ဝါယှေန်တာန်၊ အေဗရာ ၃၀
အဳရာန် ဟွံထေက်ကဵုဒးပိုၚ်ပြဳ လွဟ်နျူကလဳယျာဂှ် ဧကရာဇ်အၚ်္ဂလိက် ချာလ်သ် တုပ်စိုတ်ညံၚ်ရဴညးတေံကီုရောၚ် သမ္မတအမေရိကာန် ဒဝ်နယ်ထရ ဟီုလဝ် ပ္ဍဲပေါဲစစၞသဝ်တ္ၚဲ ပတိုန်ဂုဏ်ဂုဏ်စရာဲရ။
ပ္ဍဲပေါဲစစၞသဝ်တ္ၚဲဂှ် ပ္ဍဲဂၠးကဝ်မၞုံကဵုပရေၚ်ပြိုၚ်ပကာန်ဂၠိုၚ်တံဂှ် ဂကောံမဟာမိတ်နေတိုဝ်၊ အမေရိကာန်တံ သွက်ဂွံဒက်မဟာမိတ်တၞဟ်ဟ်တံဂှ် ကိစ္စဇၞော်မံၚ်ရောၚ် ဧကရာဇ်အၚ်္ဂလိက် ထပ်ဟီုဂးလဝ်ရ။
ပ္ဍဲအရာမဟီုဂးလဝ် ပ္ဍဲစၠတ်ထဝ် ကိုပ်ကၠာတေံဂှ် ဧကရာဇ်အၚ်္ဂလိက် ထိုၚ်သးဟီုဂးလဝ် ပရေၚ်ဆက်ဆောံသွာၚ်ပၞာန် အမေရိကာန်-အၚ်္ဂလိက်တံရ။
စပ်ကဵုအရာစရိတ်သုၚ်စောဲပၞာန် ဂကောံနေတိုဝ်ကီု သီုပရေၚ်ကမၠောန် ကၠောန်လဝ်နာနာတံဂှ် ဒဝ်နယ်ထရ ဟီုပါ်ပါဲကၠုၚ်မံၚ်တုဲ ပ္ဍဲအခိၚ်အမေရိကာန် နွံကၠုၚ်ပၟိက် ပရေၚ်အရီုအဗၚ်မ္ဂး ဂကောံနေတိုဝ် နွံမံၚ်ဟွံသေၚ်ပုဟ် ကေၚ်ဟီုလဝ်ကီုရ။
ညးတေံ ပါ်ပါဲလဝ် ဒပ်ဍာ်အၚ်္ဂလိက်ကီုတုဲ က္ၜၚ်အၚ်္ဂလိက်တံဂှ် ဒှ်မံၚ်ညံၚ်ရဴကပေါတ် ကောန်ၚာ်ဝေၚ်တံတုဲ က္ၜၚ်ဖ္ဍိုက်က္ၜၚ်ကျာတံလေဝ် ဟွံဒှ်ကမၠောန်ပုဟ် ကေၚ်ဟီုလဝ်ရ။
ဂကောံမဟာမိတ်နေတိုဝ်ဝွံ ပ္ဍဲဂၠးကဝ်မၞုံကဵု ပရေၚ်ယှုက်ထုဲဂၠိုၚ်တိုန် ကေုာံ ပရေၚ်ပြိုၚ်ပကာန်သ္ကာတ်မြဟ်တံဂှ် ဒှ်ဂကောံမဟာမိတ် ကိစ္စဇၞော်မွဲရောၚ် ဧကရာဇ်အၚ်္ဂလိက် သ္ဂးရ။
အတိုၚ်မူဝါဒညးတေံ ဆေၚ်စပ်ကဵုအဳရာန်ဂှ် ဧကရာဇ်အၚ်္ဂလိက် ဒုၚ်တဲမံၚ်ရောၚ် ထရ ဟီုလဝ်တုဲ အကြာဍုၚ်ၜါလပါ်တံ ကလိဂွံလဝ် ပရေၚ်ကၠိုဟ်ခၠုၚ်ဂၠိုၚ်ဗွဲမလောန်ရ။
