ဇြပ်ဗု၊ ဂျူလာၚ် ၃၁
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲလ္တူသ္ကုတ်ဂၠံၚ်ပျဳထံၚ်သု စၟတ် ၈ အကြာကွာန်ဝါခမိကဵု ကွာန် ( ရွာသာအေး) ဂှ် လ္ပာ်ကံၚ်ဇြဳပၞာန် မသုန်တၠ ချိုတ်လဝ်ရောၚ် ဂွံတီကေတ် ဇရေၚ်ကရောၚ်ပၞာန်ဒံၚ်ညဵုရ။
ပ္ဍဲဂိတုဂျူလာၚ် ၂၉ အခိၚ်နူဂယး ၜိုတ် ၈ နာဍဳဂှ် ဒပ်ကံၚ်ဇြဳပၞာန် ပါ်ကရောၚ်ပၞာန်ၜါတုဲ နကဵုဇြဟတ်ဒပ် ၁၀၀ ပြၚ် ထ္ပက်ကၠုၚ်ပၞာန်ဂှ်ကဵု အကြာဒပ်ပံၚ်ကောံ ဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်ဘာ်နာဍဳပြၚ်ရ။
အပ္ဍဲပေါဲဗ္တိုက်ဏံဂှ် ကောန်ဒပ်ကံၚ်ဇြဳပၞာန် မသုန်တၠ ချိုတ်တုဲ ညးဇီုကပိုက်ကလိဂွံဝပ်တံလေဝ် နွံတုဲ လ္ပာ်ဒပ်ပံၚ်ကောံပၠန်ဂတးတံ ဇီုကပိုက်ကလိဂွံဝပ် ဟွံမွဲပုဟ်ဂှ် ညးတာလျိုၚ် ကရောၚ်ပၞာန်ဒံၚ်ညဵုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပေါဲဗ္တိုက်ဏံတုဲ ညးဍုၚ်ကွာန်ဒေသ နူကဵုကွာန်ဝါခမိ၊ ကွာန် ( ရွာသာအေး) တံ မပါလုပ် သီုကဵုကွာန်ဗ္ဒါဲဗ္ဒါဲတံဂှ် ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်တုဲ ဗွဲမဂၠိုၚ်ဂှ်တှ်ေ ဒးမၚ်ရံၚ်ဒၟံၚ် အကာဲအရာဂှ် ဂွံတီကေတ် ဇရေၚ်ညးဒေသတံရ။
ကရောၚ်ပၞာန်ကံၚ်ဇြဳပၞာန်ဝွံ စဵုကဵုဂိတုဂျူလာၚ် ၃၀ ဂှ် ဆက်ချဳဒရာၚ်ဒၟံၚ် ပွဳပွူကွာန် (ဝယ်သော်) ကဵု ကွာန် ( ရွာသာအေး) တံဂှ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
လအာတုပ်သာ်ဂှ်ကီု ပ္ဍဲကဵုတ္ၚဲဂှ်ရ ပ္ဍဲပွိုၚ်ဍုၚ်ရေဝ် ဗ္ဒါဲကွာန်ကၠအ်လိမ္မဴဂှ် ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ က္တဵုဒှ်လဝ်ပေါဲဗ္တိုက်ၜါလ္ပာ်တုဲ အပ္ဍဲပေါဲဗ္တိုက်ဂှ် ညးဍုၚ်ကွာန်ကောန်အရာပ်ၜါတၠ ဒးမကမ်ကလိဂွံလဝ်ဝပ်ရ။
ဒပ်ကံၚ်ဇြဳပၞာန် ဒးဗလးလဝ်တဲ သ္ကုတ်ဂၠံၚ်ဇြပ်ဗု−ထဝါဲ မဒှ်သ္ကုတ်ဂၠံၚ်ပျဳထံၚ်သု စၟတ် ၈ ဂှ်ဝွံ စနူဂိတုဂျူလာၚ် သတ္တာဟတတိယတုဲကၠုၚ်တေံတုဲ ထ္ပက်ကရောၚ်ပၞာန်တံဂှ် ကၠောန်ကၠုၚ်ဒၟံၚ်အဆက်က်ရ။
ပ္ဍဲကဵုသ္ကုတ်ဂၠံၚ်ဇြပ်ဗု−ထဝါဲ ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်ဝွံ ဟိုတ်နူပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်အဆက်က်ဂှ်ရ နကဵုညးဍုၚ်ကွာန်ဂမၠိုၚ် ဟွံမွဲပၟိက်မ္ဂး လ္ပအာတရဴအိုတ်ညိဂှ် ဒပ်ပံၚ်ကောံဂကောံဇြဟတ်ပၠန်ဂတးတံ ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဵု