လာယှိုဝ်၊ အဝ်ဂါတ် ၂
အပ္ဍဲအာယုက်ကာလကာတၟေၚ် ပွိုၚ်တြဴဂိတု ကံၚ်ဇြဳပၞာန်သီအဝဵု ပပဵုပ္တိုန်လဝ်ဂှ် ပ္ဍဲရးသေံသ္ကုတ်သၟဝ်ကျာကဵု လ္ပာ်ရးမာန္တလေဝ်တံဂှ် ပရေၚ်ပၞာန်တံ သာသ္ကာတ်မြဟ်ကၠုၚ်ဏောၚ်ဂှ် ညးခါတ်အကာဲပရေၚ်ပၞာန်၊ ပရေၚ်ဍုၚ်ကွာန်တံ သ္ၚဳဂၠိပ်လဝ်ရ။
ပ္ဍဲကောံဓရီုဂီုကၠီုစဵုဒၞါ မကော်လဝ် ပ္ဍဲဂိတုဂျူလာၚ် ၃၁ တေံဂှ် က္ဍိုပ်သ္ကိုပ်ပၞာန်ဂှ် နကဵုဒပ်ပၞာန် ဒေသလာယှိုဝ်၊ နံၚ်ချဵု၊ ကျံက်မေဝ်၊ တဳပဝ် ကေုာံ ဒေသမိုဝ်ကုတ်တံ ဂွံညိၚ်ဝတ်ဂှ် ဆက်ရေၚ်တၠုၚ်အာဏောၚ် ဟီုကြီုလဝ်ရ။
ပ္ဍဲကဵုတိဍာ် က္ဍိုပ်သ္ကိုပ်ပၞာန် ဟီုဏာလဝ်တံဂှ် ညံၚ်ဂွံဂွံအရီုဗၚ်ပၞာန် ပ္တိတ်အာဏောၚ် အကာဲအရာသာ်ဏံနွံတုဲ လ္ပာ်မာန္တလေဝ်ဂှ်လေဝ် ဂလိုၚ်ပ္တိုန်ဒၟံၚ်ဇြဟတ်ပၞာန်ရောၚ် ဗိုလ်ဇၞော် ဇြေန်ယဝ် သ္ပလဝ် CDM ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တိဍာ်တံဏံဂှ် နကဵုဍေံတံ ညံၚ်တိဍာ်ဂွံညိၚ်ဝတ် ရေၚ်တၠုၚ်အာဏောၚ် ဟီုမ္ဂး ညံၚ်ဂွံဂွံအရီုဗၚ်ပၞာန်ဂှ် ဍေံပ္တိတ်ရဏောၚ်။ ပ္ဍဲကဵုဍေံတံ ကောန်ပၞာန်ချိုတ်၊ ဟွံချိုတ်၊ နွံ၊ ဟွံမွဲဂှ် ညးဟွံတီပုဟ်။ ညံၚ်ဂွံဂွံအရီုဗၚ်ပၞာန်ဂှ် ပ္တိတ်ဏောၚ်။ လၟုဟ်တှ်ေ လ္ပာ်မာန္တလေဝ်ဂှ်လေဝ် ပပဵုပ္တိုန်ဒၟံၚ်ဇြဟတ်ပၞာန်တံ နွံတုဲ လ္ပာ်ရးသေံသၠုၚ်ကျာ ယှိုဲညံၚ်−နသာန်တံဂှ် ကရောၚ်ပၞာန်တံ တိုန်ဒၟံၚ် အဆက်က်ရ” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ဂကောံ MNDAA ကဵု TNLA တံဂှ်ဝွံ ဖံက်ပ္ကဝ် တၚ်တုပ်စိုတ်ဒေါအ်ပန်ပှော်ယာယဳ သီုၜါလ္ပာ်မတုပ်လဝ်စိုတ် သွက်ဒေသဂွံၜိုဟ်လလမ်ညိၚ်ဝတ်ဂှ်တုဲ ထ္မံက်ကၠုၚ်ဒၟံၚ်ပေါဲဗ္တိုက်တံရောၚ် စောဲစပ်လဝ်ရ။
စပ်ကဵုတၚ်စောဲစပ်ဏံတုဲ နူကဵုသြၚ်လောန်တိုၚ်(မ်) သွက်ဂွံတီကေတ်လစွံစိုတ်ဂှ် ဆက်စၠောံသၟာန်သၟုက်လဝ် ဇရေၚ်ညးမၞုံအခေါၚ်ဟီုဂး ဂကောံ MNDAA ကဵု TNLA တံဂှ်ကီုလေဝ် ကလေၚ်လဝ်ပရိုၚ်ဂှ် ဟွံမွဲရ။
