ဝါယှေန်တာန်၊ ဂျောန် ၁၂
ပ္ဍဲဍုၚ်ဗၟာ ပဋိပက္ခ က္တဵုဒှ်ဒၟံၚ်ဂှ် ပေါဲဗ္တိုက်အသိၚ်သ္ကာတ်ကၠုၚ်ဂှ်ကီု၊ ဇြဟတ်ကောန်ကလောန် ပိုတ်ကၠုၚ်ကီု ကေုာံ ဟိုတ်နူၚုဟ်မးသြန် အောန်စှ်ေကၠုၚ်တံတုဲ ဂွံကၠောန်ပရေၚ်ပိုန်ဒြပ် သာခက်ခုဲကၠုၚ်ဒၟံၚ်တုဲ သွက်သၞာံဘဏ္ဍာ ၂၀၂၄−၂၀၂၅ ဂှ် ပရေၚ်ပိုန်ဒြပ်ဍုၚ်ဗၟာ ဖောအ်ဗြေဝ်ဂှ်ဝွံ ၜိုတ်မွဲတၟံကၠံရ နွံဏောၚ် ဒဒှ်ရချိၚ်ခယျလဝ်ဂှ် တိုက်သြန်ဂၠးတိ ထ္မံက်ထ္ၜးလဝ် ပ္ဍဲဂိတုဂျောန် ၁၂ တေံရ။
ပ္ဍဲသၞာံပရေၚ်ဘဏ္ဍာ မအိုတ်အာ ပ္ဍဲဂိတုမာတ် သၞာံ ၂၀၂၄ ဂှ် ၚုဟ်မးဗၞိက်ပ္တိတ် အပ္ဍဲဍုၚ် ဗြေဝ်တိုန် မွဲတၟံကၠံဏောၚ် ချိၚ်ခယျတုဲဂှ် အပ္ဍဲကာလဏံ ပရေၚ်ပိုန်ဒြပ်ဍုၚ်ဗၟာ ဖောအ်ဗြေဝ်တိုန် ၂ တၟံကၠံ နွံမာန်ရာၚ် တိုက်သြန်ဂၠးတိ ချိၚ်ခယျလဝ် အပ္ဍဲဂိတုဒဳဇြေမ်ဗာတေံရ။
ပ္ဍဲဍုၚ်ဗၟာ သြန်ဖောဝ် သၠုၚ်တိုန်ဒၟံၚ် ကဵုဆကီု၊ ဂွံဂွံဇြဟတ်ကောန်ကလောန် ကျာတ်ဝါတ်ကီု၊ ဂွံလှာဲသြန်ဍုၚ်သ္အာၚ် ဝါတ်ဂါတ်ကီု ကေုာံ ဟိုတ်နူဟွံဂွံပၟတ်ဓာတ်လလဳတုဲ ပရေၚ်ပိုန်ဒြပ်ဖောအ်ဗြေဝ်ဂှ်ဝွံ ဇြဟတ်ဍိုန်လျစှ်ေ နူကဵုအကာဲအရာ မချိၚ်လဝ်ကၠာတေံဏီဏောၚ်ဂှ် တိုက်သြန်ဂၠးတိ ဟီုရ။
ကြဴနူဒပ်ပၞာန်သီအဝဵုတုဲ ညးဍုၚ်ကွာန်ဍုၚ်ဗၟာ ၅၅ ပြကောဋိကိုဋ်ဂှ်ဝွံ ဒးဆေၚ်ဒၟံၚ်မုက်ကဵု အကာဲအရာပရေၚ်ပိုန်ဒြပ်ဍုၚ်ဗၟာ ဟွံညိၚ်ဝတ်တံရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ကျဒၟံၚ်ပၞာန် မဂယိုၚ်ပ္တိုန်လဝ်ဂှ်တုဲလေဝ် ညးဍုၚ်ကွာန်ဂမၠိုၚ်ဝွံ အာစိုပ်ဍုၚ်သ္အာၚ် ကေုာံ အာစိုပ်ဒေသကွာန်ရးတံ ဂၠိုၚ်ကၠုၚ်တုဲ ဇြဟတ်ကောန်ကလောန် ပိုတ်သ္ကုတ် က္တဵုဒှ်ဒၟံၚ်ရောၚ် တိုက်သြန်ဂၠးတိ ဟီုရ။
ပရေၚ်ပၠောပ်ပ္တိုန်ဗၞိက်ဍုၚ်ဗမာ နူကဵုဂၠံၚ်ကုန်ဂှ်ဝွံ ယအ်စှ်ေအာ ၜိုတ်ကဝက်ပြၚ်တုဲ ပရေၚ်ပၠောပ်ပ္တိုန်ဗၞိက်သီုဖအိုတ်ဂှ်ဝွံ ယအ်စှ်ေအာ ၇၁ တၟံကၠံဂှ် တိုက်သြန်ဂၠးတိ ဟီုရ။
အပ္ဍဲကာလပွိုၚ်တြဴဂိတု အိုတ်အာ ပ္ဍဲဂိတုမာတ် သၞာံ ၂၀၂၄ ဂှ် ပရေၚ်ပလံၚ်ပ္တိုန်ဗၞိက် ဍုၚ်ဗၟာ သီုဖအိုတ်ဝွံ အပ္ဍဲအခိၚ်ကာလတုပ်ပ်ကဵုသၞာံတုဲတေံဂှ် ယအ်စှ်ေအာ ၁၃ တၟံကၠံတုဲ ပရေၚ်ပၠောပ်ပ္တိုန်ဗၞိက်ဂှ် ယအ်စှ်ေအာလဝ် ၂၀ တၟံကၠံရောၚ် တိုက်သြန်ဂၠးတိ ဟီုရ။
Ref: Reuters