၟုဟ်ဂှ် ဟိုတ်နူကံၚ်ဇြဳပၞာန် ကဵုဇြဟတ်ဂရိုဟ်တုဲ ညးတံ ကၠောန်ကလောန်ပ္ဍဲဍုၚ်သေံ ပွိုၚ်ပန်သၞာံတုဲမ္ဂး ဒးစဴဍုၚ်ဗၟာရဏောၚ်ဂှ် ညးဟီုရ။
ညးဆုဲပြံၚ်မံၚ်တန်တဴ ပ္ဍဲဍုၚ်သေံ ဗွဲမဂၠိုၚ်ဂှ်ဝွံ ထံက်ဒၟံၚ်ဂလာန် ကုပရေၚ်ချဳဒရာၚ် ဒစဵုဒစး ကံၚ်ဇြဳပၞာန်ဂှ်တုဲ ဒှ်ညးချဳဒရာၚ်ပါလုပ်ဒၟံၚ် က္တိုၚ်ၚ်ကၟဟ်ဟ်အိုတ်ဏောၚ်ဂှ် ကိုဝ်ယျေဝ်မေန် ဟီုရ။
သွက်ဂွံထပိုတ်ထောံ ဒဒှ်မထံက်ပၚ်ဒၟံၚ် ကုဒပ်ပၠန်ဂတးတံဂှ်တုဲ ကံၚ်ဇြဳပၞာန် အာတ်မိက်လဝ် အလဵုအသဳသေံတုဲ ကဵုပြံၚ်လှာဲလဝ် မူဝါဒ ဒှ်မာန်ဂှ် ညးဟီုရ။
အကြာဏံဂှ် ကောန်ကလောန် အာယုက်ဝဳဇြာအိုတ်တုဲ ဒးစဴအာဍုၚ်ဗၟာလ္ၚဵုတံ နွံဒၟံၚ်ရောၚ် ကောန်ကလောန်ဗၟာမွဲတၠ နူရုၚ်စက် ကၠောန်ပ္တိတ်ဖျုန်စာၚ် ဒေသလအ်ဗူရဳ ဟီုလဝ်ရ။
Ref: RFA