ပဠဝ်၊ ဂျူလာၚ် ၃၁
ကောန်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲဘာလကျာ် ကွာန်ကုန်ပဠဝ် ပွိုၚ်ဍုၚ်ပဠဝ် ရးတၞၚ်သဳတံသီုဖအိုတ် ထောံလသသာဗ္ဒိုပ် ဂြိပ်ဒဴအာလဝ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ကံၚ်ဇြဳပၞာန်ဝွံ နူသၞာံ ၂၀၂၂ ကြပ်အိုတ်တုဲကၠုၚ်တေံရ လုပ်စိုပ်ဖျေံလဝ်ဒပ် ပ္ဍဲဘာလကျာ်ဏံတုဲ ကောန်ဒပ်ကံၚ်ဇြဳပၞာန်ကဵု ပၞာန်ညးဍုၚ်ကွာန် ဗ္ဒါဲ ၃၀ ဂ္ဇအ်ဒၟံၚ်ဗ္ဒိုပ်ဂှ်ရ။
ဒပ်ကံၚ်ဇြဳပၞာန်ကဵု ကောန်ပၞာန်ညးဍုၚ်ကွာန်တံ ထောံလသာဗ္ဒိုပ်ဂြိပ်အာလဝ်တုဲ ဒပ်စဵုဒၞါကောန်ဂကူကရေၚ် KNDO တံမပါလုပ် ဒပ်ပၠန်ဂတးတံ ၚးတးလဝ်တိဍာ် ဗ္ဒိုပ်ဏံ ပ္ဍဲဂိတုဂျူလာၚ် ၂၉ တေံရ။
အခိၚ်ၚးတးတိဍာ်ဂှ် နူကံၚ်ဇြဳပၞာန်တံဂှ် သီဂွံလဝ် လွဟ်တူမဳၜါဇကိုအ်၊ လွဟ်တဲမွဲဇကိုအ်၊ ကပေါတ်ပၞာန်မၚ်ကွာန်တံ၊ ဇွောံမညိညကဵု မကမ်လွဟ်ဇၞော် ရပ်စပ်လဝ်တုဲတုဲတံ မဒှ်ရ။
ညးဒုၚ်တာလျိုၚ် လလောၚ်ပရိုၚ် တမ်ဒပ်ခရိုၚ်ဗိက် ၁ ဂှ် ဒပ်ပၠန်ဂတးတံ ဟိုတ်နူထိၚ်ဒက်လဝ် ကွာန်ကုန်ပဠဝ်ဂှ်ရ ဖေက်အာကၠုၚ်ဟွံဂွံ ကၟာတ်ဒးဒၟံၚ်တုဲ ထောံလသာဗ္ဒိုပ်ဂြိပ်တိတ်အာလဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဘာလကျာ် ကွာန်ကုန်ပဠဝ်၊ ဘာဗ္တောန်လိက် ကေုာံ ပ္ဍဲကဵုဒၞါဲ နူကဵုကွာန်လ္ၚဵုတံ ဒၞါဲဒပ်ကံၚ်ဇြဳပၞာန်တံ ထောံလသာအာလဝ်ဂှ် ဟိုတ်နူပစူဏာလဝ် မာၚ်လိုန်တံဂှ်တုဲ နကဵုညးဍုၚ်ကွာန်ဒေသဂမၠိုၚ် စွံသတိတုဲသွက်ဂွံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
ပ္ဍဲဂိတုဂျူလာၚ်မံက်တေံဂှ်လေဝ် ကောန်ဒပ်ကံၚ်ဇြဳပၞာန်သီုဖအိုတ် နူကဵုဗ္ဒိုပ်မိုဝ်ကဖအ် ပွိုၚ်ဍုၚ်တၞၚ်သဳ ပယျဵုသေံ−ဗၟာတံ ထောံလသာအာလဝ်ဗ္ဒိုပ်ပၠန်ရ။
ပရိုၚ်−သြၚ်လောန်တိုၚ်(မ်)
ဗီု−CJ