ဘာအၚ်၊ အဝ်ဂါတ် ၄
ပ္ဍဲတွဵုရးကရေၚ် ဍုၚ်ဘာအၚ်ဂှ် ဟိုတ်နူဍာ်ဇၞော်တုဲ ညးဍုၚ်ကွာန်ဂၠိုၚ်ကဵုလ္ၚီ ဒးပြံၚ်မံၚ်လဝ် ဇရေၚ်ဗ္ဒိုပ်ရီုဗၚ်ဟံၚ်ပြာ်ဘဲဍာ်ဂှ် ဍာ်ၜဳသၚ်လောန်ထပ်တိုန်ကၠုၚ်တုဲ ညးမကြပ်ကဵုသြၚ်တံကီု လ္ပာ်တိသၟဝ်ဝ်တံဂမၠိုၚ် သွက်ဂွံစွံသတိဗွဲတၟေၚ်အိုတ်ဂှ် ဂွံတီကေတ် အတိုၚ်ဌာနစမ်ၜတ်အကာဲအရာဗြဲကျာ လလောၚ်ပ္တိတ်လဝ် ပ္ဍဲဂိတုအဝ်ဂါတ် ၃ တေံရ။
အတိုၚ်တၚ်လလောၚ်တြး ဌာနစမ်ၜတ်အကာဲအရာဗြဲကျာဂှ်မ္ဂး ဍာ်ၜဳသၚ်လောန်ဝွံ နွံဒၟံၚ်လ္တူ ဗ္ၜတ်ဂၠးမုက်ဍာ် ဍုၚ်ဘာအၚ် ဗၞတ် ၅ ပေပြၚ်တုဲ ဍာ်ၜဳဏံဝွံ မွဲတ္ၚဲပၠန်မ္ဂး သၠုၚ်တိုန်ကၠုၚ် ဗၞတ် ၃ ၝောံတဲမာန်တုဲ ဆက်နွံအာလ္တူဗ္ၜတ်ဂၠးမုက်ဍာ် ဍုၚ်ဂှ်မာန်ရ။
ဍာ်ၜဳသၚ်လောန်တိုန်ကၠုၚ်ဂှ် နကဵုညးမံၚ်ကြပ်ကဵုသြၚ်တံကီု ညးမံၚ်လ္ပာ်သ္ကုတ်သဝ်ဝ် အပ္ဍဲပွိုၚ်ဍုၚ်ဘာအၚ်တံဂမၠိုၚ် သွက်ဂွံစွံသတိဗွဲတၟေၚ်အိုတ်ဂှ် ဌာနစမ်ၜတ်အကာဲအရာဗြဲကျာ ကဵုလဝ်ကသပ်ရ။
အပ္ဍဲပွိုၚ်ဍုၚ်ဘာအၚ် ဍာ်ဇၞော်က္တဵုဒှ်လဝ် အပ္ဍဲပွိုၚ်မွဲသတ္တာဟဂှ် တုဲကၠုၚ်ပ္ဍဲဂိတုဂျူလာၚ်အိုတ်တေံ ဍာ်ကလေၚ်စှ်ေအာနွံကီုလေဝ် စှ်ေအာသၟဝ်ဗ္ၜတ်ဂၠးမုက်ဍာ်ဂှ်ဟွံသေၚ်ဂှ်ရ ပ္ဍဲကဵုအရာပ်သဝ်ဝ်တံဂှ်တှ်ေ ဍာ်နွံဒၟံၚ်ဖိုဟ်တုဲ ပ္ဍဲကဵုဗ္ဒိုပ်ရီုဗၚ်ဟံၚ်ပြာ်တံဂှ် ညးဍုၚ်ကွာန်ဒးဘဲပၞာန်တံ ဆက်နွံဒၟံၚ်ရ။
ဍာ်ၜဳသၚ်လောန် ဍာ်ကလေၚ်စှ်ေအာဂှ်ဝွံ စနူဂိတုအဝ်ဂါတ် ၂ ဏံတုဲ ဟိုတ်နူဍာ်ကလေၚ်တိုန်ကၠုၚ်လဝ်ဂှ်ရ အပ္ဍဲဍုၚ်ဘာအၚ် ဂၠံၚ်လ္ၚဵုတံဂှ်တှ်ေ ဍာ်ကလိုပ်ဒၟံၚ်တုဲ ညးဍုၚ်ကွာန်လ္တူဍုၚ်တံဂှ်တှ်ေ ဒးဒစးဒုၚ်ရာန်လဝ် ဇွောံမစၞစ ကေုာံ ဍာ်သုၚ်သ္အးဇ္ၚးတံတုဲ သွက်ဘဲဍာ်ဂှ်လေဝ် ထပ်တုဲဒးဒစးဒုၚ်ပလေဝ်ပလေတ်ဒၟံၚ်တံလေဝ် နွံဒၟံၚ်ဂှ် ညးဒေသတံ ဟီုရ။
စနူဂိတုဂျူလာၚ် ၂၆ တုဲကၠုၚ်တေံတုဲ အပ္ဍဲပွိုၚ်ဍုၚ်ဘာအၚ် ဍာ်ဇၞော်လဝ်တုဲ အခိၚ်ကာလဍာ်ဇၞော်ဏံ ပ္ဍဲကဵုပွိုၚ်ဍုၚ်ဘာအၚ်၊ ဗြဝတဳ၊ လှာဒကှ်တံကီု သီုကဵုပွိုၚ်ဍုၚ်ကြပ်သီုဖအိုတ်ဂှ် ဒးလဝ်ဘဲဍာ်တုဲ မၞိဟ်ဟွံအောန်နူကဵု ၆ တၠ ချိုတ်အာလဝ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန် ဖျေံသ္ဇိုၚ်ဒေသတံရ။
ဟိုတ်နူဍာ်ဇၞော်တုဲ တွဵုရးကရေၚ် ပ္ဍဲကဵုဍုၚ်ဘာအၚ်၊ ဗြဝတဳ၊ လိုၚ်ဗၠဲ၊ လှာဒကှ်၊ ကြုၚ်ဒဵု၊ ပိုၚ်ကြုၚ်၊ ကအ်ကြိက်၊ ကမမံၚ်တံဂှ် ဒးပံက်လဝ် ဗ္ဒိုပ်ဟံၚ်ပြာ်ပါဲဒဴဘဲဍာ်ယာယဳရ။
ပရိုၚ်−သြၚ်လောန်တိုၚ်(မ်)
ဗီု−