အပ္ဍဲပရေၚ်ပၞာန် ၁၀၂၇ လပှ်ဒုတိယ စလဝ်ပ္ဍဲဂိတုဂျောန် ၂၅ တေံဂှ် ကံၚ်ဇြဳပၞာန် ဒးဗလးလဝ်တဲ ဍုၚ်နံၚ်ချဵု၊ မိုဝ်မုက်၊ မိုဝ်ကုတ် ကေုာံ ဍုၚ်သေအ်ကူ နူကဵုဒေသရးသေံ−မာန္တလေဝ်တံဂှ်တုဲ ဍုၚ်လာယှိုဝ်၊ ကျံက်မေဝ် ကေုာံ ဍုၚ်နံၚ်ချဵု ဒၞါဲလ္ၚဵုတံဂှ်တှ်ေ ပေါဲဗ္တိုက်သ္ကာတ်မြဟ်ဒၟံၚ်ရ။
မွဲလ္ပာ်ဂှ်ပၠန် လပှ်ပရေၚ်ပၞာန်ဏံဝွံ စှ်ေကၠုၚ်ဒၟံၚ် စဵုကဵုမာန္တလေဝ်တုဲ အကာဲအရာပရေၚ်ပၞာန်တံဂှ်တှ်ေ မၚ်ရံၚ်စေအ်အ်တုဲ သွက်ဂွံဒစးဒုၚ်ပလေဝ်ပလေတ်အိုတ်ဂှ် သ္ကိုပ်ဝန်ဇၞော်အလဵုအသဳညဳသၟဟ်ဂကူ NUG မာန်ဝေန်ခိုၚ်တာန် ကဵုလဝ်သမ္တီရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ ပရေၚ်ပၞာန်ရးသေံ−မာန္တလေဝ်ဂှ်ဝွံ ဂကောံပၠန်ဂတးတံ သီဂွံပျေန်ဥူလွေန်တုဲမ္ဂး ပရေၚ်ချဳဒရာၚ်သီရးမာန္တလေဝ် မံက်ကၠုၚ်မာန်ရောၚ် သ္ၚဳဂၠိပ်လဝ်ရ။
“ပရေၚ်ပၞာန် ရးသေံ−မာန္တလေဝ်ဂှ်တှ်ေ သီပျေန်ဥူလွေန်တုဲမ္ဂး ပရေၚ်ချဳဒရာၚ်သီရးမာန္တလေဝ် ဒှ်ကၠုၚ်ဏောၚ်။ ပရေၚ်ညိၚ်ဝတ်၊ ပရေၚ်ဂီုကၠီုဟီုဂှ် မေန်အံၚ်လှာၚ် ကလောန်ညးတေံဒးကၠောန်ဂှ် ဗက်ဟီုဒၟံၚ်ပြးရ။ ဆ္ဂး အကာဲအရာဍာံဍာံဂှ်တှ်ေ လၟုဟ်ဂှ် စိုပ်ဒၟံၚ် အပ္ဍဲရးမာန္တလေဝ်ယျ။ ဒပ်ပံၚ်ကောံရပ်လွဟ်ကောန်ဍုၚ်အရၚ်တံ စိုပ်ဒၟံၚ် ခြာဇမ္ၚောဲ ကုဍုၚ်မာန္တလေဝ် ၜိုတ် ၁၀ မိုၚ်ဂှ်ယျ။ ဟိုတ်ဂှ်ရ ပွိုၚ်မွဲဂိတုဂတဏံဂှ် ပရေၚ်ချဳဒရာၚ်သီရးမာန္တလေဝ် မံက်ကၠုၚ်ဏောၚ်။ သာတုဲ သ္ကာတ်မြဟ်ကၠုၚ်ဏောၚ်” သာ်ဝွံ သ္ဂးရ။
ပ္ဍဲရးမာန္တလေဝ်ဂှ် ဒပ် PDF မာန္တလေဝ် ကဵု ဒပ်ပံၚ်ကောံ TNLA တံ သီဂွံလဝ် ဍုၚ်သေအ်ကူကဵု ဍုၚ်မိုဝ်ကုတ် ဒၞါဲမတ်မၞိက်တိတ်တံဂှ်တုဲ ဗ္ဒိုပ်ဒပ်ကံၚ်ဇြဳပၞာန် နွံဍုၚ်မာတ္တရာဂှ် ဒးဗလးလဝ်တဲ ဟွံအောန်နူကဵု ၃၅ ဗ္ဒိုပ်ရ။
နကဵုကံၚ်ဇြဳပၞာန် အပ္ဍဲပၞာန်ပၠန်ဂတးအလုံဍုၚ်မွဲ မံက်ဂတဝ်ကၠုၚ် ဟိုတ်နူပရေၚ်သီအဝဵုဂှ် ဒးဆောံလေၚ်လဝ် ဗ္ဒိုပ်ဒပ် ကဵုကၠံတုဲ ဇြဟတ်ဒပ်လေၚ်ဒိုက်တံဂှ်လေဝ် ဒးဆေၚ်ဒၟံၚ်မုက်ကဵု ပၞာန်ထ္ပက် သီဍုၚ်သီဗ္ဒိုပ်တံဂှ်ရ။
