ၜၚ်ကံက်၊ ဂျောန် ၁၃
ဂဗုတ်စောဲစပ်လဝ် ဟိုတ်နူပရေၚ်ဍုၚ်ကွာန် ပိဂဗုတ် ပါလုပ်သီုကဵု ဂဗုတ်မပ္တဝ်အာက္ဍိုပ် စဵုကဵုအကာဲအရာ သ္ကိုပ်ဝန်ဇၞော်ဍုၚ်သေံ ဒးဒုၚ်ပ္တိတ်ဂှ် အပ္ဍဲသတ္တာဟကၠုၚ်စိုပ်ဏံ ရုၚ်သၞောဝ်ဓဝ်တံ ကလၚ်ပၟိၚ်အာဏောၚ် မဒှ်ရ။
ဟိုတ်ဂှ်ရ ပ္ဍဲဍုၚ်သေံ ဂကောံအလဵုအသဳ ဟွံညိၚ်ဝတ် က္တဵုဒှ်ကၠုၚ်မာန်ဒၟံၚ်ရ။
ပ္ဍဲတၚ်လလောၚ်တြး လလောၚ်ပ္တိတ်လဝ် ပ္ဍဲဂိတုဂျောန် ၁၂ မွဲဂှ် ဂဗုတ်နူကဵုရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန်သေံ မစောဲစပ်လဝ် လ္တူသ္ကိုပ်ဝန်ဇၞော် သရဳထာ တာဗဳဇြေန်ဂှ် ပ္ဍဲဂိတုဂျောန် (၁၈) ဏံ ကလၚ်ပၟိၚ်အာဏောၚ် ထ္မံက်ထ္ၜးလဝ်ရ။
အမာတ်ကၠတ်ထဝ် နူဒပ်ပၞာန်သေံ မခါန်ကၞက်ပ္တိုန်လဝ် ၄၀ တၠ စောဲစပ်လဝ် ဒဒှ်ရသ္ကိုပ်ဝန်ဇၞော် သရဳထာ ခါန်ကၞက်ပ္တိုန်လဝ် ဝန်ဇၞော်မွဲတၠဂှ်ဝွံ ဝးပ္ကဝ်လဝ် သၞောဝ်သ္ဇိုၚ်ဒက်ပ္တန်တုဲ ပ္ဍဲဂိတုမေတုဲကၠုၚ်တေံ တေၚ်စိုပ်လဝ်တုဲ တၚ်စောဲစပ်သာ်ဏံ မံက်တိတ်ကၠုၚ်လဝ်လေဝ် မဒှ်ရ။
ပြဝကမ္မယှေန်ပေါဲရုဲမာဲ ပ္တိတ်ဇြဟတ် သ္ဂောံပလီုဗော် Move Forward လ္ပာ်ဒစဵုဒစးဂှ်လေဝ် ပ္ဍဲဂိတုဂျောန် ၁၈ ဏံရ ဒဒှ်ရစၟဳတ်ကလၚ်ပၟိၚ်အာဏောၚ်ဂှ် ရုၚ်သၞောဝ်ဓဝ် ဟီုရ။
ဗော် Move Forward ဝွံ ပ္ဍဲပေါဲရုဲမာဲ သၞာံတုဲကၠုၚ်တေံ ဟွံထေၚ်လဝ်မွဲသာ် ကလိဂွံလဝ်ပေါဲအံၚ်ဇၞးကီုလေဝ် ဟိုတ်နူဂကောံဇြဟတ် ညးသစ္စမၞုံ လ္တူနန်ဨကရာဇ်တံ တာဒၞါတုဲ ဒက်ပ္တန်အလဵုအသဳ ဟွံမာန် ဒှ်အာလဝ်ရ။
တ္ၚဲဖျေံအမိၚ် သွက်သီုၜါဂဗုတ်ဏံဂှ် ရုၚ်သၞောဝ်ဓဝ် ဟွံဂွံသ္ပဒတန်ဏီရ။
