မနဳလာ၊ ဂျောန် ၂၅
ပ္ဍဲကဵုၜဳကြုက်သၠုၚ်ကျာ ဒှ်ဒၟံၚ်ပရေၚ်ကယျာန်ဓဝါန်ဂှ် ဟိုတ်နူပြဝ ဒပ်ကြုက်တံတုဲ သၞာဲဒဴဒပ်ဍာ် ဖဳလေတ်ဖေန်မွဲတၠ ဇီုကပိုက်ကလိဂွံလဝ်ဝပ်တုဲ က္ၜၚ်ဒပ်ဍာ်ၜါဖ္ဍိုက် လီုလာ်အာလဝ်တုဲ သမ္မတဖဳလေတ်ဖေန်ဂှ် နကဵုညးတံ ကၟိန်ဍုၚ်ဇြဟတ်ဇၞော် ဍုၚ်သ္အာၚ်လဵုမွဲမှ ဒုၚ်ကျအာဟွံသေၚ်ပုဟ်ဂှ် ဟီုလဝ်ရ။
ဆ္ဂး နကဵုဖဳလေတ်ဖေန် ဒဒှ်ရစအာ ပေါဲပၞာန်ဟွံသေၚ်ပုဟ်ဂှ် သမ္မတာ ဝှာဒဳနာန်မာကောသ် ဂျူနဳယျာ ဟီုလဝ်ရ။
က္ၜၚ်ဒပ်ဍာ် မဂ္စါန်ပလံၚ်ဗစိုပ် ကပေါတ်ထံက်ပၚ် ဇရေၚ်ဒပ်ဖဳလေတ်ဖေန် ဖျေံလဝ် ပ္ဍဲသၟဝ်ဍာ် မဒှ်ဒၟံၚ်ကယျာန်ဓဝါန် အကြာၜါဍုၚ်ဂှ် နူဒပ်မၚ်ပြၚ်ၜဳကြုက်တံ ဗ္တိုက်လဝ် နကဵုမုဲ၊ လေံဍံက် ဗြတံဂှ်တုဲ ကောန်ဒပ်ဍာ် ဖဳလေတ်ဖေန်လ္ၚဵုတံ ဇီုကပိုက်ဒးအာလဝ်တုဲ ဗွဲတွဵုမအောန် က္ၜၚ်ၜါဖ္ဍိုက် ဒးလီုအာလဝ်ရ။
သမ္မတမာကောသ်ဂှ် အာစိုပ်လဝ် တွဵုရးပါလာဝန် မဒှ်တ္ကအ်ဗွဲဒိုဟ်ပလိုတ် မဂတလဝ်မုက်ကဵု ၜဳကြုက်သၠုၚ်ကျာဂှ် ကရောံသ္ကိုပ်ဗိုလ်ကဆံၚ်လ္တူၜါတၠ၊ ဇၞော်သ္ကိုပ်ပရေၚ်စဵုဒၞါတံဂှ်တုဲ ပ္တိုန်လဝ်စရာဲ တဆိပ်လာပ်ဗဇဴ ကုကောန်ဒပ်ဍာ် ဒးဒုၚ်ဗ္တိုက်လဝ်တံဂှ်ရ။
ပ္ဍဲကဵုဗီုဓာတ် ဗဳဒဳယောတံဂှ် ကောန်ဒပ်မၚ်ပယျဵုကြုက်တံ ဗ္တိုက်ဒၟံၚ် ကောန်ဒပ်ဍာ် ဖဳလေတ်ဖေန်တံဂှ် ဂွံဆဵုကေတ်ရ။
ညံၚ်ဂွိုအ်လုပ်စိုပ် ပ္ဍဲတွဵုဒၞက်ဇကုတံဂှ် ကဵုလဝ်သတိကီုလေဝ် ကောန်ဒပ်ဍာ်ဖဳလေတ်ဖေန် ဟွံသ္ပဂရု လုပ်စိုပ်ကၠုၚ်တံဂှ် ဒပ်မၚ်ပြၚ်ၜဳတံ တာဒၞါလဝ်ရောၚ် အလဵုအသဳဗေကျေန် ဟီုရ။
စပ်ကဵုပွပကီုပရာပ်သာ်ဏံတုဲ အမေရိကာန်၊ အဳယူ၊ သဝ်သတြေလျ၊ ဂျပါန်၊ ဍုၚ်ဥရဝ်ပတၞဟ်သ္အာၚ်ဂမၠိုၚ် ကေုာံ ဍုၚ်အာယှဂမၠိုၚ် ပ္တိုန်ဒုဟ် ဗျိပၠုတ်လဝ်ရ။
ကြုက်ကဵု ဖဳလေတ်ဖေန်ဂှ်တှ်ေ သွက်ပရေၚ်ဒိဓဗတ်ဆေၚ်မုက်ဏံဂှ် ညးပ္တိုန်ဒုဟ်အဲ အဲပ္တိုန်ဒုဟ်ညး ဒှ်ဒၟံၚ်ရ။
နကဵုအလဵုအသဳညးတံ သ္ဂောံပလီုအာ တၚ်တုပ်စိုတ် စပ်ကဵုပရေၚ်စဵုဒၞါအကြာဍုၚ်အမေရိကာန် ၜါဍုၚ်ဂှ် အစဳဇန်ဟွံမွဲပုဟ်ဂှ် သၞာဲဒဴကဵုကသပ် သမ္မတမာကောသ် ဟီုလဝ်ရ။
နကဵုညးတံ ပရေၚ်ကယျာန်ဓဝါန်တံဂှ် မိက်ဂွံသောၚ်ကလးအာ ဗွဲမၜိုဟ်လလမ်တုဲ ဂွံစပေါဲပၞာန် အစဳဇန်ဟွံမွဲပုဟ်ဂှ် သမ္မတမာကောသ် ဟီုရ။
ၜဳကြုက်သၠုၚ်ကျာ အတိုၚ်မွဲဂှ် ကြုက် ဟီုလဝ် ဒှ်ဒြပ်အပိုၚ်ညးတံတုဲ ဂလာန်ဏံဝွံ ဟွံကိတ်ညဳကဵု သၞောဝ်ဥပဒေပုဟ်ဂှ် ရုၚ်သၞောဝ်ဓဝ် သောၚ်ကလးပရေၚ်ကယျာန်ဓဝါန်ဍုၚ်သ္အာၚ် သ္ဂုတ်သွာတ်လဝ်ကီုလေဝ် ကြုက် ဟွံသ္ပလဝ်ဂရုရ။
သမ္မတမာကောသ်ဂှ်တှ်ေ ပ္ဍဲတွဵုဒၞက်ဖဳလေတ်ဖေန်ဂှ် မွဲၝောံတဲမှ ဒုၚ်လုက်အာဟွံသေၚ်ပုဟ်ဂှ် ဟီုကြီုလဝ်ရ။
ပ္ဍဲကဵုပရေၚ်ဆေၚ်မုက်ဒိဓဗတ် အပ္ဍဲၜဳကြုက်သၠုၚ်ကျာ ကၠာတေံမွဲဂှ် ဒပ်ဍာ်အေန်ဒိုဝ်နဳယှာ စဵုကဵုပန်ပှော်ဒး ဂၠုၚ်တမ္ၚာကြုက်တံဂှ် က္တဵုဒှ်လဝ်ရ။
Ref: AP