ကြဴနူအမေရိကာန် ကေုာံ အေဿရေတံ စဗတိုက်အဳရာန်တုဲ သွက်ဂွံကလိဂွံပရေၚ်ထံက်ဂလာန် နူဍုၚ်တၞဟ်တံဂှ် ထရ ဂစာန်မံၚ်ဖိုဟ်ရ။
ကိုန်အစဳဇန်နျူကလဳယျာ အဳရာန်တံဂှ် သွက်ပရေၚ်ၜိုဟ်လလမ် ကေုာံ သုၚ်စောဲအရာကောန်အရာပ် ညးကွာန်တံရောၚ် ၜိုန်ရဟီုမံၚ် ဂၠိုၚ်ကဵုအလန်ကီုလေဝ် ပရေၚ်ပတိတ်လွဟ်နျူကလဳယျာဂှ် လပါ်ဍုၚ်ပလိုတ်တံ သံသယနွံမံၚ်ရ။
သွက်ဂွံထိၚ်ဒဝ် ကိုန်အစဳဇန်နျူကလဳယျာအဳရာန်ဂှ် ပ္ဍဲသၞာံ ၂၀၁၅ တေံ ကရောံဍုၚ်ဇြဟတ်ဇၞော်တံ ကလိဂွံလဝ်တင်တုပ်စိုပ်မွဲကီုလေဝ် ဟိုတ်နူထရီု နုက်ပ္တိတ်ထောံအမေရိကာန်တုဲ တင်တုပ်စိုပ်ဂှ် လီုလာ်အာရ။
သွက်ဂွံကလိဂွံတင်တုပ်စိုပ်တၟိ ကုအဳရာန်ဂှ် ထရ ဂစာန်မံၚ်တုဲ ပ္ဍဲအခိၚ်ကၟာတ်ဆိုအ်လဝ် သၞေဟ်က္ၜၚ်အဳရာန်တံဂှ် စဵုကဵုကလိဂွံတင်တုပ်စိုပ်တေံ ဒေါအ်အာလဝ်ပန်ပှော်ရောၚ် လလောၚ်တြးလဝ်ရ။
ပ္ဍဲအခိၚ်အဳရာန် ကၟာတ်လဒံလဝ် ပ္ၚံက်ၜဳဟဝ်မုဇ် ဂၠံၚ်ဍာန်ဍာ်ကိစ္စဇၞော် သွက်အရာကၠေၚ်ဍေၚ်ဇွောဝ်အာကၠုၚ် ဂၠးကဝ်ဂှ် ညံၚ်ဂွံကလေၚ်ပံက်ကဵုဂှ်လေဝ် ဘိက်ပၟိၚ်အာတ်မိက်လဝ် ဍုၚ်တၞဟ်တံရ။
ဧကရာဇ်အၚ်္ဂလိက် ချာလ်သ် ဝွံ ကြဴနူမိညးတေံ ဧကရာဇ်ဗြဴဇၞော် အေဝ်လိဇဘက် ၂ စုတိအာတုဲ၊ ဒှ်မၞိဟ်တြုံနူဂကောံသ္ၚိကၟိန် ဧကရာဇ်အၚ်္ဂလိက်ကၠာအိုတ် ဟီုဂလာန် ပ္ဍဲစၠတ်ထဝ်အမေရိကာန်ရ။
ဧကရာဇ်ဗြဴဇၞော် အေဝ်လိဇဘက် ၂ ဂှ် ပ္ဍဲသၞာံ ၁၉၉၁ တေံ ကေၚ်ဟီုဂးလဝ် အသံဂလာန် ပ္ဍဲစၠတ်ထဝ်အမေရိကာန် ကီုရ။
Ref:BBC