မတ်မလီု၊ အဝ်ဂါတ် ၃
ဟိုတ်နူပရေၚ်ပၞာန်သီအဝဵုတုဲ သွာၚ်နာနာ ဆုတ်ယုတ်ကၠုၚ်ဒၟံၚ်တုဲ အကြာအကြေပ်အဂြတ်ဍုၚ်ကွာန်တံဂှ် တၚ်အခက်အခုဲ ညးဍုၚ်ကွာန်ဂမၠိုၚ် ဒးဆေၚ်မုက်တံဂှ် ပရေံလ္တူပရေံ ဒှ်ကၠုၚ်မာန်ရောၚ် ညးဍုၚ်ကွာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲလက်ထက်ကံၚ်ဇြဳပၞာန်ဏံ ပ္ဍဲကဵုကဏ္ဍပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ပညာ၊ ပရေၚ်ထတ်ယုက်၊ ပရေၚ်မၞိဟ်တံဂှ် နူစအခိၚ်သီအဝဵု စဵုကဵုတ္ၚဲဏံ ဆုတ်ယုတ်စှ်ေကၠုၚ်ဒၟံၚ် အဆက်က်တုဲ ပၟတ်ပၞာန်အပ္ဍဲဍုၚ်ဂှ်လေဝ် သာတုဲဂဵုထၞာန်ကၠုၚ်ဒၟံၚ်ရ။
ကေတ်အခေါၚ်ခိုဟ်ကဵု အရာတံဏံတုဲ သွက်ဂွံကၠောန်ဗဒှ်ပေါဲရုဲမာဲ၊ သွက်ဂွံကၠောန်ၜိုတ် ပရေၚ်ညိၚ်ဝတ်ဍုၚ်ကွာန်တံဂှ် ဒးကေတ်အခိၚ်ဂးတုဲ အခိၚ်ကာလကာတၟေၚ်ဂှ် ကံၚ်ဇြဳပၞာန် ပပဵုပ္တိုန်အာယုက် ၆ ဂိတုတုဲ ဆက်ကေတ်လဝ်အဝဵုကၟိန်ဍုၚ်ရ။
ညးဍုၚ်ကွာန်မွဲတၠဂှ် ကံၚ်ဇြဳပၞာန် ပပဵုပ္တိုန်အာယုက်ကာလကာတၟေၚ်ဂှ်ဝွံ လ္ပာ်ပရေၚ်ပၞာန်ဂှ် ဒှ်ဒၟံၚ်ဗီုပြၚ် ဂွံဇြဟတ်မွဲတုဲ ၚုဟ်ဗၞိက်ဍုၚ်ကွာန်ဂှ်လေဝ် ထိၚ်ဟွံမာန်ဂှ်ရ ညးဍုၚ်ကွာန်တံ ဒှ်ဒၟံၚ်ဒဒိုက်ဏီဏောၚ်ဂှ် ဟီုရ။
“အကာဲအရာ ပပဵုပ္တိုန် အာယုက်ကာလကာတၟေၚ်သာ်ဏံဂှ်တှ်ေ လ္ပာ်ပရေၚ်ပၞာန်ဂှ် ဒှ်ဒၟံၚ်ဗီုပြၚ် ဂွံဒၟံၚ်ဇြဟတ်ဏောၚ်။ ညအ်ဂှ်လေဝ် (စကစ) ဗလးအာအဝဵုဟွံသေၚ်ပုဟ်။ ၚုဟ်ဗၞိက်ဍုၚ်ကွာန်လၟုဟ်ဂှ်လေဝ် ညး ထိၚ်ဟွံမာန်ပုဟ်။ အေ ဂှ်တှ်ေ ၚုဟ်ထဝ်၊ ၚုဟ်ဒဝ်ဠာဟီုဂှ်လေဝ် ထိၚ်ဟွံမာန်ပုဟ်။ ဠၚုဟ်ထဝ်တေံဂှ်လေဝ် ရပ်လဝ်တၠဆေၚ်ထဝ်တံ။ ၚုဟ်ဒဝ်ဠာဏံပၠန်ဂှ်လေဝ် ရပ်စပ် ရဲသွံရာန်ဒဝ်ဠာတံဂှ်ရ။ ရပ်ဒၟံၚ် တိုန်သြန်တံရ။ မွဲမှ ထိၚ်ဟွံမာန်တုဲ ဍုၚ်ကွာန်ဂှ်တှ်ေ ပရေံလ္တူပရေံ ညးဍုၚ်ကွာန်တံဂှ်လေဝ် ထပ်ဒှ်ဒၟံၚ်ဒဒိုက် ဂၠိုၚ်နူဏံဏီဏောၚ်” သာ်ဝွံ သ္ဂးရ။
ပ္ဍဲကောံဓရီုဂီုကၠီုစဵုဒၞါ မပပဵုပ္တိုန်လဝ်အာယုက် ပ္ဍဲဂိတုဂျူလာၚ် ၃၁ တေံဂှ် က္ဍိုပ်သ္ကိုပ်ပၞာန်ဂှ်တှ်ေ နကဵုဒပ်ပၞာန် ရးသေံသ္ကုတ်သၟဝ်ကျာကဵု ပွိုၚ်ဍုၚ်လ္ၚဵု နူကဵုရးမာန္တလေဝ်တံ တိဍာ်ဂွံညိၚ်ဝတ်ဂှ် ဆက်ရေၚ်တၠုၚ်အာဏောၚ် ဟီုလဝ်ရ။
