မတ်မလီု၊ အဝ်ဂါတ် ၃
ပ္ဍဲရးဗဂေါ ဟိုတ်နူဍာ်ဇၞော်တုဲ လၟေၚ်တရဴကွဳပၟတ် လ္ဂုၚ်−မတ်မလီု ဒးဒေါအ်ဇူလဝ်ယာယဳဂှ် စနူဂိတုအဝ်ဂါတ် ၃ တုဲ ကလေၚ်ဂြိပ်ဏောၚ်ဂှ် ဂွံတီကေတ် ဇရေၚ်ညးတာလျိုၚ်ကွဳပၟတ် သၞေဟ်ကွဳပၟတ်မတ်မလီုရ။
အပ္ဍဲဂိတုဂျူလာၚ် သတ္တာဟလက္ကရဴအိုတ် တုဲကၠုၚ်တေံဂှ် ဟိုတ်နူဗြဲဇၞော်လဝ်တုဲ ပ္ဍဲဍုၚ်ဗဂေါကီု အပ္ဍဲသၞေဟ်ကွဳပၟတ်ဗဂေါကီုဂှ် ဍာ်ဇၞော်လဝ်တုဲ လ္တူဂၠံၚ်ကွဳပၟတ် ဍာ်ကၠောံလဝ်ဂှ်ရ လၟေၚ်တရဴကွဳပၟတ်လ္ဂုၚ်−မတ်မလီုဂှ် ဒးဒေါအ်ဇူလဝ် ပရေၚ်ဓဇက်ဂြိပ်တံ စနူဂိတုဂျူလာၚ် ၂၉ တေံရ။
အခိၚ်လၟုဟ် ဍုၚ်ဗဂေါ ဍာ်ကလေၚ်စှ်ေအာတုဲ လၟေၚ်တရဴကွဳပၟတ်လ္ဂုၚ်−မတ်မလီု၊ မတ်မလီု−လ္ဂုၚ်တံဂှ် ကလေၚ်ဓဇက်ဂြိပ်အာရဏောၚ် မဒှ်ရ။
လၟေၚ်တရဴကွဳပၟတ်ဂမၠိုၚ်ဂှ်တှ်ေ ပ္ဍဲဂိတုအဝ်ဂါတ် ၃ အခိၚ်နူဂယး ၈ နာဍဳဂှ် ကွဳပၟတ်ဖုန်ကျာ စၟတ် ၈၂ နူသၞေဟ်မတ်မလီု ဓဇက်ဂြိပ်အာ သၞေဟ်လ္ဂုၚ်တုဲ၊ ကွဳပၟတ် စၟတ် ၈၁ ဂှ် နူသၞေဟ်လ္ဂုၚ် ကလေၚ်ဓဇက်ဂြိပ်အာ သၞေဟ်မတ်မလီုဏောၚ် မဒှ်ရ။
ပ္ဍဲရးဗဂေါ ဟိုတ်နူဍာ်ဇၞော်တုဲ လၟိဟ်မၞိဟ်ဂၠိုၚ်ကဵုဠက် ဒးဆုဲပြံၚ်လဝ် ကာတၟေၚ်တုဲ သီုကောန်ၚာ်တံ မပါလုပ် ညးသၟတ်ပန်တၠ ချိုတ်အာလဝ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန် အပ္ဍဲဒေသတံရ။
လၟေၚ်တရဴကွဳပၟတ် လ္ဂုၚ်−မတ်မလီုဂှ်ဝွံ အပ္ဍဲကာလသီအဝဵုဏံ ဟိုတ်နူဂၠံၚ်ပသဲကွဳပၟတ်တံ ဒးဒုၚ်ဗ္တိုဟ်မာၚ်ကီု၊ ဟိုတ်နူဍာ်ဇၞော်ကီုတုဲ မွဲဏှမွဲဏှ ဒးဒေါအ်ဇူဒၟံၚ်ယာယဳဂှ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