နျူဒေလဳ၊ ဂျောန် ၅
သ္ကိုပ်ဝန်ဇၞော်အိန္ဒိယ နာရာန်ဒရာ မိုဝ်ဒဳဝွံ ဆက်ကလိဂွံအာအဝဵု မာန်ကီုလေဝ် ဗော်ကောန်ဂကူဟိန္ဒူ BJP ညးဂှ်ဝွံ အပ္ဍဲပွိုၚ် ၁၀ သၞာံ အလန်ကိုပ်ကၠာအိုတ် ဒးဗလးအာတဲ ဒၞါဲအမာတ်အပ္ဍဲကၠတ်ထဝ်တံ ဗွဲမဂၠိုၚ်မာန်ရ။
ဂကောံဇြဟတ်ပရေၚ်ဍုၚ်ကွာန် သ္ကိုပ်ဝန်ဇၞော် မိုဝ်ဒဳဂှ်ဝွံ ကလိဂွံလဝ်ဇၞး ဒၞါဲအမာတ် ၂၄၀ ကီုလေဝ် သွက်ဂွံဒက်ပ္တန်အလဵုအသဳ ဒးကေတ်ဒၟံၚ် ဒၞါဲအမာတ် ၃၂ ဒၞါဲဏီရ။
သွက်ညးမစုတ်လဝ်မာဲ သွက်ဗော်ညးဂှ် ဒဒှ်ရညးတၚ်ဂုဏ်ဂှ် ဟီုလဝ်တုဲ ဗော်ညးဂွံဇၞးဂှ်ဝွံ ဒၟါနူရုဲစှ်လဝ် သွက်ဂွံကၠောန် ညံၚ်ပရေၚ်ဒ္ဂေတ်လီုစလာပ်တံကဵု ပရေၚ်ဒိုက်ဝါတ် ဂွံအိုတ်အးတံရောၚ်ဂှ် ဟီုလဝ်ရ။
ဂကောံဇြဟတ်လ္ပာ်ဒစဵုဒစး INDIA တံဝွံ ဇြဟတ်ခိုဟ်ကၠုၚ် နူကဵုစၟဳစလဝ်ဂှ်ဏီတုဲ ကလိဂွံလဝ်ဒၞါဲအမာတ် ၂၃၂ ဒၞါဲရ။
ဂကောံပံၚ်ကောံ INDIA ဂှ် ဒဒှ်ရညးတံကျဂှ် ဟွံဒုၚ်ဝန်ဏီတုဲ စပ်ကဵုလဂါံဇိုၚ် ဒးရေၚ်တၠုၚ်အာဂတဏံဂှ်တုဲ သွက်ဂွံသ္ဂုတ်သွာတ်ဂှ် ဂျောန် ၅ ဏံ ကၠောန်ဗဒှ်အာပေါဲသဳကၠဳဏောၚ် ဟီုရ။
ပေါဲရုဲမာဲဇၞော်အိုတ် လ္တူဂၠးတိဏံ လၟိဟ်မၞိဟ် ဗၞတ် ၁ ဗဳလျာန်ကဵုလဝ်စရၚ် သွက်ဂွံကဵုမာဲဂှ် ကၠောန်ဗဒှ်လဝ် အပ္ဍဲပွိုၚ်တြဴသတ္တာဟ နကဵုကဆံၚ် ၇ ကဆံၚ်ရ။
အတိုၚ်လၟိဟ်မာဲလၟုဟ်တံဂှ်မ္ဂး နကဵုသ္ကိုပ်ဝန်ဇၞော်မိုဝ်ဒဳ ပံၚ်တောဲကဵု ဗော်ဍောတ်တ်တံဂှ်တုဲ ဒက်ဂကောံအလဵုအသဳမာန်ဏောၚ် စၟဳစလဝ်ရ။
ဗော်မိုဝ်ဒဳဂှ်ဝွံ လောန်ကၠုၚ် ၅ သၞာံတေံ ကလိဂွံလဝ်ဇၞး စဵုကဵုဒၞါဲအမာတ် ၃၀၃ တုဲ ပရေၚ်ထံက်ဂလာန်စှ်ေအာဂှ် ဂွံဆဵုကေတ်တုဲ အပ္ဍဲကၠတ်ထဝ် အမာတ်ဗွဲမဂၠိုၚ် ဂွံဂွံဒၞါဲဂှ် နွံပၟိက်ဒၟံၚ် ၃၂ ဒၞါဲဏီရ။
ကၠာဂွိုအ်လလောၚ်တြး သွဟ်ပေါဲရုဲမာဲ လက္ကရဴအိုတ်ဂှ် ပ္ဍဲဂအုပ်ရုၚ် BJP ဂှ် ညးထံက်ဂလာန်ဂမၠိုၚ် ပလဝ်သဘၚ်ပေါဲအံၚ်ဇၞးရ။
Ref: AFP