အပ္ဍဲအကြာဏံ ဂဗုတ်ဖ္ဍိုက်ဂရိုက်နန်ဨကရာဇ် မစောဲစပ်လဝ် လ္တူသ္ကိုပ်ဝန်ဇၞော်တြေံ တက်ဇြေန် ပါဲဒလေတ်မံၚ်လဝ် ပ္ဍဲဍုၚ်သ္အာၚ် ပွိုၚ် ၁၅ သၞာံတုဲ ပ္ဍဲဂိတုအဝ်ဂါတ် သၞာံတုဲကၠုၚ်တေံမှ ကလေၚ်စဴကၠုၚ်ဍုၚ်ဂှ်လေဝ် ကလၚ်ပၟိၚ်စၟဳတ်အာ ပ္ဍဲကဵုတ္ၚဲဂှ်ရဂှ် ဂွံတီကေတ်ရ။
နကဵုသ္ကိုပ်ဝန်ဇၞော်လၟုဟ် သရဳတာ၊ သ္ကိုပ်ဝန်ဇၞော်တြေံ တက်ဇြေန် ကေုာံ ဗော် Move Forward တံဂှ် ဒဒှ်ရညးတံ ကလိလောန်လဝ် အရာမဗၠေတ်မှာဟွံမွဲပုဟ်ဂှ် ကယျာန်ပါဲလဝ်ရ။
ဒၟါနူဂဗုတ်တံဏံတုဲ ပ္ဍဲဍုၚ်ပရေၚ်ပိုန်ဒြပ်ဇြဟတ်ဇၞော် ပ္ဍဲအာယှဒိုဟ်အဂၞဲ ဒုတိယဇၞော်အိုတ်ဂှ် ပရေၚ်ဍုၚ်ကွာန် ဟွံညိၚ်ဝတ်တံ ဂွံက္တဵုဒှ်ကၠုၚ်မာန်တုဲ ဗွဝ်ဖျာဂမၠိုၚ် ဇီုကပိုက်ကၠုၚ်မာန်ရ။
စပ်ကဵုပြဝ ရုၚ်သၞောဝ်ဓဝ်တုဲ ဟွံမိက်ကဵုတၚ်စၟတ်မွဲသာ်ပုဟ်ဂှ် ညးမၞုံအခေါၚ်ဟီုဂး အလဵုအသဳ ဟီုရ။
ပရေၚ်ဍုၚ်ကွာန် ဍုၚ်သေံဝွံ သၞာံဗွဲမလအ်လ ဂကောံဇြဟတ် သစ္စမၞုံ လ္တူနန်ဨကရာဇ်၊ ကောန်သာဗေတေဗ် သြဇာဇၞော်ကၠုၚ်တံဂှ်ကဵု သ္ကိုပ်ဝန်ဇၞော်တြေံ တက်ဇြေန် ကေုာံ ညးလ္ပာ်ဒစဵုဒစး မသ္ပလဝ်အဓိက ကုဗော်ပရေၚ်ဍုၚ်ကွာန်ညးတံဂှ် ပြိုၚ်ပ္ကာန်ကၠုၚ်လဝ်ညးသ္ကအ် နူတမ်ပထမတေံရ။
အခိၚ်လၟုဟ် ပ္ဍဲကဵုညးပြိုၚ်ပ္ကာန် ကုညးသစ္စမၞုံ လ္တူနန်ဨကရာဇ်တံဂှ် ဗော် Move Forward လေဝ် ပါလုပ်ကၠုၚ်ယျ မဒှ်ရ။
သ္ကိုပ်ဝန်ဇၞော် သရဳထာဝွံ ဒးဆေၚ်အာမုက် ကုဂဗုတ်ဏောၚ်ကီုလေဝ် ယိုက်ဂၠေၚ်အာတာလျိုၚ်ညး ပေၚ်ၚ်ဏောၚ်ဂှ် ပ္ဍဲဂိတုဂျောန် ၁၁ တေံ ဒုသ္ကိုပ်ဝန်ဇၞော် ဟီုလဝ်ကဵု အ္စာပရိုၚ်ဂမၠိုၚ်ရ။
Ref: Reuters