ဣဏံဝွံ အရာကံၚ်ဇြဳပၞာန် ဒးဗလးလဝ်တဲ ဆောံလေၚ်လဝ်တံဂှ် သွက်ဂွံကလေၚ်ကေတ်ဂှ်ကီု၊ အလုံဍုၚ်မွဲ ပ္ဍဲကဵုဒေသ ပေါဲဗ္တိုက်သ္ကာတ်မြဟ်တံဂှ် ဒှ်ဒၟံၚ်သဘဴ သၠုၚ်ပ္တိုန်အာအသိၚ် ပရေၚ်ခၠေဝ်ဗ္တိုက်တံဏောၚ်ဂှ် ညးခါတ်အကာဲပရေၚ်ပၞာန်တံ သ္ၚဳဂၠိပ်ထံက်ထ္ၜးလဝ်ရ။
ကံၚ်ဇြဳပၞာန် ကောပ်ကာဲဖန်ဖက်ဟွံဒးတံဂှ်ဝွံ ထိၚ်ဒက် တိုက်သြန်ပူဂဵုတံကီု၊ ကၟာတ်လဒဵုသြန်ဍုၚ်သ္အာၚ်ကီု၊ သ္ကဵုကပေါတ်ဗၞိက်ဇွောဝ်စှ်ေ လဇုဲလဇကီု၊ ကမၠောန်ကၟိတ် ကေုာံ ကောန်ကလောန် အောန်စှ်ေကီု၊ ၚုဟ်မးသြန်ဒ္ကေဝ် စှ်ေကၠုၚ်တံဂှ် က္တဵုဒှ်ဒၟံၚ် အဆက်က်ရ။
ဟိုတ်ဒှ်သာ်ဂှ်ရ ပရေၚ်ပိုန်ဒြပ်ဍုၚ်ဗၟာ စှ်ေကၠုၚ်တုဲ ၚုဟ်ဗၞိက်နာနာသၠုၚ်တိုန်ကၠုၚ်ဂှ်ကီု၊ ပေါဲဗ္တိုက်အလုံဍုၚ်တံလေဝ် ဆက်သ္ကာတ်မြဟ်ဒၟံၚ်တုဲ ညးဍုၚ်ကွာန်ဂမၠိုၚ် ဒးဆေၚ်ဒၟံၚ်မုက် အကြေပ်အဂြတ်နာနာသာ်ရ။
ညးဍုၚ်ကွာန်မွဲတၠပၠန်ဂှ်လေဝ် အခိၚ်လၟုဟ် ဍုၚ်ကွာန်ဂှ်လေဝ် အရာဟွံညိၚ်ဝတ်တံ က္တဵုဒှ်ဂၠိုၚ်ကၠုၚ်ဂှ်ရ ညးဍုၚ်ကွာန်သီုဖအိုတ် အကာဲအရာဂွံပရေံစှ်ေကၠုၚ်ရနွံဂှ် ဟီုလဝ် လညာတ်ညးရ။
“လၟုဟ်ဂှ်တှ်ေ သာတုဲကြေပ်ဂြတ်ကၠုၚ်ရ။ ပရေၚ်ကၠတ်ဂၠံက်တံ ဂၠိုၚ်ကၠုၚ်ရ။ တၠကမၠောန်တံဂှ်လေဝ် ကြေပ်ဂြတ်ကၠုၚ်တုဲ ညးဍုၚ်ကွာန်သ္ဇိုၚ်တံဂှ်တှ်ေ သာတုဲကြေပ်ဂြတ်ကၠုၚ်ရ။ အေ ဂှ်တှ်ေ ဍုၚ်ကွာန်ဂှ်တှ်ေ ဟွံညိၚ်ဝတ် ဒှ်ဂၠိုၚ်ကၠုၚ်ဏောၚ်။ ပ္ဍဲဒေသပိုယ်တံတှ်ေ သာပရေံကၠုၚ်ရ။ တၠကၠအ်တံကီု၊ ကောန်ကလောန်တံကီု သီုဖအိုတ်ဂှ် ဒှ်ဒၟံၚ်ဒဒိုက်အိုတ်ရ။ ဗွဲကြဴ ဂွံပရေံစှ်ေကၠုၚ်ရနွံဂှ် ညာတ်ရ” သာ်ဝွံ သ္ဂးရ။
အတိုၚ်တၚ်နၚ် ရုၚ် UNOCHA ကုလသမဂ္ဂဂှ်မ္ဂး ဟိုတ်နူပဋိပက္ခကဵု အရာဟွံဂီုကၠီုတံဂှ်တုဲ အလုံဍုၚ်မွဲ လၟိဟ်မၞိဟ်ပိပြကောဋိကိုဋ်ပြၚ်ဂှ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
သ္အာၚ်နူဂှ်ပၠန် မ္ၚးနူကဵုမာၚ်တိုပ်တိ ပြးထၞာန်၊ လွဟ်ပၞာန်သှ်ေသၟေဟ် မဗ္တိုဟ်ထ္ကးလေပ်တံဂှ် ဟိုတ်နူလွဟ်ဇၞော်ကဵု ပရေၚ်ဗ္တိုက်ပၞာန်ကျာတံဂှ်တုဲ ပရေၚ်ဒးဂြိပ်ဒဴထောံလသာသ္ၚိဌာန်တံ ဆက်က္တဵုဒှ်ဒၟံၚ်ရောၚ် UNOCHA ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