မဝ်သကိုဝ်၊ မေ ၃၁
အမေရိကာန် ယဝ်ရဖျေံလဝ် ကမ်လှောဝ်ပန်ခြာဒမၠေံကဵု ကမ်လှောဝ်ပန်ခြာအကြာတံမ္ဂး နကဵုညးတံ ပ္ဍဲသွာၚ်တာဒၞါ နျူကလဳယျာတံဂှ် သ္ဇက်ဂွံထပ်ကၠောန်အာ အစဳဇန်တၞဟ်ဟ်တံနွံရောၚ် ဝန်ဇၞော်ကာဍုၚ်သ္အာၚ်ရုယှာ သာဂျဳ လာပ်ရတ် သှ်လဝ် ပ္ဍဲအေန်တာဗျူ ကုဌာန်ပရိုၚ် RIA ရ။
နဒဒှ်ကလေၚ်ခၠေဝ်ပလန် ဒဒှ်မကြုက် ဖျေံလဝ်ဇြဟတ်ပၞာန် သာဂၠိုၚ်ကၠုၚ်ဂှ်တုဲ သွက်ဂွံဖျေံလဝ်ကမ်လှောဝ် ပ္ဍဲဒေသအေန်ဒိုဝ်−ပသိဝှေတ်တံ ဒဒှ်ရစဳဇန်လဝ်ဂှ် အမေရိကာန် လလောၚ်တြးလဝ် ပ္ဍဲဂိတုဨပရဴတုဲကၠုၚ်တေံရ။
ဖျေံလဝ်လွဟ်လက်နက်သာ်ဏံဂှ်ဝွံ အတိုၚ်တၚ်တုပ်စိုတ် စပ်ကဵုဒပ်နျူကလဳယျာ ပန်ဇမ္ၚောဲအကြာ မတုပ်လဝ်စိုတ် ကုရုယှာ သၞာံ ၁၉၈၇ တေံဂှ်မ္ဂး ဒးစၟတ်သမ္တီအာ ဟွံလုပ်သၞောဝ်ပုဟ် မဒှ်ရ။
ဆ္ဂး အလဵုအသဳရုယှာ ဝးပ္ကဝ် တၚ်တုပ်စိုတ်ဏံဂးတုဲ သၞာံ ၂၀၁၉ ဂှ် အမေရိကာန် နုက်တိတ်လဝ်ရ။ တၚ်စောဲစပ် အမေရိကာန်သာ်ဏံဂှ် လ္ပာ်မဝ်သကိုဝ် တးပါဲလဝ်ရ။
အတိုၚ်အမေရိကာန်တံ စဳဇန်လဝ် ယဝ်ရဖျေံအာ ကမ်လှောဝ်တံဏံ ပ္ဍဲအာယှကဵု ဥရဝ်ပတံဂှ်မ္ဂး ကြဴနူတၚ်တုပ်စိုတ် စပ်ကဵုဖျေံစွံ ကမ်လှောဝ်ပန်ခြာဇမၠေံကဵု ကမ်လှောဝ်ပန်ဇမ္ၚောဲအကြာတံ ပိုတ်သ္ကုတ်အာတုဲ ပရေၚ်ဒေါအ်ဇူ ညးတံ ပ္တိုန်လဝ်ဂလာန်ဂှ် ဒဒှ်ရသီပလီုအာဏောၚ်ဂှ် ကရေန်မလေန် ကဵုလဝ်သတိ လအ်ယျလေဝ် မဒှ်ရ။
နကဵုရုယှာ အစဳဇန်တၞဟ်ဟ်လေဝ် ကၠောန်အာမာန်ဂှ် ဝန်ဇၞော် လာပ်ရတ် ဟီုလဝ်ကဵု ဌာန်ပရိုၚ် RIA ရ။
ဒပ်နျူကလဳယျာတံကဵု ဌာနကောပ်ကာဲ ရုယှာတံဂှ်ဝွံ စိုပ်ကၠုၚ် အပ္ဍဲခြာဇမ္ၚောဲ ကမ်လှောဝ်အမေရိကာန်တံ ပန်စိုပ်မာန်တံဂှ်ဏောၚ်ဂှ်တုဲ ပ္ဍဲအရာရေၚ်တၠုၚ် တာဒၞါနျူကလဳယျာတံဂှ် ဒးဂါံအာ လဂါံဇိုၚ်တၟိပၠန်ဏောၚ်ဂှ် ဝန်ဇၞော် လာပ်ရတ်ဂှ် ဟီုရ။
စပ်ကဵုပေါဲပၞာန် ရုယှာ−ယူကရုၚ်၊ စပ်ကဵုပရေၚ်ထိုၚ်ဝါန်တုဲ ပရေၚ်ကြံၚ်မ္ၚိုဟ် အမေရိကာန်−ရုယှာကဵု အမေရိကာန်−ကြုက်တံဂှ်ဝွံ သၠုၚ်တိုန်ကၠုၚ်ဒၟံၚ် ဟွံကေၚ်က္တဵုဒှ်မွဲလှ်ေတံဂှ်ရ။
ရုယှာ ကေုာံ ကြုက်တံဂှ် မိက်ဂွံထ္မံက်ရုပ်ရဴ သၞောတ်တၟိစပ်ကဵုအလုံဂၠးမွဲတုဲ မိက်ဂွံဝးပ္ကဝ်ဒၟံၚ် ဒဒှ်မအမေရိကာန်အုပ်ဓလီုလဝ်ဂှ်ရောၚ် ညးလ္ၚတ်ဂမၠိုၚ် ဟီုရ။
Ref: Reuters