မတ်မလီု၊ အဝ်ဂါတ် ၃
အလုံဍုၚ်မွဲ တုဲကၠုၚ်အပ္ဍဲဂိတုဂျူလာၚ် ပွိုၚ်မွဲဂိတုဂှ် ဟိုတ်နူပြဝပကီုပရာပ်ကံၚ်ဇြဳပၞာန်တုဲ ကောန်အရာပ် ၈၄ တၠ ချိုတ်တုဲ ပ္ဍဲကဵုဏံ ညးဒးဒုၚ်ဂစိုတ် ၁၃ တၠ ပါလုပ်ဒၟံၚ်ရောၚ် ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။
ကောန်အရာပ်ချိုတ်ဂှ်ဝွံ ဟိုတ်နူကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ဒးချိုတ်အာလဝ် ဂၠိုၚ်အိုတ်တုဲ ဒၟါနူပရေၚ်ဗ္တိုက်တရဴကျာဂှ် ဒးချိုတ်လဝ် ဒုတိယဂၠိုၚ်အိုတ်ရောၚ် သ္ဂးရ။
ကောန်အရာပ်ချိုတ်အာဂှ်ဝွံ နူရးမာန္တလေဝ် ကဵု ရးသက်ကိုၚ်ဂှ် မွဲမွဲရး ၁၅ တၠ၊ နူရးမဂွဵုဂှ် ၁၂ တၠ ဒှ်အာလဝ်ဒေသ ဒးချိုတ်အာလဝ် ဒုတိယဂၠိုၚ်အိုတ်တုဲ ပ္ဍဲကဵုမၞိဟ်တြုံ မၞိဟ်ဗြဴ ဒးချိုတ်အာတံဂှ်တှ်ေ မၞိဟ်တြုံဂှ် ၆၀ တၠ၊ မၞိဟ်ဗြဴ ၂၄ တၠ ပါလုပ်ရ။
အတိုၚ်တၚ်နၚ် AAPP ဂှ်မ္ဂး နူပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ စဵုကဵုသၞာံဏံ ဂိတုဂျူလာၚ် ၃၁ ဂှ် အလုံဍုၚ်မွဲ ဟိုတ်နူပရေၚ်ပြိုက်ဂစိုတ် ကံၚ်ဇြဳပၞာန်တုဲ ကောန်အရာပ် ၅၄၀၀ တၠပြၚ် ချိုတ်အာလဝ်ရ။
သ္အာၚ်နူဂှ်ပၠန် မၞိဟ်ဒးဒုၚ်ရပ် စပ်ကဵုပၠန်ဂတးက္ညၚ်တုဲ ဒးဒုၚ်ဖျေံလဝ်ဒဏ်ဂစိုတ်တံဂှ် ၁၆၈ တၠ နွံတုဲ ပ္ဍဲကဵုဏံ မၞိဟ်ဒးဒုၚ်ဖျေံစၟတ်လဝ်ဒဏ်ဂစိုတ် ဟွံတီညာတ်တံဂှ် ၄၄ တၠ နွံရ။
AAPP ဂှ်တှ်ေ တၚ်နၚ်တံဏံဂမၠိုၚ်ဝွံ ဒှ်လၟိဟ်ကံက်ကပှ်လဝ် ၜိုတ်က္ဍစိုပ်ရတုဲ တၚ်နၚ်က္တဵုဒှ်ဒၟံၚ် ပ္ဍဲဗလးတိဂှ်တှ်ေ ဂၠိုၚ်နူဏံမာန်ဂှ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−TNLA