ဗေကျေန်၊ ဂျောန် ၄
တၚ်စောဲစပ် သမ္မတ ဗိုဝ်လိုဝ်ဒဳမာ ဇြဳလာန်သကဳ ဒဒှ်ရကြုက် ကဵုဒၟံၚ်ဇြဟတ်ဂရိုဟ် ကုဍုၚ်တၞဟ်ဟ်တံ ညံၚ်ဟွံဂွံတိုန်စိုပ် ကောံဓရီုပရေၚ်ၜိုဟ်လလမ် စပ်ကဵုပေါဲပၞာန်ယူကရုၚ် သ္ဂောံကၠောန်ဗဒှ်အာ မစဳဇန်လဝ်ဂှ် အလဵုအသဳဗေကျေန် တးပါဲလဝ် ပ္ဍဲဂိတုဂျောန် ၃ တေံရ။
ပ္ဍဲကောံဓရီုပရေၚ်ဂီုကၠီု မကၠောန်ဗဒှ်ဒၟံၚ် ပ္ဍဲသေန်ကာပေါဝ် ဂိတုဂျောန် ၂ ဂှ် သမ္မတယူကရုၚ် ဇြဳလာန်သကဳဂှ် အပ္ဍဲဂိတုဏံ ကောံဓရီုပရေၚ်ၜိုဟ်လလမ် ဍုၚ်သွေတ်သလာန် ဒုၚ်တဲကၠောန်ဗဒှ်အာဂှ် ဍုၚ်သ္အာၚ်တၞဟ်ဟ်ဂမၠိုၚ် ညံၚ်ဟွံဂွံတိုန်စိုပ် လ္ပာ်ကြုက် ပ္တိတ်ဒၟံၚ်ဇြဟတ် ဗွဲတၟေၚ်ရောၚ် စောဲစပ်လဝ်ရ။
ကၟိန်ဍုၚ်ဗွဲမဂၠိုၚ်ဂၠေၚ် ယဝ်တိုန်စိုပ်ကၠုၚ်မ္ဂး ညံၚ်ပရေၚ်သၠိုၚ်လုပ်ၜက်ၜေတ်ရုယှာ ဂွံတုဲဒှ်အာ ပရေၚ်ထံက်ဂလာန်ဍုၚ်သ္အာၚ် ညးတံနွံပၟိက်ဒၟံၚ်တံဂှ် ကလိဂွံအာဂၠိုၚ်ဏောၚ် ယူကရုၚ် စၟဳစလဝ်ရ။
ပ္ဍဲကောံဓရီုဏံ ယဝ်ရမဟာမိတ်ညးတံ ဍုၚ်ရုယှာဟွံပါလုပ်မ္ဂး နကဵုညးတံ ဂွံတိုန်စိုပ် ဒဒှ်ရခက်ခုဲဏောၚ် ကြုက်ဟီုလဝ်တုဲ ပ္ဍဲသတ္တာဟတုဲကၠုၚ်တေံ ပါ်ပါဲလဝ် အစဳဇန်ကၠောန်ဗဒှ်ကောံဓရီုဂှ်ရ။
တၚ်ဒတူလိုၚ်ကြုက်ဝွံ မၞုံကဵုပွမကၠးမှးတုဲ ညံၚ်ဍုၚ်တၞဟ်ဟ် ဟွံဂွံတိုန်စိုပ် ဂွံကၠောန်ဂှ် ပ္ဍဲကဵုညးတံ ဟိုတ်ဟွံမွဲပုဟ်ဂှ် ဌာနဝန်ဇၞော်ကာဍုၚ်သ္အာၚ်ဍုၚ်ကြုက် ဟီုလဝ် ပ္ဍဲဂိတုဂျောန် ၃ တေံရ။
စပ်ကဵုပရေၚ်သဳကၠဳပရေၚ်ၜိုဟ်လလမ်တုဲ တၚ်ဒတူလိုၚ်ကြုက်ဝွံ ဒဒှ်ရဓဝ်ယာဂှ်ကီု စွံပွန်ကဵုဍုၚ်တတိယမွဲလဵုတုဲမှ ပွမပ္တိတ်ဒၟံၚ်ဇြဟတ် ညံၚ်ဂွိုအ်တိုန်စိုပ် ကောံဓရီုပရေၚ်ၜိုဟ်လလမ်တံ ဟွံမွဲပုဟ်ဂှ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် မဝ်နေန် ဟီုလဝ်ရ။
ပွမပ္တိတ်ဇြဟတ် စပ်ကဵုပရေၚ်ၜိုဟ်လလမ် မၞုံကဵုသဘဴပလေဝ် သွက်ပဋိပက္ခတံသီုဖအိုတ်ဂှ် ဒးထံက်ဂလာန် ကဵုအာဇြဟတ်ဏောၚ်ဂှ်လေဝ် ကြုက် ဟီုတဴရ။
ပ္ဍဲပေါဲပၞာန်ယူကရုၚ်ဂှ် ညးတံဝွံ ၜိုန်ဒှ်ဍုၚ်မံၚ်လဒေါဝ်ကီုလေဝ် ဟိုတ်နူညးတံကဵု ရုယှာ ပံၚ်တောဲကၠောန်ကၠုၚ် ဗွဲမစှ်ေကဵုမဟာဗျူဟာတံဂှ်တုဲ ဒးဆေၚ်ဒၟံၚ်မုက်ကဵု ပရေၚ်ပါ်ပါဲဍုၚ်ပလိုတ်တံ ဗွဲမသ္ကာတ်မြဟ်ရောၚ်ဂှ်လေဝ် အလဵုအသဳကြုက် ဟီုရ။
ကြုက်ဝွံ ပလံၚ်ဗစိုပ်လဝ်လွဟ်လက်နက် ဇရေၚ်ရုယှာ တိုက်ရိုက်ဟွံမွဲကီုလေဝ် ကြဴနူခေတ်ကၟိန်ဍုၚ်ပံၚ်ကောံသဵုဗဳယေတ်လောန်တုဲ ပရေၚ်သၠဲပ္တိုန်သွာၚ် ကမၠောန်ပရေၚ်စဵုဒၞါရုယှာဂှ် ရီုဗၚ်ကဵုဒၟံၚ် တၟာဂလိုၚ်ရောၚ် အမေရိကာန် စောဲစပ်လဝ်ရ။
ကၟိန်ဍုၚ်ကဵုလဝ်စရၚ် သ္ဂောံတိုန်စိုပ် ကောံဓရီုပရေၚ်ၜိုဟ်လလမ် မကၠောန်ဗဒှ်အာ ပ္ဍဲဍုၚ်သွေတ်သလာန်ဂှ် ၁၀၀ ပြၚ် နွံဒၟံၚ်ယျဂှ် သမ္မတဇြဳလာန်သကဳ ဟီုလဝ် ဂိတုဂျောန် ၂ တေံရ။
Ref: AFP