ပ္ဍဲအကာဲအရာသာ်ဏံ ကိစ္စသွက်ဂွံကၠောန်ဗဒှ်ပေါဲရုဲမာဲ၊ ပရေၚ်ဂီုကၠီု ကေုာံ ပရေၚ်ညိၚ်ဝတ်ဍုၚ်ကွာန်တံဂှ် ကေတ်အခိၚ်ရုမ်မ်ဂပ်ပ်တုဲ သ္ဂောံကၠောန်ၜိုတ် နွံပၟိက်ဂးတုဲ ကံၚ်ဇြဳပၞာန် ပပဵုပ္တိုန်လဝ်အာယုက်ကာလကာတၟေၚ်ရ။
အကြာပ်ဒပ်ဇၞော် ဇြေယျ သ္ပလဝ် CDM နူဒပ်ကျာဂှ်လေဝ် အပ္ဍဲအခိၚ်ပပဵုပ္တိုန်လဝ်အာယုက်ဏံ ရံၚ်ကဵုအကာဲအရာရာသဳဥတုလၟုဟ်တုဲ သ္ကုတ်သၠုၚ်ကျာဏံ ပေါဲဗ္တိုက်သီဍုၚ်သီဗ္ဒိုပ်တံ ဒှ်ကၠုၚ်ဟွံမာန်ဏီကီုလေဝ် ပ္ဍဲရးသေံသ္ကုတ်သၟဝ်ကျာတေံဂှ်တှ်ေ ဆက်ချဳဒရာၚ်ကၠုၚ်မာန်ဂှ် သ္ၚဳဂၠိပ်လဝ်ရ။
“ဟိုတ်နူဒှ်ကာလကသီုဂှ်ရ ဒေသလ္ၚဵုတံဂှ်တှ်ေ ဟိုတ်နူအခက်အခုဲပရေၚ်အာကၠုၚ် ဂၠံၚ်ဍာန်ထံက်ပၚ်ဇွောံမတံဂှ်တုဲ ဗီုကဵုဒၞါဲသ္ကုတ်သၠုၚ်ကျာဂှ်တှ်ေ ဒပ်ပၞာန် ထ္ပက်ကၠုၚ်ကရောၚ်ပၞာန်မ္ဂး ဗီုပြၚ်ကလေၚ်ဗ္တိုက်ဂှ် ဒှ်မာန်ကီုလေဝ် သီဍုၚ်သီဗ္ဒိုပ်တံဂှ်တှ်ေ ပ္ဍဲသ္ကုတ်သၠုၚ်ကျာဏံ ဂွံဒှ်ကၠုၚ်ဂှ် ဟွံညာတ်ပုဟ်။ ရးသေံသ္ကုတ်သၟဝ်ကျာဂှ်တှ်ေ အကာဲအရာဆက်သ္ကာတ်မြဟ်ကၠုၚ်မာန်ဂှ်နွံ။ မူဟိုတ်ရောတှ်ေ အကာဲအရာပရေၚ်ဍုၚ်ကွာန်လၟုဟ် ပေါဲအံၚ်ဇၞးဂွံဒၟံၚ်လၟုဟ်တံဂှ်တှ်ေ ဆက်တုဲချဳဒရာၚ်ကၠုၚ်မာန်ရောၚ် ညာတ်ရ” သာ်ဝွံ သ္ဂးရ။
ဗ္ဒိုပ်ဒပ်ကံၚ်ဇြဳပၞာန် သှ်ေဒၟံၚ်သွက်ဂွံသီ ပ္ဍဲကဵုပွိုၚ်ဍုၚ် ဒေသရခေၚ်တံဂှ် AA ဆက်ထ္ပက်ဒၟံၚ်ပၞာန်တုဲ ပ္ဍဲရးသေံသ္ကုတ်သၟဝ်ကျာကဵု မာန္တလေဝ်ဂှ်လေဝ် လအာတုပ်သာ်ဏံကီုရ။
ပ္ဍဲသ္ကုတ်သၠုၚ်ကျာဏံဂှ်တှ်ေ ပေါဲဗ္တိုက်ဒိဓဗတ် ကလေၚ်ခၠေဝ် ကုကရောၚ်ပၞာန်ကံၚ်ဇြဳပၞာန် မထ္ပက်လုပ်စိုပ်ကၠုၚ်တံသၟးရ နွံဒၟံၚ်ရ။
က္ဍိုပ်သ္ကိုပ်ပၞာန်ဂှ်တှ်ေ ဍုၚ်သ္အာၚ်လ္ၚဵုတံဂှ်ဝွံ လ္တူဍုၚ်ဗၟာဂှ် ဗီုပြၚ်ဍေံတံနွံပၟိက် ညံၚ်ဂွံဂွံဂှ်ကီု၊ ညံၚ်ပဋိပက္ခရပ်လွဟ် ဂွံဂၠိၚ်သ္ၚောဲတံဂှ်တုဲ ရီုဗၚ်ကဵုဒၟံၚ် ဂကောံရပ်လွဟ် ကေုာံ ဂကောံဗော်သွးဂမၠိုၚ် နူကဵုသွာၚ်ဇဳရောၚ် စောဲစပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−BPLA/MDY PDF